2 Korintios 12 - Biblia ande chib Romani

O Pablo dikhel ezgode Devlikane

¹ Niso ni mol iekhe lleneke te falil vou pe angla aver. A me morabi te phenav tumenge cheres e ezgode Devlikane kai sikada mange o Gazda.

² Pinllarav iekhe llene kai llal pala o Kristo ta cherel desustar burs kai inllarde le kai o trito miloso. Ni llanav dal inllarde le ande esnaga o ando duo, gua o Del llanel.

³ Ta llanav kai gua manus ande esnaga o ando duo, samo o Del llanel le,

⁴ avilo inllardo ando paraiso, ta kote asunda alava gia gurudine kai ni muken nisave manuse te phenel len.

⁵ Me ande iek lleno gia sai faliu man, a na me mandar, soke me samo sai dav orba katar mo kovlipe.

⁶ A me te mangava te faliu man, gua ni avela ni iek dilipe soke phenava o chachipe, a me ni cheraule te na mislilpe niko mandar mai but neko so sem o so phenav,

⁷ cheres e ezgode Devlikane kai sikada mange o Del. Ta te na pherdivav baripe, avila mange iek patnia sargo iek karrno ande mi esnaga, iek karrno bichaldo katar o Satanas te dukhavel man.

⁸ Ta trin droma molisailem e Gazdake te lel mandar gaia patnia,

⁹ a o Gazda phenda mange: Tut trubul samo mo volipe, soke mi zor sikadol ando kovlipe. Goleke mange si mai sukar te faliu man ande mo kovlipe, gia te avel pe mande e zor e Kristoki.

¹⁰ Goleke veseliu man kai sem kovlo, kai kusen man, kai inai man so trubul man, kai mangen te maren man, ta i katar e bari patnia kai nakhav pala o Kristo, soke kana mai kovlo sem, ondaka si kana mai zuralo sem.

¹¹ Akana cherdem me man sargo iek dilo ta tumen cherden te cherav le. Soke tumen saia te den orbe lache mandar, soke pe ni iek ezgoda sem mai tele neko gola bare apostolura. ¡Ta gua kai man ni mol man niso!

¹² E bari patnia kai terpisardem esmiro, e bare ezgode Devlikane kai tumen dikhlen, gola si e ezgode kai sikaven kai me sem iek chachuno apostol.

¹³ Prostin man te dukhaden tumen, samo pe iek ezgoda tumen sena mai tele neko ogola khanllira: ¡soke ni pomozisarden man!

O Pablo phenel kai pale ka llal te dikhel len

¹⁴ Me lachardem sa te llau te dikhav tumen e trito drom, ta ni akana ni ka mangav tumendar te pomozin man. Me ni rodau so si tumen, so me rodau si isto tumen, soke e dada si kai morabi te roden love pe chaurrenge, a na e chaurre pe dadenge.

¹⁵ Me ka dav sa so si man, ta isto me man pala tumaro lachipe. Me voliv tumen but ¿A soke tumen volin man gia cherricha?

¹⁶ Tumen llanen kai me ni sema iek pharipe tumenge. A si nesave llene kai phenen kai me bizaimaia cherdem tumen te peren ande iek kojaipe.

¹⁷ A so, ¿kojadem tumen e llenenchar kai bichaldem tumenge?

¹⁸ E Titotar manglem te llal te dikhel tumen, ta lea bichaldem ogole phlale. A so ¿o Tito mangla vareso tumendar? O Tito ta me phirdam ande iek duo tumenchar.

¹⁹ A sai avelpe kai tumen mislin kai amen manga tumendar te prostin amen, a gava inai gia. Amen da orba angla o Del ta sam llene e Kristoke, ta sa gala ezgode si te sai barion ando pachape.

²⁰ Mi dar si kai kana ka llau te dikhav tumen ni ka aven sar me voliva te aven, ta ni tumen te na dikhen man sar tumen volina te dikhen man. Darav te na malavav maskar tumende brasnia, armaia, joli, bune, baripe, ta bilachipe.

²¹ Ta i darav kai kana ka llau tumende, o Del sai cherel te avel mange lallao tumendar, soke cherel but vreme kai tumen cheren o bilachipe, ta sai cherel man te rovav pala but llene tumendar kai ni muklem o bilachipe, ta ni o kurvaluko ta e ezgode bilache kai cheren.