2 Relles 6 - Biblia ande chib Romani

E bari ezgoda Devlikani katar o tover

¹ Iek llive e poraukura phende e Eliseoke: Dik, o cher kai amen zivi tuia si but minono.

² Muk amen te lla ando Jordan te la suako iek amendar iek kas te sai vazda iek cher te zivi. O Eliseo phenda lenge: Llan.

³ Ta iek katar e poraukura phenda e Eliseoke: Me moliv man chuke te lla amenchar. Ta o Eliseo phenda leke: Ako, ka llav tumenchar.

⁴ Ta o Eliseo llelo lenchar ando Jordan, kote thodepe te chinen kasta.

⁵ Kana chinena e kasta o tover katar iek profeta pelotar ando pai, ta urkisarda: ¡Tesko mange kovachi! ¡O tover ni saia murno!

⁶ Ta o profeta e Devleko puchla le: ¿Kai pelotar? Ta o profeta sikada leke kai pelotar o tover. Ondaka o Eliseo chinda kotor kas, chudia le ando pai ta o tover likisto ta achilo upral po pai.

⁷ O Eliseo phenda leke: Le le, ta o profeta lia o tover.

O Eliseo ta e siriura

⁸ O charo katar e Siria marelape e Israelea, ta puchla pe boñikonen ta phenda lenge kai saia te thovel po pero.

⁹ Ondaka o Eliseo bichalda te phenen e charoke katar o Israel te na nakhel pe gola thana soke e siriura saia te inzaren pe chare kotar.

¹⁰ Ta o charo katar o Israel bichalda e boñikonen te llan pe gola thana kai phendaia leke o profeta. Gia cherda le but droma te sai arakhelpe katar e siriura.

¹¹ O charo katar e Siria ni llanela so ka cherel, goleke ikharda e gazden katar e boñikura ta phenda lenge: ¡Phenen mange ko si amendar kai pukhavel kai charo e Israeleko so si te chera!

¹² Iek katar e boñikura phenda: Glamno charo, niko amendar ni pukhavel. O Eliseo kai si profeta ando Israel, vou phenel e charoke katar o Israel sa so tu phene ta i che alava mai gurudine kai phene ande chi soba.

¹³ Ondaka o charo katar e Siria phenda: Roden te dikhen kaitalo te phandav le. Ta kana phende leke kai o Eliseo si ando Dotan,

¹⁴ bichalda boñikonen kai llan ande bordona ta pe gra. Ta but boñikura avile orachaia ando Dotan ta thodepe truial katar o foro.

¹⁵ Thiarinako ustilo o sluga katar o Eliseo, ta kana likisto avri ta dikhla e boñikura, e bordona ta e llene pe gra kai sea truial katar o foro, llelo kai o Eliseo ta phenda leke: ¿So ka chera akana?

¹⁶ Ta o Eliseo phenda leke: Na dara soke mai but si gola kai si amenchar neko gola kai si lenchar.

¹⁷ Ondaka o Eliseo molisailo e Devleke gia: Me moliv man chuke Devla te putare leke akha te sai dikhel. Ondaka o Del putarda e akha katar o sluga te dikhel kai o burdo saia pherdo llene kai llan pe gra ta bordona iagake, ta sea truial katar o Eliseo.

¹⁸ Kana e siriura fuliena te marenpe, o Eliseo molisailo e Devleke gia: Cher te achen korre sa gala llene. Ondaka o Del korrada len gia sar mangla le o Eliseo.

¹⁹ Ta o Eliseo phenda lenge: Gava inai o drom ta inai o foro kai tumen roden. Llan pala ma, me ka inllarav tumen kai o lleno kai roden. Ta inllarda len ande Samaria.

²⁰ Ta kana avile ande Samaria, o Eliseo molisailo e Devleke gia: Devla, putar lenge akha te sai dikhen. Ondaka von dikhle kai sea ande Samaria.

²¹ Kana o charo katar o Israel dikhla len, puchla e Eliseo: ¿Ioi dade, mundarav len?

²² A o Eliseo phenda leke: Na, na mundar len. ¿Mundarea e llenen kai phanglan kana marea tut che jarniea ta che arkoia? Thou lenge marrno ta pai, mapalal irisar len kai lengo gazda.

²³ Ondaka cherde lenge baro jape, a von jale ta pile. Mapalal o charo mukla len te llantar ta von lleletar kai po gazda. Ta sar kotar e siriura mukle te marenpe e israelitonenchar.

O Eliseo ta e Samaria

²⁴ Mapalal katar gale ezgode o Ben adar chidia sa pe boñikonen te marelpe e foroia katar e Samaria. Ta llele ta truisarde e foro.

²⁵ Ta saia ande Samaria bari bok soke e boñikura sea truial katar o foro. Gia bari saia e bok kai iek soro magarcheko, mola ojtovardes tolaria rupune. O starto litro katar e pogastia e guluboki, mola panch tolaria rupune.

²⁶ Iek llive o charo katar o Israel phirela po zido, ta iek diskinia urkindo phenda leke: ¡Glamno charo pomozisar man!

²⁷ A o charo phenda lake: Te na pomozil tut o Del, ¿sar ka pomoziv tut me? ¿Katar ka ikanav lliu o mol te dav tut?

²⁸ Ta o charo phenda lake: ¿So si chuke? Voi phenda leke: Gaia diskinia phenda mange te dav me chaurre te ja le allive, ta kai thiara ka ja lake chaurre.

²⁹ Amen chiradam me chaurre ta jalam le. A thiarinako me phendem lake te anel pire chaurre te ja le, a voi guruda le.

³⁰ Kana o charo asunda so phenela e diskinia, pharrada pe patave, ta nakhlo gia po zido, ta o foro dikhla kai leke patave sea zalosne.

³¹ Ta o charo urkindo phenda: ¡O Del te dukhavel man zurale te na chinava allive o soro e Eliseoko chavo e Safateko!

³² O Eliseo saia ande po cher besindo e phurenchar. Ta o charo bichalda iekhe llene lete. A mai anglal te avel gua lleno lete o Eliseo phenda e phurenge: Dikhen sar gava lleno chavo katar iek lleno kai mundarel, bichalda te chinen mo soro. Kana ka avel o bichaldo phanden o udar ta na muken le te del andre. Soke palal pala le asundol o phiripe katar leko gazda.

³³ Kana o Eliseo dela orba e phurenchar avilo o bichaldo, ta phenda: E Devletar avel gaia bari patnia, ¿so ios sai aduricharav letar?