2 Korintios 8 - Biblia ande chib Romani

Soke morabi te pomozi

¹ Akana phlalalen manga te phena tumenge sar sikadilo o volipe e Devleko ande khanllira katar e Masedonia.

² Gala khanllira nakhle bare dukha, ta isto gia von si but vesele. Von si but chorre, a die sargo kana von sea barvale.

³ Chachimaia phenav tumenge kai von die sa so sai dena, ta i mai but. Ta ni cherde le pe zor, soke isto von mangle te cheren le.

⁴ Ta molinape amenge te muka i len te pomozin e llenen kai si katar o foro e Devleko.

⁵ Von cherde mai but neko so uzdia amen kai ka cheren, soke isto von mai anglal diepe e Gazdake ta mapalal amenge. Gale ezgodaia cherde so o Del mangela lendar.

⁶ O Tito saia o lleno kai mai anglal thodape te chidel maskar e llene te pomozin averen. Goleke manglam letar te llal angle gale radoia.

⁷ Tumen sen lache pe suako ezgoda: si tumen iek pachape zuralo ando Del, den orba sukar, llanen but, si tumen but zor te radin averenge, ta tumen volin amen but. Akana morabi te aven e mai lache te pomozin averen pe gaia buchi.

⁸ Me ni phenav kai morabi te kanden man. So me mangav si te llanen sar ogola khanllira thovenpe te pomozin, ta gia i tumen te sikaven kai tumaro volipe si chachuno.

⁹ Tumen llanen kai amaro Gazda o Jesukristo, pala o volipe kai si le pala tumende cherdilo chorro kana vou saia barvalo, ta gia cheres leko chorripe tumen te cherdon barvale.

¹⁰ Me phenav so misliu man katar gaia ezgoda pala tumaro lachipe. O burs kai nakhlo tumen sena e llene kai mai anglal dien ta cherden le veselimaia.

¹¹ Getosaren so thoden tumen te cheren, ta cheren le isto e veselimaia kai saia tumen mai anglal, ta suako lleno te del prema so sai del.

¹² Soke te si vareko kai chachimaia mangel te pomozil, o Del lel letar so vou dia soke dia prema so si le. Soke o Del ni mangel so e manuse inai.

¹³ Me ni phenav te pomozi averen, a tumen te trubul tumen, e orba si te avel saurren.

¹⁴ Akana kai si tumen but morabi te pomozin golen kai si len cherricha, a sai avelpe kai mai angle len ka avel but ta von ka pomozin tumen, ta gia ka avel saurren.

¹⁵ Gia sar phenel ando Pisipe: Gua kai chidia but ni avila le mai but, a gua kai chidia cherricha ni avila le mai cherricha.

E llenen kai bichalda o Pablo

¹⁶ Fala e Devleke kai thoda ando lio e Titoko isto goia briga kai si man cheres tumende.

¹⁷ Ta cherda so phendem leke soke brigilpe pala tumende, ta akana llal isto vou petar soke mangel te dikhel tumen.

¹⁸ Bichalav e Titoia iekhe phlale kai sa e khanllira den leki orba pala o rado gia sukar kai cherda te bariarel e lachi viasta.

¹⁹ Ta i e khanllira esvirisarde le te llal amenchar te inllara so chidiam, ta gale buchaia da liubao amare Gazda ta sikava kai manga te pomozi.

²⁰ Goleke ni kamam niko te del orbe bilache amendar pala so amen chidiam.

²¹ Goleke thodam amen te chera o lachipe angla o Gazda ta i angla e manusa.

²² Ta lenchar bichalav tumenge avere phlale kai sikada amenge pe but ezgode kai si chacho ta mangel te pomozil, ta mai but akana kai si le gia bari vera ande tumende.

²³ Katar o Tito sai phenav kai llal manchar ta e dui radi te sai pomozi tumen. Ta den tumen golli kai ogola dui phlal bichalde len e khanllira, ta von blagosin e Kristo.

²⁴ Goleke sikaven lenge kai volin len chachimaia te sai llanen le e khanllira ta te llanen kai si amen, soke te chera baripe ande tumende.