2 Relles 16 - Biblia ande chib Romani

O Ajaz charoil ando Juda

¹ Kana nakhle desefta burs sar kana thodape te charoil o Pekaj chavo katar o Remalias, thodape te charoil o Ajaz chavo katar o Jotam ando Juda.

² Kana thodape te charoil o Ajaz sea leke bis burs, ta charoisarda desusov burs ando Jerusalem. A ni cherda so si orta angla e akha e Devleke, sargo leko dad o David,

³ soke cherda e ezgode bilache kai cherde e charura katar o Israel. Dia pe chave kurbano e delenge ta chudia le ande iag, gia sar cherena le e forura kai o Del chudia katar e phuv angla e chave katar o Israel.

⁴ Dia kurbanura e delenge ta phabarda o taimano pe thana vazdine, pe burdura ta telal katar suako baro kas.

⁵ Ondaka o Resin charo katar e Siria, ta o Pekaj chavo katar o Remalias, charo katar o Israel, avile te marenpe e Ajazea ando Jerusalem ta te thovenpe truial katar o foro, ta ni dobisarde le.

⁶ Ande gua vreme o charo katar o Edom pale lia o foro katar o Elat e Edomeke, ta tradia katar o Elat e llenen kai sea katar o Juda. Ta e llene katar o Edom avile te zivin ando Elat, ta kote zivisarde llik allive.

⁷ Ondaka o Ajaz bichalda llenen kai o Tiglat Pileser, charo katar e Siria, te phenen leke gia: Me sem cho sluga, sem sargo cho chavo. Braduisar man katar o charo katar e Siria ta katar o charo e Israeleko kai avile te marenpe manchar.

⁸ O Ajaz lia o rup ta o sunakai kai saia ando cher e Devleko ta o sunakai kai saia ando cher e charoko, ta bichalda le e charoke katar e Asiria.

⁹ Ta o charo katar e Asiria dia te marelpe ando Damasko, ta inllarda phangle e llenen katar o foro ando Kir, ta mundarda e Resine.

¹⁰ Kana o charo o Ajaz llelo ando Damasko te dikhel e Tiglat Pilesere o charo katar e Asiria, dikhla o altar kai saia kote. Ta o Ajaz bichalda e popoke o Urias iek lil kai sikavela sar vazdie gua altar,

¹¹ ta o Urias vazdia iek than altar sar sikavela le o lil. Ta kana irisailo o Ajaz katar o Damasko o altar saia vazdino.

¹² Ta kana o charo avilo katar o Damasko ta diklha o altar, avilo pasa le ta dia kurbanura kote,

¹³ ta phabarda o kurbano ta e septelie dine kai dia, ta chudia pe lende mol ta o rat katar o kurbano pala e pas.

¹⁴ Ta o altar cherdo katar o tuch kai saia angla o cher e Devleko, o Ajaz ikanda le kotar ta thoda le pe rig angluni maskar o altar nevo ta o cher e Devleko.

¹⁵ Ta o charo o Ajaz phenda e Uriaseke te phabarel ando baro altar o kurbano thiarinako ta e ofrende katar e septelie kai denpe pasa racha, ta e kurbanura phabarde ta e ofrende katar e septelie kai del o charo, ta e kurbanura phabarde ta e ofrende katar e septelie ta katar e mol kai del o foro. Ta i phenda leke te chudel po altar sa o rat katar e kurbanura. A o altar tuchno ka avel murno te puchau lea e Devle.

¹⁶ O Popo o Urias cherda sa so phenda leke o charo o Ajaz.

¹⁷ Mapalal o Ajaz chinda e kasta kai sea telal ta ikanda lendar e lellenura, ta i ikanda o baro lelleno kai saia upral pe guruva tuchne ta kai pe lende saia thodo o baro lelleno, ta thoda le pe phuv barrustuni.

¹⁸ Te perel drago e charoke katar e Asiria, o Ajaz ikanda o udar kai cherdea pala o llive sabado, ta ikanda o udar e charoko kai si avri.

¹⁹ Sa so cherda o Ajaz si pisime ando lil katar so cherde e charura e Judaeke.

²⁰ Kana mulo prajosarde le pasa leke dada ando foro katar o David. Mapalal charoisarda pe leko than leko chavo o Ezekias.