2 Korintios 9 - Biblia ande chib Romani

¹ A inai soke te pisiv tumenge ios katar so si te chidiniaol e phlalenge ando pachape,

² soke llanav kai tumen mangen te pomozin ta suako drom phenav e phlalenge kai si ande Masedonia kai tumen kai sen katar e Akaia, cherel burs llive mangen te pomozin, ta sa e phlal katar e Masedonia lie zor tumendar ta i von mangle te pomozin.

³ Me bichalav tumenge gale phlalen te sai den tumen zor, von ka pomozin tumen te lacharen sukar gaia buchi, ta gia ka dikhol kai saia chachuno baripe kai cherdam ande tumende.

⁴ Mislin tumen savo lallao sai nakhaia amen ta i tumen te avena manchar nesave llene katar e Masedonia ta te dikhen kai tumen ni chidien niso.

⁵ Goleke avila mange sukar te mangav katar gala phlal te llan te dikhen tumen mai anglal neko me te pomozin tumen ande gaia buchi, ta von ka thovenpe tumenchar te chiden, soke tumen dien tumaro alav kai ka cheren le. Ta gia tumen ka sikaven kai den veselimaia ta volimaia ta kai ni cheren le pe zor.

Da veselimaia

⁶ Na bristaren tumen katar gava: O lleno kai del cherricha, ka lel cherricha, a o lleno kai del but, ka lel but.

⁷ Suako lleno morabi te del so thoda ande po lio te del, na tristomaia o pe zor, soke o Del volil gole llene kai del veselimaia.

⁸ O Del sai del tumen but ezgode, gia te sai avel tumen sa so trubul tumen, ta i mai but. Ta gia sai ka pomozin averen.

⁹ Soke o Pisipe phenel gia: Fulada ta dia but e chorren, ta leko volipe ka achel ostade.

¹⁰ O Del kai del e simicha e llene kai thovel la ande phuv, ta kai del o marrno gole kai jal le, ka del tumen sa so trubul tumen ta ka cherel suako drom te avel tumen ios mai but, te sai pomozin averen.

¹¹ Gia tumen ka aven barvale ande suako ezgoda te sai pomozin, ta kana ka chiden gola love amen ka inllara len, ta gia e phlal ka den fala e Devle.

¹² Soke kana tumen ka pomozin e phlalen ando pachape inai samo te inllara lenge so trubul len, amen galea ka inllara len te den fala ta but fala e Devle.

¹³ Gava so tumen cherden kai pomozisarden len, ka sikavel kai tumen pachaien ande lachi viasta e Kristoki ta kai kanden gola alava, goleke von ka blagosin ta ka den liubao e Devle.

¹⁴ Ta i ka molinpe pala tumende volimaia, pala o baro volipe kai o Del sikada tumenge.

¹⁵ ¡Fala e Devleke kai dia amen gia baro lachipe kai inai amen alava te sai phena le!