2 Relles 19 - Biblia ande chib Romani

O Juda si braduime katar o Senakerib

¹ Kana o Ezekias asunda gala ezgode pharrada pe patave, thodape patave zalosne ta dia ando cher e Devleko.

² Ta bichalda e Eliakime kai arakhela o cher e charoko, e Sebnake o pismiri ta e phuren katar e popura, te llan ande patave zalosne kai o profeta o Isaias chavo katar o Amoz,

³ te phenen leke kai o Ezekias phenel gia: Allive amen sam ande bari patnia ta ande bari duk, sargo iek diskinia kai maladol lake ta inai la zor.

⁴ Daboida te asunda cho gazda o Del sa so phenda o Rabsake, kai o charo katar e Asiria bichalda le te kusel e Devle o llundo bilache alavenchar, kai o Del cho gazda asunda. Goleke molisao pala e llene kai achile.

⁵ E sluge katar o charo o Ezekias llele kai o Isaias,

⁶ ta o Isaias phenda lenge: O Del phenel gia: Na dara katar e alava bilache kai phende mange e sluge katar o charo katar e Asiria.

⁷ Me ka thovav ande le iek duo ta ka asunel bune kai ka cheren le te irilpe kai pi phuv, ta incha ka cherav te mundaren le e jarniea.

⁸ Ta kana irisailo o Rabsakes malada e charo katar e Asiria kai marelape e foroia katar o Libna, soke asunda kai lleloiatar katar o Lakis.

⁹ Ta asunda kai o Tiraka charo katar e Etiopia likistoia te marelpe lea. Ondaka o Rabsakes pale bichalda llenen te phenen e Ezekiaseke gia:

¹⁰ Te na kojavel tut cho Del te phenela chuke kai o Jerusalem ni ka perel ande va katar o charo katar e Asiria.

¹¹ Tu asundan so cherde e charura katar e Asiria avere phuvienge ta sar zatrisarde len. ¿A tu ka bradui tut?

¹² E forura katar o Gozan, o Jaran, o Resef ta e llene katar o Bet Eden kai zivina ande Telasar, kai me purane zatrisarde len, ¿braduisarde len lenge dela?

¹³ ¿Kaitalen e charura katar o Jamat, o Arfad, o Sefarvaim, o Ena ta o Iva?

¹⁴ O Ezekias lia e lila kai ande leke e llene bichalde ta chitisarda len. Mapalal llelo kai o cher e Devleko ta thoda e lila angla o Del.

¹⁵ Ta o Ezekias molisailo e Devleke gia: Devla, o Del e Israeleko kai bese maskar e kerubinura. Samo tu san o Del pe sa e charoine katar o sueto. Tu cherdan o miloso ta e phuv.

¹⁶ Asun man Devla. Putar che akha ta dik. Asun e alava kai o Senakerib bichalda te phenen mange. Sa gale alava kusen tut kai san o Del o llundo.

¹⁷ Istina si Devla, kai e charura katar e Asiria zatrisarde bute phuvien,

¹⁸ ta phabarde lenge delen kastune ta barrustune kai isto e manusa cherde len, goleke zatrisarde len.

¹⁹ Devla amaro Gazda, braduisar amen, me moliv man chuke, te llanen sa e phuvia kai samo tu san o Del.

²⁰ Ondaka o Isaias chavo katar o Amoz bichalda te phenen e Ezekiaseke: Gia phenel o Del e Israeleko: Me asundem cho molipe ta so manglan mandar katar o Senakerib, o charo katar e Asiria.

²¹ Gala si e alava kai phenda o Del katar o charo katar e Asiria: E chei, e chorri katar o Sion, asal peke tutar. Palal pala che zea miskol po soro espurniaia, e chorri katar o Jerusalem.

²² ¿Ka dukhadan? ¿pe ka vazdian cho avazi? ¿ka dukhadan ta kuslan che alavenchar? ¡E Devle o Santo katar o Israel!

²³ E llenenchar kai bichaldan kuslan e Devle, ta phendan: Me but bordonenchar marimake likistem pe burdura po than mai vazdino katar o Libano, ka chinav e sedrura mai bare, e pinura mai sukar. Achilem pe thana kai si mai dur, kai o vostano but sukar.

²⁴ Ande aver phuvia cherdem bunaria ta pilem o pai, ta me porrnenchar sukardem sa e lena katar o Ejipto.

²⁵ ¿A ni llanea kai sema me, o Del, kai cherava sa gala ezgode? Ollikana misliva te cherav len, ta akana cherdem len, goleke tu zatri e forura zidome ta chere len umpa phagipe.

²⁶ E llenen katar gala forura ni saia len zor, darana ta lallana, sea sargo e char ando vos, sargo e char zeleni kai bariol upral pe chera ta sukol mai anglal te bariol.

²⁷ Me llanav sa so chere, llanav kana lla ta kana ave, llanav kai san joliariko pe ma.

²⁸ Ta soke llanav sar jolailan pe mande, ta soke asundem sar fali tut, me ka thovav iek argolla pe cho nak, ta iek salvari pe cho mui, ta ka cherav te iri tut isto katar o drom kai avilan.

²⁹ Ezekias: Gaia si e ezgoda kai ka cherav te dikhe: O purvo burs ta o duito burs tumen ka jan o lliu kai bariol korkorre, a ando trito burs ka thoven e simiche ta ka chiden e septelie, ka barion vostanura drakhake ta ka jan lenge septelie.

³⁰ E llene kai ka achen llunde ando Juda ka barion lenge zile ta ka den septelie.

³¹ Soke nesave ka achen ando Jerusalem, po burdo katar o Sion nesave ka aven braduime. Gua ka cherel le ande po baro volipe o Del kai si le sa e zor.

³² Katar o charo katar e Asiria o Del phenel gia: Ni ka del ando Jerusalem, ni ka chudel ni iek llida, ni ka del po foro eskudonenchar ta ni ka vazdel phurd pe lete.

³³ Katar o drom kai avilo ka irilpe, ni ka del ande gava foro. O Del phenel le.

³⁴ Me ka arakhav gale foro ta ka braduiv le. Ka cherav le pala ma ta pala mo sluga o David.

³⁵ Isto goia riat llelo o suecho e Devleko ta mundarda stotina ta ojtovardes ta panch milie murusen katar o pero e sirionengo. Ta thiarinako rano pe suako rig sea esnage mule.

³⁶ Ondaka o Senakerib charo katar e Asiria irisailo ando Ninive, ta kote achilo.

³⁷ Ta kana blagosila ando cher katar leko del o Nisrok, leke chave o Adramelek ta o Sarezer mundarde le e jarniea ta nasle ande phuv katar o Ararat. Mapalal charoisarda pe leko than leko chavo o Esar Jadon.