2 Relles 10 - Biblia ande chib Romani

O Jeu zatril sa e familia katar o Ajab

¹ E Ajabe sea eftavardes chave ande Samaria. Goleke o Jeu bichalda lila e gazdenge kai sea ando Jezreel, e puranenge ta e llenenge kai sikavena e chaurren katar o Ajab kai sea ande Samaria. Ta ande lila phenela gia:

² Pasa tumende si e chave katar o charo, lenge gra, lenge bordona, lenge boñikura ta ezgode marimake. Goleke kana ka avel tumende gava lil,

³ ikharen o mai lacho ta zuralo katar leke chave te thoven le pe leke dadeko trono. Ta maren tumen pala e familia katar tumaro gazda.

⁴ Iek bari dar peli pe lende ta phende: Te si kai dui charura nasti dobisarde le, ¿sar ka dobi le amen?

⁵ Ondaka o sluga katar o cher e charoko, o gazda katar o foro, e phure ta e llene kai sikavena e chaurren katar o Ajab, bichalde te phenen e Jeueke: Amen sam che sluge ta ka chera sogo ka phene amenge, a ni ka thova nika te charoil. Cher sogo mangea.

⁶ O Jeu pale bichalda lenge iek lil kai phenela gia: Te sen me sluge ta mangen te kanden man, len e sore katar e chave tumare gazdake, ta thiara isto ande gava saiato aven te dikhen man ando Jezreel. E eftavardes chave e charoke sea e llenenchar kai bariarde len,

⁷ goleke kana avilo o lil, chinde e sore katar e eftavardes chaven e charoke. Mapalal thode lenge sore ande kotariche ta bichalde len ando Jezreel.

⁸ Kana o bichaldo avilo kai o Jeu phenda leke: Ande e sore katar e chave e charoke. O Jeu phenda: Thoven len pe dui umpe po udar e foroko. Muken len kote llik thiara.

⁹ Thiarinako o Jeu likisto angla o foro ta phenda: Tumen ni sen dosale. Me sem kai mislisailo te mundarel me gazda ta mundardem le. ¿A ko mundarda gale llenen?

¹⁰ Llanen tumen kai sa so phenda o Del katar e familia e Ajabeki ka cherdol. Isto o Del cherda so phendaia katar o Elias leko sluga.

¹¹ O Jeu mundarda ando Jezreel sa e familia katar o Ajab kai achilea ando Jezreel. Sa leke mai preche llenen, ta sa leke poponen. Niko ni achilo llundo.

¹² Mapalal o Jeu llelo karing e Samaria ta e dromea avilo kai iek cher kai chinen e bal katar e bakre,

¹³ ta kote malada e phlalen katar o Okosias, o charo katar o Juda, ta puchla len: ¿Ko sen tumen? Von phende leke: Amen sam phlal katar o Okosias ta avilam te dikha e chaven e charoke ta e charoinake.

¹⁴ Ondaka o Jeu phenda: Phanden len. Ta e llene katar o Jeu phangle len ta chinde lengi korr pasa iek bunari katar o cher kai chinen e bal katar e bakre. Sea saranda ta dui murusa, ta ni mukle ni iekhe llundo.

¹⁵ Kana o Jeu llelotar kotar, malada e Jonadabe chavo katar o Rekab, ta kana puchla le sar san, phenda leke: ¿Tu misli mandar lachimaia gia sar me misliv tutar? Ta o Jonadab phenda: Gia si. O Jeu phenda: Te si gia de man cho va. O Jonadab dia le po va ta o Jeu phenda leke te likel lea pe leko bordon,

¹⁶ ta phenda leke: Aide manchar ta ka dikhe gachin voliv e Devle. Ta inllarda le pe po bordon.

¹⁷ Ta kana avilo ande Samaria, o Jeu mundarda sa e llenen kai sea katar e familia e Ajabeki kai achilea ande Samaria. Mundarda saurren sar phendaia o Del e Eliaseke.

O Jeu zatril e Baale

¹⁸ Mapalal o Jeu chidia sa e foro ta phenda lenge: O Ajab ni blagosisarda but e Baale, a me ka blagosiv le mai but.

¹⁹ Goleke ikharen sa e porauken, sa e llenen kai blagosin le ta sa e poponen katar o Baal. Te aven sa, soke me ka cherav iek baro kurbano e Baaleke. A o lleno kai ni ka avel, ka merel. A o Jeu kojavela te sai mundarel e llenen kai blagosina e Baale,

²⁰ goleke phenda te chinaven iek llive te aven pe slava e Baaleki.

²¹ O Jeu bichalda llenen pe sa e phuv katar o Israel te ikharen sa golen kai pachana ando Baal. Ta sa avile, ta o cher e Baaleko pherdilo llene.

²² Ondaka o Jeu phenda e slugake kai arakhela e patave te del kai sa e llene patave molimake. Ta o sluga cherda so phenda leke o Jeu.

²³ Ondaka o Jeu ta o Jonadab die ando cher katar o Baal, ta o Jeu phenda e llenenge kai pachana ando Baal: Dikhen te na avel maskar tumende ni iek kai blagosil e Devle, te aven samo gola kai pachan ando Baal.

²⁴ Ta e llene kai pachana ando Baal thodepe te den kurbanura e Baaleke. Ondaka o Jeu thoda truial katar o cher e Baaleko ojtovardes boñikonen, ta phenda lenge: O lleno kai ka mukel te nasel iekhe llene katar gala kai thodem ande tumare va, ka pochinel le pe zivotoia.

²⁵ Ta kana cherde o kurbano phabardo, phenda e boñikonenge kai arakhena ta e gazdenge: ¡Den andre ta mundaren saurren! ¡Te na nasel ni iek lendar! Ta e boñikura katar o Jeu die andre, mundarde saurren ta chudie len kotar. Mapalal die ando than santo katar o cher e Baaleko,

²⁶ ta ikande e estatue kai blagosina len ta phabarde len.

²⁷ Phagle e estatua katar o Baal, ta perade o cher e Baaleko ta cherde len iek than kai chuden e pogastia llik akana.

²⁸ Gia o Jeu zatrisarda katar o Israel e Baale.

²⁹ A o Jeu cherda isto gua bilachipe kai cherela o Jeroboam chavo e Nabateko kai cherda te cherel o bilachipe o Israel, soke o Jeu blagosisarda e guruven sunakune kai sea ando Betel ta ando Dan.

³⁰ O Del phenda e Jeueke: Cherdan so si orta angla me akha, soke cherdan e familiake katar o Ajab sa so phendem. Goleke star porodura katar che chave ka besen po trono e Israeleko.

³¹ A o Jeu ni guruda sa pe liea o zakono e Gazdako o Del e Israeleko, ta ni mukla o bilachipe katar o Jeroboam kai cherda e Israele te cherel o bilachipe.

³² Ande gua vreme o Del cherda te avel mai minoni e phuv katar o Israel, ta o Jazael dobisarda e israelen pe suako rig,

³³ katar o Jordan katar likel o kham, sa e phuv katar o Galaad, o Gad, o Ruben ta Manases. Katar e phuv o Aroer kai si pasa o paiorro o Arnon llik o Galaad ta o Basan.

³⁴ Sa so cherda o Jeu si pisime ando lil katar e ezgode kai cherde e charura katar o Israel.

³⁵ Ta kana mulo o Jeu, prajosarde le ande Samaria ta pe leko than charoisarda leko chavo o Joakaz.

³⁶ O Jeu charoisarda po Israel bis ta ojto burs ande Samaria.