2 Relles 4 - Biblia ande chib Romani

E bari ezgoda Devlikani katar o zeitino

¹ Iek diskinia kai saia pala iek profeta, phenda e Eliseoke: Cho sluga mo rrom mulo ta tu llane kai vou blagosila e Devle. Vou mangla love unllile, ta o lleno kai dia le unllile mangel te lel me duie chaven te aven leke sluge.

² O Eliseo puchla la: ¿So sai cherav pala tu? Phen mange, ¿so si tut ando cher? E diskinia phenda leke: ¡Samo si man iek piri zeitinoia!

³ O Eliseo phenda lake: Mang piria chuche katar e llene kai zivin truial. Te anen chuke so sai mai but.

⁴ Mapalal de ande cho cher che chavenchar ta phande o udar. Thou zeitino ande piria, ta gia sar pere suako iek thov la pe iek rig.

⁵ Ondaka e diskinia llelitar kai po cher, dia andre pe chaurrenchar ta phangla o udar. Lake chave anena e piria ta voi pherela len zeitino.

⁶ Ta kana sa e piria sea pherde, phenda iekheke katar lake chave: An mange aver piri. Ta vou phenda lake: Inai ios piria. Ondaka getosailo o zeitino.

⁷ E diskinia lleli te dikhel e Eliseo ta phenda leke so nakhla. Ta vou phenda lake: Lla ta bichin o zeitino ta pochin so san unllile gole lleneke. So ka achel tut ka zivi tu ta che chave.

O Eliseo ta e sunamita

⁸ Iek llive o Eliseo llelo ando Sunem. Kote zivila iek diskinia but preche kai ikharda le te jal. Ta suako drom kana o Eliseo nakhela kotar llala late te jal.

⁹ Ondaka voi phenda pe rromeke: Akana me llanav kai gua lleno kai avel te dikhel amen si profeta e Devleko.

¹⁰ Aide te chera upral po cher iek soba leke. Ka thova andre iek postelia, iek stolicha, iek stali ta iek lampara, gia o profeta kana ka avel amende ka avel le iek than kai te racharel.

¹¹ Iek drom o Eliseo avilo ta achilo te racharel ande soba kai cherdea leke.

¹² Ta phenda pe slugake o Gejazieke: Lla ta ikhar e sunamita. O sluga ikharda la ta kana voi avili, o Eliseo phenda pe slugake:

¹³ Puch gale diskinia kai si but pachivali amenchar so sai chera pala la. Voi te mangela, amen sai da lachi orba latar e charoke o e gazdake katar e boñikura. Ta e diskinia phenda: Me ziviu maskar mo foro, ni trubul man niso.

¹⁴ Ta o Eliseo puchla e Gejazie: ¿So sai chera pala la? O Gejazi phenda e Eliseoke: Ni llanav. Inai la chave ta lako rrom si phuro.

¹⁵ Ikhar la phenda o Eliseo. Ta o sluga llelo te ikharel la, a voi achili pe porrne po udar e chereko.

¹⁶ Ta o Eliseo phenda lake: O gua burs isto ande gala llivesa ka inllare che minone ande che va. Ta e diskinia phenda: Tu san profeta e Devleko a me sem chi sluga. Na mar espurnia katar chi sluga.

¹⁷ Ta isto gia sar phendaia lake o Eliseo, kana nakhla burs llive e diskinia achili khamni ta maladila lake iek minono.

¹⁸ O minono barilo. Ta iek llive llelo kai po dad kai radila e phuv pe slugenchar.

¹⁹ Ondaka o minono urkisarda: ¡Mo soro! ¡Dukhal man mo soro! Ondaka lekpo dad phenda pe slugake: Inllar e minone kai leki dei.

²⁰ O sluga inllarda le kai leki dei, ta voi thoda le pe pe changa llik kai o dopas e lliveseko. Ta o minono mulo.

²¹ Ondaka voi anda e minone ta thoda le ande soba e profetaki, thoda le pe postelia, likisti ta phangla o udar.

²² Mapalal ikharda pe rrome ta phenda leke: An mange iek sluga ta iek magarcha te llav oma kai o profeta. Mapalal ka avav.

²³ Lako rrom puchla la: ¿Soke lla allive te dikhe le? Inai nevo chon ta inai sabado. Voi phenda leke: Na brigisao, me llanav so cherav.

²⁴ E diskinia phenda te lacharen e magarcha, ta phenda pe slugake: Sigar ta na achi lligo ni ka phenav le chuke.

²⁵ Ta e diskinia lleli po burdo o Karmelo. Kana o Eliseo dikhla la kai avela duratar, phenda e Gejazieke: Dik, avel e diskinia sunamita.

²⁶ Praste te malado laia, ta puch la sar si lako rrom ta lako chaurro. Kana o Gejazi puchla la, e diskinia phenda leke, sukar.

²⁷ A kana avili kai o Eliseo chudiape pe leke porrne. Ta o Gejazi mangla te lel la letar, o Eliseo phenda leke: ¡Mukla! Voi si but tristome, a o Del ni phenda mange so nakhla.

²⁸ Ondaka e diskinia phenda e Eliseoke: ¿Manglem tutar iek minono? ¿Ni phendem chuke te na mare mandar espurnia?

²⁹ O Eliseo phenda e Gejazieke: Lachar tut, le mi rovli ta lla kai si o minono. Te maladan fika po drom na phen leke sar si. A fiko te puchel tut sar san, na phen leke niso. Kana ka ave thov mi rovli po mui e minoneko.

³⁰ A e dei katar o minono phenda e Eliseoke: Jau chuke sovel po Del ta pe tu, kai ni ka mukau tut kate.

³¹ Ondaka o Eliseo llelo laia. O Gejazi avilo mai oma neko von, ta thoda e rovli po mui e minoneko, a o minono ni miskosailo. O Gejazi llelo kai o Eliseo ta phenda leke: O minono ni llungadol.

³² Kana o Eliseo dia ando cher, dikhla kai o minono saia mulo inzardo pe postelia.

³³ Dia ande soba phangla o udar, achilo korkorre e minonea ta molisailo e Devleke.

³⁴ Mapalal inzilo upral po minono. Thoda po mui pe minoneko, pe akha pe akha e minoneke ta pe va pe va pe minoneke, ta gia e esnaga e minoneki thoda te tatol.

³⁵ Mapalal o Eliseo ustilo ta phirda pe suako rig katar e soba. Ta pale inzilo po minono. Ondaka o minono dia chin efta droma ta putarda pe akha.

³⁶ O Eliseo ikharda e Gejazie, ta phenda leke: Ikhar e sunamita. O Gejazi ikharda la ta kana voi avili o Eliseo phenda lake: Le che minone.

³⁷ Ta e diskinia chudiape pe porrne e Eliseoke. Mapalal lia e minone ta likisti katar e soba.

E bari ezgoda Devlikani katar o jape

³⁸ Mapalal katar gala ezgode o Eliseo irisailo ando Gilgal. Ande gua vreme ni saia jape ande goia phuv ta saia bari bok, ta e poraukura sea e Eliseoa, ta o Eliseo phenda pe slugake: Thou e bari kavi pe iag ta cher iek zumi.

³⁹ Iek katar e poraukura llelo ando vos ta malada septelie sargo dudum. Pherda po gertachi lendar, anda len ando cher ta chirada len bi te llanel so sea.

⁴⁰ Kana thode te jan, e poraukura urkisarde: ¡Eliseo, profeta e Devleko, o meripe si ande zumi! Ta ni jale ios.

⁴¹ A o Eliseo phenda: Anen mange arina. Ta thoda e arina andre ande kavi, ta phenda: ¡Akana den len te jan! Ta sa jale ta o jape ni cherda lenge niso.

⁴² Mapalal avilo iek lleno katar o Baal Salisa ta anda e Eliseoke bis marrne cherde katar e sebada mai terni. Ta o Eliseo phenda pe slugake: De o marrno te jan e llenen.

⁴³ A o sluga phenda e Eliseoke: ¿Sar ka dav te jan stotina llene? Ta o Eliseo phenda leke: De o marrno te jan e llenen soke o Del phenda kai sa ka jan ta i ka achel.

⁴⁴ Ta o sluga thoda o marrno angla lende, ta von jale ta achila len marrno isto gia sar phendaia le o Del.