2 Relles 23 - Biblia ande chib Romani

¹ Ondaka o charo ikharda e phuren katar o Juda ta katar o Jerusalem te chidiniaon lea.

² Mapalal sa e murusa katar o Juda, sa e llene katar o Jerusalem, sa e popura, sa e poraukura, sa o foro katar o mai minono llik o mai phuro, sa llele ando cher e Devleko. Kote o charo bare avazea chitisarda lenge o lil katar e alava kai malade ando cher e Devleko.

³ Mapalal o charo thodape pe porrne pasa o direko ta achilo po alav e Devlea kai ka llan orta angla o Del sa pe liea ta sa pe zivotoia, ka guruven leko zakono ta leke alava ta ka cheren leki volia sar si pisime ando lil. Ta sa o foro achilo po alav kai ka cheren sa gala ezgode.

O Josias lacharel e ezgode

⁴ Ondaka o charo phenda e Jilkiaseke o baro popo, leke slugenge ta e llenenge kai arakhena e udara, te ikanen katar o cher e Devleko sa e ezgode cherde e Baaleke e Aserake ta sa e cheraienge. Ta phabarda len avri katar o Jerusalem ando vos katar o Sedron, ta inllarda o prajo iagako ando Betel.

⁵ Mapalal ikanda e poponen kai blagosina avere delen kai e charura katar o Juda thodea len te phabaren o taimano pe thana vazdine katar o Juda, ta truial katar o Jerusalem. Ta ikanda e poponen kai phabarena o taimano e Baaleke, e khameke, e choneke, e slikenge katar o sodiako, ta e cheraienge katar o miloso.

⁶ Ikanda avri katar o Jerusalem e slika katar e Asera kai saia ando cher e Devleko, ta phabarda la pasa o paiorro katar o Sedron, ta o prajo iagako rispisarda le pe limoria katar o foro.

⁷ Ta zatrisarda e sobe kote kai e murusa cherena o kurvaluko maskar pete te blagosin pe delen, ta e diskinie cherena e chare e Aserake.

⁸ Ta o charo cherda te aven sa e popura katar e forura e Judaeke, ta zatrisarda e thana vazdine kai phabarena o taimano, katar o Geba llik o Berseba. Zatrisarda e thana kurbanoke kai sea pe rig o stingo katar o udar e Josueeko, gazda katar o foro.

⁹ A e popura katar e thana vazdine ni llana kai o altar e Devleko ando Jerusalem, samo jana maskar pete marrno kai inai le levadura.

¹⁰ Zatrisarda e Tofete kai saia o than kai phabarena e minonen ande umal katar o Ben Inom, te na phabarel niko pe minonen e Molokeke.

¹¹ Ikanda e gra kai e charura e Judaeke chinadea e khameke po udar katar o cher e Devleko, pasa e soba katar o eunuko Natan Melek, kai arakhela e umalia e foroke. Ta phabarda e bordona kai sea chinade e khameke.

¹² Ta i o charo perada e altarura kai sea upral pe soba katar o Ajaz kai cherdea e charura katar o Juda, ta i e altarura kai cherdaia o Manases ande dui bar katar o cher e Devleko. Zatrisarda len, ta kotar prastio ta chudia o prajo ando paiorro katar o Sedron.

¹³ Zatrisarda e thana avere delenge kai sea ando oriente katar o Jerusalem, pe rig e chachi katar o burdo katar e zatrania, kai o Salomon, charo e Israeleko vazdiaia e Astoretake, o del gado katar e sidoniura, e Kemoseke, o del gado katar e moabitura, ta e Milkomeke, o del gado katar e amonitura.

¹⁴ Ta zatrisarda e estatue ta e slike katar e Asera, ta pherda kokala manusenge gola thana.

¹⁵ Ta i o Josias zatrisarda o altar kai saia ando Betel ta o altar kai saia po burdo kai vazdiaia o Jeroboam chavo katar o Nabat, kai cherda te cherel o bilachipe e Israele. Phagla gua altar ta phabarda le ta cherda le prajo. Ta i phabarda e slika katar e Asera.

¹⁶ Kana o Josias irisailo ta dikhla e limoria kai sea po burdo, bichalda llenen te ikanen e kokala ta phabarda len po altar te meliarel le, sar phendaia le o Del cheres o profeta kana phenda kai gia saia te avelpe.

¹⁷ Mapalal puchla: ¿So si gua kai me dikhav incha? Ta e llene phende leke: Gava si o limori katar o profeta kai avilo katar o Juda ta poraukisarda katar e ezgode kai tu cherdan po altar katar o Betel.

¹⁸ Ondaka o Josias phenda: Muken le kote. Niko te na dodil leke kokala. Gia mukle isto kote leke kokala ta e kokala katar o profeta kai aviloia katar e Samaria.

¹⁹ Ta sa e chera katar e altarura kai e charura katar o Israel vazdie avere delenge ande Samaria, kai pala gua joliarde e Devle, o Josias ikanda len ta cherda lenchar gia sar cherdaia ando Betel.

²⁰ Ta mundarda pe altarura sa e poponen kai blagosina avere delen ta pe lende phabarda kokala manusenge. Mapalal irisailo ando Jerusalem.

O Josias cherel e slava katar e paskua

²¹ Ondaka o charo phenda gia e foroke: Cheren e slava katar e paskua e Gazdake tumaro Del, sar si pisime ando lil katar gava alav.

²² Ni cherdea e paskua sar kana e krisaria gazdarina ando Israel, ta ni ando vreme katar e charura katar o Israel ta katar o Juda.

²³ Kana nakhle desojto burs sar kana o Josias thoda te charoil, cherde e slava katar e paskua e Devleke ando Jerusalem.

Ni lelpe e joli e Devleki po Juda

²⁴ O Josias chudia e llenen kai cherena chirimate, kai apogodina, e delen katar e familie ta sa e ezgode gado kai blagosina ando Juda ta ando Jerusalem. Gua cherda le te kandel so saia pisime ando lil katar o zakono kai maladaia o popo o Jilkias ando cher e Devleko.

²⁵ Nikada ni saia ni iek charo sargo o Josias kai irisailo e Devleke sa pe liea, sa pe duoia ta sa pe zoriaia sar phenel le o zakono e Moiseseko. Ta mapalal letar ni avila niko sargo vou.

²⁶ A e joli e Devleki ni liape, soke saia joliariko po Juda pala sa e ezgode bilache kai cherdaia o Manases.

²⁷ Goleke o Del phenda gia: Ka mukav e Judae sar muklem e Israele. Ta i ka mukav e Jerusaleme kai esvirisardem, ta ka mukav o cher kai phendem kai andre saia te avel mo anav.

O meripe katar o Josias

²⁸ Sa so cherda o Josias si pisime ando lil katar so cherde e charura e Judaeke.

²⁹ Ande gua vreme o charo katar o Ejipto o Faraon Nekao llelo po pai katar o Eufrates te marelpe e charoia katar e Asiria. Ta likisto o Josias te marelpe lea, a samo kana o Nekao dikhla le, mundarda le ando Megido.

³⁰ Leke sluge thode leki esnaga ande iek bordon ta ande le katar o Megido llik kai o Jerusalem, kote prajosarde le ande leki limoria. Mapalal e llene katar o foro thode zeitino po Joakaz, chavo katar o Josias, ta thode le te charoil po than leke dadeko.

O Joakaz charoil ando Juda

³¹ Kana o Joakaz thodape te charoil sea leke bis ta trin burs. Ta charoisarda ando Jerusalem trin chon. Leki dei saia e Jamutal chei katar o Jeremias katar e Libna.

³² A o Joakaz cherda o bilachipe angla e akha e Devleke, gia sar cherde leke purane.

³³ Ta o Faraon o Nekao phangla le ande Ribla katar o Jamat, te na charoil ando Jerusalem. Ta pe zor cherda te pochinel o foro trin milie ta trin stotine kile rup, ta tranda ta trin kile sunakai.

³⁴ Ta o Nekao thoda te charoil e Eliakime chavo katar o Josias. Pharruda o anav katar o Eliakim ta ikharda le Joakim. Ta e Joakaze inllarda le ando Ejipto ta kote mulo.

³⁵ O Joakim pochinda o rup ta o sunakai kai mangela o Faraon, ta te sai pochinel leke, o Joakim phenda e llenenge katar e phuv te pochinen love pe zor. Ta suako lleno katar e phuv pochinda ando rup ta ando sunakai prema e phuv kai saia le. Llinde e love ta pochinde e Nekaoke.

O Joakim charoil ando Juda

³⁶ Kana o Joakim thodape te charoil sea leke bis ta panch burs. Charoisarda ando Jerusalem desuiek burs. Leki dei saia e Zebuda, chorri katar o Pedaias katar e Ruma.

³⁷ Ta cherda o bilachipe angla e akha e Devleke gia sar cherde leke purane.