2 Relles 21 - Biblia ande chib Romani

O Manases charoil ando Juda

¹ Kana o Manases thodape te charoil sea leke desudui burs. Charoisarda ando Jerusalem pinda ta panch burs. Leki dei saia e Jepsiba.

² A o Manases cherda o bilachipe angla e akha e Devleke, soke cherda o gadope kai cherdea e forura kai o Del chudiaia angla e israelitura.

³ Pale vazdia e thana dine e delenge kai o Ezekias peradaia. Vazdia thana te blagosin e Baale ta cherda iek estatua katar e Asera sar cherdaia le o Ajab, charo e Israeleko, ta i blagosisarda e cheraien katar o miloso.

⁴ Vazdia altarura ando cher e Devleko, kai o Del phendaia kai gava cher ka avel dino leke anaveke ando Jerusalem.

⁵ Ta vazdia altarura ande dui bar katar o cher e Devleko te sai blagosin e cheraien e milosoke.

⁶ Ta dia kurbano pe chave ande iag, ta thodape te apogodil. Cherdilo chirimatarko ta cherela chirimate. Gia bilacho saia kai o Del jolailo but.

⁷ Ta i thoda ando cher e Devleko iek estatua katar e Asera kai isto vou cherdaia, a o Del phendaia e Davideke ta leke chaveke e Salomoneke: Me ka thovav ostade mo anav ande gava cher ta ando Jerusalem, o foro kai esvirisardem maskar sa e viche e Israeleke,

⁸ ni ka tradav pale e israelitonen katar e phuv kai diem lenge daden, samo te cherde mi volia ta te cherde sa o sikadipe kai diem len prema sa o zakono kai mo sluga o Moises phenda lenge te kanden.

⁹ A von ni asunde. Ta o Manases cherda te aven mai bilache neko gola forura kai o Del zatrisarda angla e chave katar o israel.

¹⁰ Goleke o Del dia orba pe slugenchar e poraukura, ta phenda:

¹¹ Soke o Manases cherda gachin gadope, ta soke cherdilo mai bilacho neko e amorreura kai sea mai anglal letar, ta soke cherda e Judae te blagosin avere delen,

¹² goleke, me o Del e Israeleko phenav: Me ka cherav gia bari zatrania ando Jerusalem ta o Juda kai kogo ka asunel, zabunime ka achen lenge kan.

¹³ Ka llinav e pole katar o Jerusalem isto e solea kai llindem e pole katar e Samaria, ta ka thovav e plomada katar e familia katar o Ajab. Ka jalavav e foro katar o Jerusalem sargo kana jalaven iek taso ta thoven le telemoia.

¹⁴ Ta ogola llene katar mo foro ka mukav len ande va katar lenge dusmanura, te zatrin len ta te choren lenge ezgode.

¹⁵ Soke cherde o bilachipe angla me akha ta joliarde man, sar kana lenge purane likiste katar o Ejipto llik allive.

¹⁶ Ta na samo kai o Manases cherda e Judae te cheren ezgode bilache angla e akha e Devleke, soke mundarda gachine llenen lache ando Jerusalem kai pherdilo o foro katar lengo rat.

¹⁷ Sa so cherda o Manases, sa e ezgode bilache kai cherda, si pisime ando lil katar so cherde e charura e Judaeke.

¹⁸ Kana mulo prajosarde le ando vostano katar leko cher ando vostano katar o Uza. Mapalal charoisarda pe leko than leko chavo o Amon.

O Amon charoil ando Juda

¹⁹ Kana o Amon thodape te charoil sea leke bis ta dui burs. Charoisarda ando Jerusalem dui burs. Leki dei saia e Mesulemet, chorri katar o Jarus katar o Jotba.

²⁰ A o Amon cherda o bilachipe angla e akha e Devleke gia sar cherda leko dad o Manases,

²¹ soke cherda isto gola ezgode bilache kai cherda leko dad ta blagosisarda e delen kai blagosisarda leko dad.

²² Ta mukla e Devle, o Del katar leke purane, ta ni llelo po drom e Devleko.

²³ E sluge katar o Amon vazdinaile pe lete, ta mundarde e charo ande leko cher.

²⁴ A e llene katar o foro mundarde sa gole llenen kai vazdinaile po charo o Amon, ta thode te charoil pe leko than leke chave e Josiase.

²⁵ Sa so cherda o Amon si pisime ando lil katar so cherde charura e Judaeke.

²⁶ Ta prajosarde le ande leko limori kai saia ando vostano katar o Uza. Mapalal thodape te charoil pe leko than leko chavo o Josias.