2 Relles 3 - Biblia ande chib Romani

O Joram charoil ando Israel

¹ O Joram chavo katar o Ajab thoda te charoil ando Israel kana cherena desojto burs kai o Josafat charoila ando Juda. O Joram charoisarda desudui burs ande Samaria.

² O Joram cherda o bilachipe angla e Devleke akha, a na gachin sargo leko dad ta leki dei, soke zatrisarda e estatue barrustune kai leko dad vazdiaia e Baaleke.

³ O Joram cherda isto gola ezgode bilache kai cherda o Jeroboam, chavo katar o Nabat kai cherda te cherel o bilachipe o Israel.

O Eliseo phenel kai ka dobin e Moabe

⁴ O Mesa kai saia o charo katar o Moab saia le but bakre, ta suako burs pochinela e charoke katar o Israel stotina milie bakre ta e bal katar stotina milie bakre.

⁵ A kana o Ajab mulo o Mesa vazdiniaola po Israel.

⁶ Ondaka o charo o Joram likisto katar e Samaria ta chidia sa e boñikonen katar o Israel.

⁷ Ta bichalda te phenen gia e Josafateke, charo katar o Juda: O charo katar o Moab vazdinailo pe ma. ¿Mange te pomozi man te mara amen lea? Ta o Josafat phenda leke: Ka llau soke me sem sargo tu, mo foro sargo cho foro, ta me gra sargo che gra.

⁸ ¿A sar ka chera te da pe lete? O Joram phenda: Amen ka lla po drom po pusto katar o Edom.

⁹ Gia likiste o charo katar o Israel, o charo katar o Juda ta o charo katar o Edom. Kana phirde po pusto, pala efta llive getosailo o pai kai saia e boñikonenge ta e grastenge.

¹⁰ Ondaka o charo katar o Israel phenda: ¡Ioi! O Del anda amen e trine charonen te del amen ande va katar e moabitura.

¹¹ O Josafat puchla: ¿Inai kate iek profeta e Devleko te sai pucha e Devle so ka chera? Iek gazda e boñikonengo katar o charo e Israeleko phenda: Kate si o Eliseo chavo katar o Safat kai saia o sluga e Eliaseko.

¹² O Josafat phenda: ¡Vou ka phenel amenge so phenel o Del! Ta e trin charura llele te dikhen e Eliseo.

¹³ Ondaka o Eliseo phenda e charoke katar o Israel: ¡Inai man niso tuia! ¡lla ta puch e profetanen kai cho dad ta chi dei suako drom puchen! Ta o charo e Israeleko phenda leke: Ni ka cherav le. O Del anda amen e trine charonen te del amen ande va katar e moabitura.

¹⁴ Ta o Eliseo phenda leke: Dav tut mo alav ando anav katar o Del kai si le sa e zor, kai te na avilaia pala o liubao kai si man po Josafat o charo katar o Juda, ni asundema tut ta ni dikhlema ni pe tute.

¹⁵ Anen mange iek sfirachi. Kana o sfirachi thoda te basalel, o va e Devleko avilo po Eliseo,

¹⁶ ta o Eliseo phenda: O Del phenel gia: Cheren thana te chidiniaol o pai pe gaia umal,

¹⁷ ni ka dikhen balav ta ni bursin, a gaia umal ka avel pherdi pai ta sa tumen, ta sa tumare zivirinie ta tumare gra ka pien.

¹⁸ O Del sai cherel le. Vou ka pomozil tumen te dobin e moabitonen,

¹⁹ tumen ka zatrin sa e mai bare forura kai truial si len zidura bare. Ka chinen sa e kasta kai den septelie, ka phanden sa e bunaria ta ka chuden barra pe sa e vostanura.

²⁰ Thiarinako rano kana delpe o kurbano, avilo pai katar o Edom ta sa goia phuv pherdili pai.

²¹ Kana e moabitura asunde kai e trin charura avena te marenpe lenchar, ikharde saurren katar e mai terne llik kai e mai phure, ta thodepe chak anglal katar pi phuv te marenpe.

²² Thiarinako rano ustile ta o kham klichila po pai. Ta e moabitura dikhle o pai lolo sargo o rat.

²³ Ondaka phende: ¡Gava si o rat katar e charura kai mardepe ta mundardepe maskar pete! ¡Moabitura, aven te la e ezgode kai mukle!

²⁴ Ta kana e moabitura avile kai o pero katar e israelitura, e israelitura die pe lende. E moabitura nasle, a e israelitura rodie len ta mundarde len.

²⁵ Zatrisarde e forura ta chudie barra pe vostanura, phangle e bunaria ta chinde e kasta kai dena septelie. Samo achilo o foro katar o Kir Jareset, ta e boñikura kai chudena barra truisarde le ta zatrisarde le.

²⁶ Kana o charo katar o Moab dikhla kai jasarela, ikharda efta stotine boñikura kai marenape e jarnienchar te marelpe e charoia katar o Edom. Ta nasti dobisarde le.

²⁷ Ondaka inllarda pe chave e mai purane pasa o zido katar o foro, ta kote mundarda le ta phabarda le sargo kurbano pe deleke. Gava chavo saia te charoil mapalal letar. Kana dikhle so cherda o charo, e israelitura jolaile gachin kai irisaile kai pi phuv.