1 Timoteo 5 - Biblia ande chib Romani

Sar morabi te ave saurrenchar

¹ Na thov tut silno iekhe phurea. De lea orba te sikol ta cher le sargo kana de orba che dadea ta de orba e ternenchar sargo che phlalenchar.

² A e phuriorrenchar morabi te den orba sargo kana si tumari dei; a e diskinie kai si terne, dikhlen sargo kana si che phiorra.

³ Pomozisar e phivlien kai inai len kate te llan te pomozin len.

⁴ A iek phivli te si la chaurre o unukura, von si te sikon te sai pomozin pe familia, soke i voi len pomozisarda, gava si drago e Devleke.

⁵ E chachuni phivli si goia kai achili korkorre ta kai laki vera si ando Del ta mangel letar ta molilpe ollivesea ta orachaia.

⁶ A e phivli kai si ando kurvaluko, lako zivoto si mulo.

⁷ Ta sikau len i gala ezgode, te na dosarel len niko.

⁸ Soke o lleno kai ni brigilpe katar pire llene, ta mai but katar pi familia, golea phenel kai inai le pachape ta si mai bilacho neko e llene kai ni pachan.

⁹ E phivlien kai tumen morabi te pomozin si gola kai si lenge mai but katar e sovardes burs ta kai avila len samo iek rrom.

¹⁰ Si te aven pinllarde kai cheren o lachipe, kai llangle te bariaren pe chaurren, kai avile pachivale e llenenchar kai den ande lako cher, kai jalade e porrne e llenenge kai si katar o santo foro, kai pomozisarde e llenen kai nakhen nuzde, ta kai llangle te cheren suako lachipe.

¹¹ A na thov te pomozil e khanlliri e phivlien kai si mai terne, soke von kana nakhel o vreme so lenge si drago ka cherel len te durion katar o Kristo, ta pale ka mangen te zininpe

¹² ta si dosale, soke ni cherde so phende.

¹³ Ta ni cheren niso, sorro llive ta llan cher cherete ta ni radin; ta inai samo kai ni radin, inllaren bune, ta aminpe ande suako ezgoda ta den orbe kai ni trubul te den.

¹⁴ Goleke mangav te zininpe e phivlia kai si terne te aven len minone, te radin ande po cher ta gia e llene kai ni pachan ni ka avel len te sai dosaren amen.

¹⁵ Soke nesave phivlia durile katar o Kristo ta llele pala o Satanas.

¹⁶ Varesavi diskinia kai pachal ando Jesus ta te si la phivlia ande laki familia, morabi te pomozil len te na aven iek pharipe e khanllirake, ta gia e khanlliri sai ka pomozil ogole phivlien kai chachimaia inai len katar te mangen.

¹⁷ E phure kai gazdarin sukar ande khanlliri trubul te volin len dui droma mai but, ta mai anglal e llenen kai lengo rado si te den orba e Devleki ta kai sikaven.

¹⁸ Soke o Pisipe phenel gia: Muk e guruve te jal kana ustavel o lliu te trebol le. Ta phenel i gia: O lleno kai radil trubul te pochinen leke.

¹⁹ Na thov sama kana ka dosaren iekhe phure te na avena dui o trin llene kai dikhle so vou cherda.

²⁰ Gola kai pale si ando bilachipe, morabi te de pe lende angla sa, te sai daran i ogola llene.

²¹ Mangav tutar angla o Del, ta angla o Jesukristo, ta angla e suechura kai si esvirime, te kande gala alava ta te ave chacho saurrenchar, na samo e llenenchar kai si chuke drago.

²² Mislisao dui droma te mangea te thove che va pe vareka te moli tut, te na ave ande iek than ande avereko bilachipe. Morabi te ave chisto katar suako bilachipe.

²³ Soke but droma nasuao katar cho lli, na pi samo pai, pi i iek zalogicha mol.

²⁴ O bilachipe nesave llenengo dikhol mai anglal te cherdol e kris, a averengo bilachipe dikhol mapalal.

²⁵ Isto gia, e lache ezgode kai cherdon dikhon bristomaia, ta gola kai inai lache nasti ka achen gurudine ostade.