2 Kronikas 9 - Biblia ande chib Romani

E charoina katar o Saba avel te dikhel e Salomone

¹ E charoina katar o Saba asunda katar o Salomon kai saia but pinllardo ta avili ando Jerusalem te puchel le ezgode trudne, te zumavel le. Ta avili ando Jerusalem bute llenenchar ta devenchar kai inllarena merisura, but sunakai ta barra but sukar. Kana avili angla o Salomon te zumavel leko bizaipe, puchla le sa so saia ande lako lio.

² Ta o Salomon llangla sa so puchla le e charoina katar o Saba. Ni saia niso kai vou ni llanela.

³ Kana e charoina katar o Saba dikhla o bizaipe katar o Salomon, ta o cher kai vazdia,

⁴ o jape sukar pe sinia, e sobe katar e gazda, o baripe katar e sluge ta lenge patave, e sluge kai inllarena e tasura, ta o than kai piren upre te den ando cher e Devleko, chudisali but.

⁵ Ta phenda e charoke: So asundem ande mi phuv katar che ezgode ta cho bizaipe, si o chachipe.

⁶ Me ni pachava so phenena mange, a avilem ta me akhenchar dikhlem kai so phende mange ni saia ni dopas katar o bizaipe ta o lachipe kai si tut.

⁷ ¡Blagosime te aven che sluge kai suako drom si pasa tu ta asunen cho bizaipe!

⁸ ¡Blagosime te avel cho Del kai dikhla tut dragostimaia, ta thoda tut charo ando Israel! ¡Soke o Del volil e Israele te zuriavel le ostade, thoda tut charo te sai gazdari orta ta chachimaia!

⁹ Mapalal voi dia e charo trin milie ta inia stotine ta sovardes kile sunakai, but merisura ta barra sukar. Nikada ni saia ando Israel gachin merisura, sargo gola kai e charoina katar o Saba dia e Salomone.

¹⁰ Ta e sluge katar o Jiram ta katar o Salomon kai andea sunakai katar o Ofir, i ande but kotora katar o kas sandalo, ta barra sukar.

¹¹ E kastenchar katar o sandalo, o charo cherda barande ando cher e Devleko ta ando cher katar e charoina. Ta i cherda arpe ta salteriura e llenenge kai llilavena. Nikada ni dikhile golendar kasta ande phuv katar o Juda.

¹² Ta o charo o Salomon dia e charoina katar o Saba sa so mangla voi, ta i dia la mai but neko so voi anda leke. Ta e charoina irisaili kai pi phuv pe slugenchar.

O barvalipe ta e viasta katar o Salomon

¹³ O sunakai kai o Salomon lela suako burs sea bis ta dui milie kile,

¹⁴ bi te llindon e love kai saia te pochinen e llene kai chinena ta bichinena, ta e llene kai radina. E charura katar e Arabia ta e gazda katar e phuv anena sunakai ta rup e Salomoneke.

¹⁵ Ta i o charo o Salomon cherda dui stotine eskudura sunakune, suako iek phariavela sov kile sunakai.

¹⁶ Ta cherda ios trin stotine eskudura sunakune mai minone, suako iek phariavela trin kile sunakai, ta o charo thoda len ando cher katar o vos katar o Libano.

¹⁷ Ta i o charo cherda iek trono katar o marfil, ta marda le ando sunakai mai lacho.

¹⁸ O trono sea le sov eskalonura ta iek estrado sunakuno. Ta pe dui riga katar e stolicha sea le va kai pasa lende sea dui lionura pe porrne.

¹⁹ Ta sea ios desudui lionura pe eskalonura pe dui riga. ¡Nikada ni cherde ande aver phuv iek trono gia sukar!

²⁰ Ta sa e tasura katar o charo o Salomon sea sunakune, ta sa e vasura ta sa e tepsie katar o cher katar o vos katar o Libano, sea sunakune. Niso ni saia rupuno, soke ande llivesa katar o Salomon o rup saia eftino,

²¹ soke e charo sea le llimie katar o Tarsis kai avena iek drom suako trin burs kana avena e sluge katar o Jiram, ta anena sunakai, rup, marfil, maimunura, ta churkura sukar.

²² Gia o charo o Salomon saia o mai barvalo ta o mai bizai maskar sa e charura katar e phuv.

²³ Sa e charura mangena te dikhen o mui e Salomoneko, ta te asunen o bizaipe kai diaia le o Del,

²⁴ ta suako burs anena leke ezgode rupune ta sunakune, patave, ezgode marimake, merisura, gra, ta magarche.

O Salomon chinel ta bichinel bordona ta gra

²⁵ E Salomone sea le star milie thana e grastenge ta e bordonenge, ta desudui milie llene kai llana pe gra. Ta thoda len ande forura kai arakhena e bordona marimake, ta i thoda len e charoia ando Jerusalem.

²⁶ Ta o Salomon gazdarila pe sa e charura katar o Eufrates, llik kai e phuv katar e filisteura ta llik kai e phuv katar o Ejipto.

²⁷ Ta o charo chidia rup ando Jerusalem, gachin sargo e barra, ta te barion e kasta katar o sedro, gachin sargo e simochine ando Sefela.

²⁸ E gra katar o Salomon anena len katar o Ejipto, ta katar sa e phuvia.

O meripe katar o Salomon

²⁹ Sa so cherda o Salomon, ta sa leko bizaipe si pisime ande lila katar o Natan, ande profesia e Ajiaseki katar o Silo, ta ande profesia katar o profeta o Iddo kai phenela o bilachipe katar o Jeroboam, chavo katar o Nabat.

³⁰ O Salomon charoisarda ando Jerusalem pe sa o Israel, saranda burs.

³¹ Ta kana mulo o Salomon prajosarde le ando foro katar leko dad o David. Mapalal charoisarda pe leko than leko chavo o Roboam.