2 Relles 5 - Biblia ande chib Romani

O Naaman sastol katar e lepra

¹ O Naaman saia gazda e boñikonengo ande Siria. O charo cherela but pala le soke letar o Del cherdaia te dobil e Siria ando maripe. A gava tromano boñiko saia leproso.

² Iek drom nesave siriura mardepe e israelitonenchar ta lie iekhe chorra kai cherde la sluga katar e rromi e Naamaneki.

³ Gaia chorri phenda e rromiake katar o Naaman: Te llala mo gazda te dikhel e profeta kai zivil ande Samaria, sastola katar pi lepra.

⁴ Kana o Naaman asunda gava, llelo kai o charo te phenel leke so phendaia e chorri.

⁵ O charo phenda leke: Lla, soke me ka bichalav iek lil e charoke katar o Israel. Ondaka o Naaman lia tranda milie tolaria rupune, ta sov milie tolaria sunakune. Lia des premene ta llelotar.

⁶ Ta inllarda e charoke katar o Israel o lil kai phenela gia: Kana ka chiti gava lil ka llane kai me bichaldem e Naamane, iek katar me sluge te sai sastare le katar pi lepra.

⁷ Kana o charo chitisarda o lil pharrada pe patave ta phenda: ¿So sem me o Del te mundarav o te dav o zivoto, kai o charo katar e Siria bichalel mange iekhe llene te sai sastarav le katar pi lepra? Dikhen sar rodel vareso te marelpe manchar.

⁸ Kana o Eliseo, manus e Devleko, llangla kai o charo saia ande bari nuzda, bichalda te puchen le: ¿Soke pharradan che patave? Muk te avel mande gua lleno te dikhel kai ando Israel si profeta e Devleko.

⁹ Gia o Naaman llelo ande po bordon ta pe grastenchar, ta achilo angla o udar katar o cher e Eliseoko.

¹⁰ A o Eliseo bichalda iekhe llene te phenel leke: Lla ta jalav tut ando pai katar o Jordan efta droma ta ka sastol cho mas ta ka lelpe tutar e lepra.

¹¹ O Naaman llelotar joliariko ta phenda: Me misliva kai ka likel ta pe porrne ka molilpe e Devleke. Misliva kai ka thovel pe va pe ma te sai lelpe mandar e lepra.

¹² ¿Inai e lena katar o Damasko o Abana ta o Farfar mai lache neko sa e lena kai si ando Israel? ¿Nasti jalavav man ande lende te sastivav? Ta llelotar kotar but joliariko.

¹³ A leke sluge phende leke: Gazda, o profeta te manglaia tutar iek ezgoda trudni, ¿ni cherdana la? Goleke saia te chere le kana mangla tutar te de ando pai katar Jordan te sai sasto.

¹⁴ Ondaka o Naaman llelo ta dia ando pai efta droma sar phendaia leke o profeta. Isto kote sastilo katar e lepra, ta leko mas achilo sasto sargo o mas iekhe minoneko.

¹⁵ Mapalal o Naaman ta sa leke sluge irisaile te dikhen e Eliseo. Ta kana o Naaman avilo kai o Eliseo, phenda leke: ¡Akana llanav kai inai aver Del ande sa e phuv, samo ando Israel! Me moliv man chuke te le vareso kai anda chuke cho sluga.

¹⁶ Ta o Eliseo phenda leke: Dav tut mo alav ando anav e Devleko kai ni ka lav so andan mange. Ta o Naaman pale phenda e Eliseoke te lel vareso katar so anda leke, a o Eliseo ni kamla.

¹⁷ Ondaka o Naaman phenda leke: Moliv man chuke, muk man te chidav chik katar o Israel te inllarav la pe dui magarchura, soke me nikada ios ni ka dav kurbanura avere delen, samo e Devle.

¹⁸ Samo mangav e Devletar te prostil man kana mo charo ka llal te blagosil ando cher katar o del o Rimon, soke i me si te llav lea. O charo ka istarel me va ta ka trubul te dav changenchar lea. ¡Te prostil man o Del!

¹⁹ Ta o Eliseo phenda leke: Na brigisao, lla esmiro. O Naaman llelotar, ta kana saia dur,

²⁰ o sluga e Eliseoko o Gejazi mislisailo gia: O profeta o Eliseo mukla te llaltar e Naamane ta ni lia so anda leke. Ka llav lete te sai lav letar vareso. Ando anav e Devleko phenav le.

²¹ Ondaka o Gejazi llelo pala o Naaman ta kana vou dikhla le kai prastela pala le, fulisto katar o bordon ta puchla le: ¿So llalpe?

²² O Gejazi phenda leke: Mo gazda phenel kai katar e burdura o Efraim avile lete dui poraukura terne. Vou mangel tutar te de len trin milie tolaria rupune ta dui premene neve.

²³ O Naaman phenda leke: Me moliv man chuke te le sov milie tolaria rupune. O Naaman mangla letar but droma te lel e tolaria. Thoda e love ta e dui premene ande dui anbave, ta dia len kai pe dui sluge te inllaren len angla o Gejazi.

²⁴ Kana avilo pe iek than gurudino, o Gejazi lia e love kai ande e sluge ta guruda len ando cher. Mapalal phenda e slugenge te llantar.

²⁵ Mapalal o Gejazi llelo kai po gazda, ta o Eliseo puchla le: ¿Katar ave Gejazi? Ta o Gejazi phenda: Ni llelem ninde.

²⁶ A o Eliseo phenda leke: Kana o lleno fulisto katar o bordon te lel tut, me sema kote ando mislo. Inai akana o vreme te le love, patave o te chine vostanura, ni bakre ni sluge.

²⁷ Goleke e lepra kai saia po Naaman ka istarela tu ta cho porodo ostade. Ta o Gejazi likisto leproso, gachin kai dikhola parrno sargo o iv.