1 Timoteo 4 - Biblia ande chib Romani

O sikadipe kojamno

¹ A o Duo phenel bristomaia kai ande llivesa kai si te aven mai angle, nesave llene ka muken o pachape ta ka thoven sama e duonenge kai si kojamne ta e sikadimake kai avel katar e llavolura.

² Ka pachan e llenen kojamnen kai inai lenge lallao katar o bilachipe kai cheren.

³ Gala llene ni muken te zininpe ta ni te jan nesavo jape kai o Del mukla e llenenge kai pachan ta e llenenge kai pinllaren o chachipe ta kai den fala pala gua jape.

⁴ Soke sa so cherda o Del si lacho, ta morabi te na muka te diam fala e Devle,

⁵ soke o alav e Devleko ta o molipe cheren le chisto.

⁶ Sikau gala ezgode e phlalen, ta ka ave iek lacho sluga katar o Kristo Jesus iek lleno kai sikol katar e alava e pachamake ta katar o lacho sikadipe kai tu sikilan ta kande.

⁷ A muk pe iek rig e paramiche e suetoke kai si dile, ta thov tut te chere o lachipe.

⁸ Soke o rado kai cheren e llene te sai zuriaol e esnaga ta te avel sasti si lacho e esnagake, a o volipe si lacho varesave ezgodake soke del amen o lachipe ande gava zivoto ta i ande o gua zivoto kai ka avel mai angle.

⁹ Ta gava si iek chachipe but baro, ta sa morabi te pachan le.

¹⁰ Ta pala gava radi ta trudi amen, soke amari vera si ando Del o llundo kai braduil saurren, ta mai but e llenen kai pachan.

¹¹ Sikau gala ezgode, ta phen saurrenge te kanden len.

¹² Na muk nika te phenel kai ni mol tut pala cho ternipe. E llene kai pachan morabi te sikon tutar sar de orba ta sar san, sar voli, sar pacha, ta sar si cho pachape ando Del.

¹³ So me llav incha tute thov tut te chiti o Pisipe e phlalenge kai si ando pachape de len zor ta sikav len.

¹⁴ Arak o lachipe kai o Del dia tut kana e phure thode pe va pe cho soro ta molisaile.

¹⁵ Cher gala ezgode ta le sama lendar te sai dikhen e llene kai suako llive cherdo mai lacho.

¹⁶ Arak so chere ta so sikave averen, ta lla orta ande sa gala ezgode. Te cherdan gia, ka bradui tu tut ta i golen kai asunen tut.