2 Kronikas 3 - Biblia ande chib Romani

O Salomon vazdel o cher e Devleko

¹ O Salomon thodape te vazdel o cher e Devleko ando Jerusalem po burdo o Moria, kote kai sikadaia o Del e Davideke po than kai lacharda le o David, kote kai morela o lliu o Ornan jebuseo.

² Ta o Salomon thodape te vazdel o cher e Devleko ando duito llive katar o duito chon, ando burs starto kai charoila.

³ E barra kai o Salomon thoda telal katar e zidura e chereko sea len bis ta efta pole ando lungipe, ta inia pole ando bulipe.

⁴ O udar kai saia anglal sea le inia pole ando lungipe sargo o bulipe e chereko, ta inia pole llik upre. Ta andral cherda le sa mardo ando sunakai lacho.

⁵ Ta thoda kasta katar o pino marde ando sunakai lacho upre ando than mai baro katar o cher, ta thoda te cheren pe lende palmere ta lanchura.

⁶ Ta thoda po cher kotora katar e barra but sukar. O sunakai kai thode saia katar o Parvaim.

⁷ Marda ando sunakai o cher andral, e direkura, e udara, e zidura, ta cherda kerubinura pe zidura.

⁸ Ta cherda o than santisimo kai saia le ando lungipe inia pole prema o bulipe kai saia anglal katar cher, ta inia pole ando bulipe. Mapalal marda le ande bis milie kile sunakai lacho.

⁹ E kafra sunakune phariavena panch stotine gramura suako iek. Ta i e sobe kai sea upral marda len ando sunakai.

¹⁰ Ta cherda dui kerubinura andre katar o than santisimo, ta marda len ando sunakai.

¹¹ O lungipe katar lenge pakha sea inia pole. Iek katar e pakha kai sea la dui pole ta iek cheperko, dodila o zido katar e soba, ta ogoia phak kai saia la isto gua lungipe, dodila e phak katar o gua kerubin.

¹² Isto gia iek phak katar o gua kerubin, kai saia sargo ogola pakha, dodila o zido katar e soba, ta ogole phakhaia dodila e phak katar aver kerubin.

¹³ E pakha inzarde katar e kerubinura sea len inia pole ando lungipe. Von sea pe porrne ta dikhena kai e soba mai bari.

¹⁴ Ta i cherda iek kortina katar o chiti vuneto, purpura, lolo, ta lino, ta suvde pe lende kerubinura.

E dui direkura

¹⁵ Angla o cher cherda dui direkura kai lenge pole sea desusov llik upre suako iek. E riga kai si chak upre, sea len dui pole ta iek cheperko.

¹⁶ Ta cherda lanchura ando santuario ta thoda len pe riga katar e direkura kai si chak upre. Cherda stotina phabaia kai thoda len ande lanchura.

¹⁷ Thoda direkura angla o cher, iek pe chachi ta aver po stingo. O direko kai sai pe chachi ikharda le Jakin, ta o direko kai saia po stingo ikharda le Boaz.