2 Relles 7 - Biblia ande chib Romani

¹ O Eliseo phenda leke: Asun so phenel o Del: Thiara isto ande gava saiato po udar katar e Samaria, des kile katar e mai lachi arina ka mol samo iek tolari rupuno. Ta samo iekhe tolarea rupuno ka chinen bis kile sebada.

² O trito katar e mai preche sluge e charoke phenda e profetake: I te cherela o Del penllerave ando miloso, nasti ka cherdol so phendan. A o Eliseo phenda leke: Che akhenchar ka dikhe le, a tu ni ka ja katar gala ezgode.

³ Sea star leprosura po udar e foroko ta phenena iek avereke: ¿Ka acha kate lligo ni ka mera?

⁴ Te da ando foro ka mera bokhatar soke andre si bari bok. I te besaia kate ka mera. Aide ando pero katar e siriura, te mukle amen te zivi ka zivi, a te na, ka mera.

⁵ Ta e leprosura llele orachaia ando pero katar e siriura, ta kana sea pase dikhle kai ando pero ni saia niko.

⁶ Soke o Del cherda te asunen e siriura sargo kana avena but boñikura ta bordona marimake. Ta e siriura mislisaile kai o charo katar o Israel pochinda e charonenge jititura ta ejipsiura te marenpe lenchar.

⁷ Goleke e siriura nasle kana perela e riat te na meren, ta mukle chudine pe chare, pe gra ta pe magarchura.

⁸ Ta kana avile e leprosura ando pero, die ande iek chara ta thode te jan ta te pien. Lie rup, sunakai, patave ta gurude len. Mapalal die ande aver chara ta i kote lie ezgode ta gurude len.

⁹ Mapalal phende iek avereke: Inai sukar so chera. Iek lachi viasta si allive ta amen ni phena la. Te adurichara llik thiara ka phenen kai amen sam dosale. Aide kai o cher e charoko te phena leke e lachi viasta.

¹⁰ Ta e leprosura llele ta urkindo ikharde e boñikonen kai arakhena o foro ta phende lenge: Llelam ando pero katar e siriura ta niko inai. Samo si e gra ta e magarchura phangle ta o pero achilo isto sar saia.

¹¹ Ta e boñikura urkisarde ta phende e viasta e llenenge katar o cher e charoko.

¹² Ondaka ustilo o charo orachaia ta phenda pe slugenge: Me ka phenav tumenge so mangen te cheren e siriura. Von llanen kai inai amen niso te ja, goleke mukle o pero ta gurudile ando umalia soke mislin kai amen ka lika katar o foro, ondaka ka peren pe amende, ka phanden amen ta ka den ando foro.

¹³ Ta iek andar e boñikura phenda: Te llan llene pe panch gra kai achile ando foro, ta ka dikha so llalpe. Te zivisarde o te mule, ni ka llal lenge mai lache neko amenge.

¹⁴ Lie dui gra katar iek bordon, ta o charo bichalda len te dikhen o pero katar e siriura.

¹⁵ E llene llele llik kai o Jordan ta dikhle kai sa o drom saia pherdo patave ta e ezgode kai e siriura chudie kana sigarena te nasen. Mapalal e llenen irisaile ta phende e charoke so dikhle.

¹⁶ Ondaka o foro likisto ta lie sa e ezgode katar o pero katar e siriura. Ta sar phendaia le o Del, bichinde des kile katar e mai lachi arina pe iek tolari rupuno, ta bis kile sebada pe iek tolari rupuno.

¹⁷ O charo phenda pe mai preche slugake te arakhel o udar e foroko, a e llene ustade le ta mulo, sar phendaia leke o profeta kana o charo llelo te dikhel le.

¹⁸ Gia cherdilo so phendaia o profeta kana phenda e charoke kai thiara isto ande gava saiato, po udar katar e Samaria ka chinen des kile katar e mai lachi arina o bis kile sebada pe iek tolari rupuno.

¹⁹ O boñiko phendaia e profetake kai i te cherela o Del penllerave ando miloso gua nasti ka cherdol. A o Eliseo phendaia leke kai ka dikhel le, a ni ka jal katar gala ezgode.

²⁰ Ta gia cherdilo, soke e llene ustade le po udar e foroko ta mulo.