2 Korintios 7 - Biblia ande chib Romani

¹ Goleke phlalalen, soke o Del dia amen po alav ande gala orbe, morabi te acha jalade katar sa so sai meliarel amari esnaga ta amaro duo, ta ande dar e Devleki te thova amen te ava sante.

E llene katar o Korinto veselin e Pablo

² ¡Cheren amenge iek than ande tumare lie! Soke nikake ni cherdam o bilachipe. Ni dukhadam nika, ta nika ni kojadam.

³ Ni phenav gala ezgode te dosarav tumen, me mai anglal phendem tumenge kai tumen sen ande mo lio, ni o meripe ni ka achavel amen te voli tumen.

⁴ Me dav tumenge orba chachimaia, tumen sen mo baripe, ande sa gaia patnia kai nakha sem but veselo cheres tumende.

⁵ Sar kana avilam ande Masedonia ni achilam te chiniva, soke nakha bari patnia ta ande amaro lio si iek bari dar.

⁶ A o Del kai del e zor e llenen kai inai len vlaga, dia amen e zor kana avilo o Tito,

⁷ ta na samo kai avilo, soke vou but veselisailo cheres tumende. Vou phenda amenge kai tumen zelin te dikhen amen, ta phenda amenge kai si tumenge but zalba ta kai sen but brigime mandar, kana asundem gala orbe ios mai but veselisailem.

⁸ O lil kai pisisardem tumenge tristosarda tumen, ta ni dukhal man kai pisisardemle. Mai anglal tristosarda man, soke llanglem kai gua lil tristosarda tumen nesavo vreme,

⁹ akana veseliu man na pala o tristope kai avila tumenge, soke gua tristope cherda te irin tumen kai o Del. Gua tristope avila katar e volia e Devleki, goleke amen ni dukhadam tumen,

¹⁰ soke o tristope kai avel katar e volia e Devleki inllarel amen te pharrudiva ta braduil amen, a o tristope gale zivotoko so del si o meripe.

¹¹ Tumaro tristope avel katar e volia e Devleki, ¡dikhen so cherda tumenchar! cherda te istaren gala ezgode chachimaia, ta te den orbe lache mandar, cherda tumen te joliaon, ta i te daran. Ta pala gala ezgode sena zelne te dikhen man ta dukhaden gole llene kai saia dosalo, ta sa gale ezgodenchar kai cherden sikaden kai ni saia pe tumende nisavi dos ande gala ezgode.

¹² Goleke, kana pisisardem tumenge gua lil, me ni misliva man ande gua lleno kai pe orbenchar dukhada, ni ande gua kai achilo dukhado gole orbenchar, so me mangava saia te sai dikhol angla o Del kai sen brigime pala amende.

¹³ Gala ezgode cherde te acha vesele, a o Tito si but veselo soke tumen pomozisarden le te llal angle. Ta gaia ezgoda ios mai veselisarda amen.

¹⁴ Me phendema e Titoke kai sema but veselo cheres tumende, ta me ni achilem ando lallao soke sa so phendam e Titoke saia o chachipe isto gia sar si o chachipe so phendam tumenge.

¹⁵ A o Tito ios mai volil tumen kana delpe golli sar kandena le kana phenela tumenge vareso, ta i kana avilen lea pachivale ta dien le gia baro liubao.

¹⁶ Sem but veselo soke sai avel man gia bari vera ande tumende.