2 Kronikas 4 - Biblia ande chib Romani

E ezgode katar o cher e Devleko

¹ O Salomon cherda iek altar tuchno kai sea le inia pole ando lungipe ta inia pole ando bulipe ta star pole ta dopas llik upre.

² Ta cherda iek baro lelleno paieko tuchno. O lelleno saia sargo iek kolo, ta sea le star pole ta dopas katar iek rig llik kai o ogoia rig. Sea le dui pole ta iek cheperko vazdino. Truial letar saia iek solorro kai sea le desutrin pole ta dopas.

³ Truial katar o lelleno ta telal cherda slike kai dikhona sargo guruva, des suako dui cheperkura, ta sea sargo iek ezgoda e lellenoia.

⁴ Ta o lelleno saia thodo upral pe desudui guruva. Trin lendar dikhena karing o norte, trin karing kai perel o kham, trin karing o sur, ta trin karing kai likel o kham. Lenge porrne palune sea thode andre, ta o lelleno saia thodo upral pe lende.

⁵ O thulipe katar o lelleno sea len star naia ando bulipe. O mui katar o lelleno dikhola sargo iek lulunllin, ta andre resena pe lete sovardes ta sov milie litrura pai.

⁶ Ta i cherda des lellenura paieke tuchne te jalaven andre e ezgode katar e kurbanura phabarde. Panch lellenura pe chachi ta panch po stingo. O lelleno baro saia te jalavenpe e popura.

⁷ Cherda des lampare sunakune prema sar saia te cheren len ta thoda len ando cher e Devleko. Panch pe chachi, ta panch po stingo.

⁸ Cherda des stalia ta thoda len ando cher e Devleko, panch pe chachi, ta panch po stingo. Ta i cherda stotina tasura bare sunakune.

⁹ Cherda e bar katar e popura ta e bar e bari, ta lenge udara marda len ando bronse.

¹⁰ Ta thoda o lelleno baro pe chachi katar o cher e Devleko, pe rig sur katar likel o kham.

¹¹ O Jiram cherda i e kavie, e pale ta e tasura bare. Gia getosarda po rado kai cherda e Salomonoke pala o cher e Devleko.

¹² E dui direkura ta e solorre, e riga kai si upre katar e direkura, e dui ezgode kai lachardea te dikhol sukar pe dui direkura, e dui mreze te ucharen e riga vazdine,

¹³ e star stotine phabaia pe dui mreze ande dui sive kai ucharena e riga vazdine kai sea upral pe direkura,

¹⁴ e des riga, e des lellenura kai sea upral pe lende,

¹⁵ o lelleno paieko baro kai telal sea e desudui guruva,

¹⁶ e kavie, e pale ta e beliuske, sa e ezgode kai o kovachi o Jiram cherda e charoke o Salomon pala o cher e Devleko sea cherde katar o tuch mai lacho.

¹⁷ Bilada len pe chisai maskar e forura o Sukot ta o Seredeta, ande umalia katar o Jordan.

¹⁸ O Salomon cherda sa gala ezgode, gachin kai ni llanena o pharipe katar o tuch.

¹⁹ Ta o Salomon phenda te cheren e ezgode kai sea ando cher e Devleko. O altar sunakuno, e stalia kai pe lende thovena o marrno chinado e Devleke,

²⁰ e lampare sunakune kai sea angla o than santisimo, te phabaren len sar saia phendo te cheren le.

²¹ E lulunlla, e lampare ta e beliuske cherde len katar o sunakai mai lacho.

²² E kliastura, e tasura, e rroia ta e braserura minone katar o taimano sea sunakune. Ta o udar katar o cher saia sunakuno, ta i e udara katar o than santisimo kai sea andre, ta e udara katar o cher e Devleko sea sunakune.