2 Relles 1 - Biblia ande chib Romani

O meripe katar o Okosias

¹ Kana mulo o Ajab, o Moab vazdinailo po Israel.

² Ta o Okosias pelotar katar e penllerava katar po cher kai saia le ande Samaria ta achilo but dukhado, goleke bichalda llenen te puchen e Baal Zebube kai saia o del katar e ekronitura, dal ka sastol o iok.

³ Ondaka o suecho e Devleko phenda e Eliaseke o tisbita: Uste ta lla te malado e llenenchar kai bichalda o charo katar e Samaria, ta phen lenge gia: ¿Ina Del ando Israel kai tumen llan te puchen e Baal Zebube, o del katar o Ekron?

⁴ Ta i te phen lenge kai o Okosias ni ka sastol ta ka merel, soke gia phenda le o Del. Ta o Elias cherda so phenda leke o suecho e Devleko.

⁵ Ta kana e llene irisaile kai o charo, vou puchla len: ¿Soke irisailen?

⁶ Von phende leke: Iek lleno avilo amende ta phenda amenge te iri amen tute te phena chuke: Gia phenel o Del: ¿Inai Del ando Israel kai bichale llenen te puchen e Baal Zebube o del katar o Ekron? Goleke pala so cherdan ni ka uste ios katar chi postelia, soke ka mere.

⁷ Ta o charo puchla len: ¿Sar saia o lleno kai dia orba tumenchar ta phenda tumenge gola alava?

⁸ Von phende leke: Saia iek lleno furiado ande morcha balale ta iek kavisi morchako truial pe leko maskar. Ta o charo phenda: ¡Vou si o Elias tisbita!

⁹ Ondaka o charo bichalda iekhe kapitane kai tala leko va sea pinda boñikura, ta lenchar llelo kai o Elias. Ta kana avile, o Elias besela upral po burdo. Ta o kapitan phenda leke: ¡O charo phenda te fulie kotar!

¹⁰ Ta o Elias phenda e kapitaneke: Te si kai me sem profeta e Devleko te perel iag e milosotar ta te phabarel tut ta che boñikonen. Ta peli iag e milosotar ta phabarda le ta leke pinda boñikonen.

¹¹ Ta o charo bichalda avere kapitane kai tala leko va sea pinda boñikura. Ta o kapitan phenda e Eliaseke: ¡O charo phenda te fulie oma kotar!

¹² A o Elias phenda leke: Te si kai me sem profeta e Devleko te perel iag e milosotar te phabarel tut ta che boñikonen. Ta peli iag e milosotar ta phabarda le ta leke pinda boñikonen.

¹³ Mapalal o charo pale bichalda avere kapitane kai tala leko va sea pinda boñikura. A kana o trito kapitan llelo kai o Elias, dia changenchar angla le ta molisailo leke gia: Me moliv man chuke, na mundar man ta ni gale pinda sluge chire.

¹⁴ Soke e iag phabarda ogole kapitanen ta lenge pinda boñikonen. Te avel chuke zalba amendar.

¹⁵ Ondaka o suecho e Devleko phenda e Eliaseke: Lla lea, na dara. Ta o Elias llelo e kapitanea te dikhel e charo.

¹⁶ Ta kana o Elias avilo kai o charo, phenda leke: Gia phenel o Del: Tu bichaldan llenen te puchen e Baal Zebube o del katar o Ekron, sargo kana ando Israel ni saia o Del. Goleke ni ka uste ios katar chi postelia, soke ka mere.

¹⁷ Ta o Okosias mulo gia sar phendaia le o Del e Eliaseke. Ta charoisarda pe leko than o Joram kana cherela dui burs kai ando Juda charoila o Joram chavo katar o Josafat.

¹⁸ Sa so cherda o Okosias si pisime ando lil katar e charura katar o Israel.