2 Kronikas 2 - Biblia ande chib Romani

O Salomon achel po alav e Jiramea, o charo katar o Tiro

¹ Ondaka o Salomon phenda te vazdel iek cher e Devleke, ta iek cher e charoinako.

² Goleke thoda eftavardes milie llenen kai inllaren o pharipe, ta ojtovardes milie llenen te anen e barra katar e burdura, ta trin milie ta sov stotine llenen te arakhen len.

³ Mapalal o Salomon bichalda te phenen e Jirameke, o charo katar o Tiro: Cher manchar gia so cherdan me dadea e Davidea, kai dian le kasta katar o sedro te sai vazdel peke iek cher.

⁴ Me ka vazdav iek cher e Devleke te blagosiv le, te dav le liubao ande merisura phabarde, te thovav marrno dino angla le suako drom, ta te dav le kurbanura thiarinako ta pasa racha. Ta i ande llivesa kana ni radin, kana si mesechina, ta ande aver slave Devlikane, kai ostade ka cheren len ando Israel.

⁵ Ta o cher kai si man te vazdav morabi te avel baro, soke amaro Del si o mai baro katar sa e dela.

⁶ ¿A ko sai te vazdel leke iek cher, kana o miloso kai si but baro nasti resel leke? ¿A ko sem me te vazdav leke cher makar te avela samo te phabaren o taimano?

⁷ Bichal mange iek lleno kai llanel te radil ando sunakai, ando rup, ando tuch, ando sastri, ta ande chitura lole ta vunete. Te llanel te cherel ezgode sukar pe zidura. Ka pomozin le e llene kai thoda len mo dad o David, von si ando Juda ta ando Jerusalem. Von llanen te cheren po rado, ta radin mange.

⁸ Bichal mange kasta katar o Libano, sedro, sipres, ta sandalo, soke che sluge llanen te chinen kasta katar o Libano. Me sluge ka pomozin len,

⁹ te chiden but kasta, soke o cher kai ka vazdav ka avel but baro ta but sukar.

¹⁰ Me diem e llenenge kai chinen e kasta, star millonura ta star stotine milie litrura katar o lliu, star millonura ta star stotine milie litrura katar e sebada. Star stotine ta saranda milie litrura katar e mol, ta star stotine ta saranda milie litrura katar o zeitino.

¹¹ Ondaka o Jiram, o charo katar o Tiro, bichalda iek lil e Salomonoke kai phenela gia: O Del thoda tut o charo katar e israelitura, soke volil pe foro.

¹² Ta i phenela: ¡Blagosime te avel o Del e Israeleko, kai cherda o miloso ta e phuv, ta kai dia e charo e Davide iek chavo gia bizai ta llanglo, kai bizaimaia cherel e ezgode ta kai ka vazdel iek cher e Devleke, ta aver cher vou peke te charoil!

¹³ Me bichalav chuke iekhe llene kai llanel te radil ta si llanglo: O Jiram Abi.

¹⁴ Vou si chavo katar iek diskinia katar e vicha e Daneki, a leko dad si katar o Tiro. Vou llanel te radil ando sunakai, ando rup, ando tuch, ando sastri, ande barra, ande kasta, ta ande chitura lole ta vunete. Ta llanel te cherel sogo mangen letar che llenenchar kai pomozin len, ta e llenenchar katar mo gazda o David, cho dad.

¹⁵ Goleke mo gazda, bichal che slugenge o lliu, e sebada, o zeitino ta e mol, kai phendan kai ka bichale.

¹⁶ Amen ando Libano ka china e kasta kai ka trubul tut, ta ka ana len ande llimie llik kai o Jope, a tu ka inllaren len ando Jerusalem.

¹⁷ Ta o Salomon llinda sa e murusen kai sea katar aver phuvia kai zivina ando Israel mapalal katar po dad o David, ta sea stotina ta pinda ta trin milie ta sov stotine.

¹⁸ Ta thoda lendar eftavardes milie te inllaren pharipe, ojtovardes milie te ikanen barra katar e burdura, ta trin milie ta sov stotine llenen te cheren te radin e llenen katar o foro.