1 Timoteo 3 - Biblia ande chib Romani

¹ Gaia ezgoda si but chachi. Vareko te mangela te avel le iek rado te gazdaril ande khanlliri, iek lacho rado mangel.

Sar morabi te aven e llene kai gazdarin ande khanlliri

² Goleke, o lleno kai si le gava rado morabi te avel iek lleno kai niko nasti dosarel le katar nisavi ezgoda bilachi. Morabi te avel le samo iek rromi, te cherel e ezgode chachimaia, bizaimaia ta te avel le liubao. Morabi te avel pachivalo e llenenchar kai aven te racharen lete, morabi te llanel te sikavel.

³ Morabi te na avel matarno, ni te avel leke drago te marelpe, morabi te avel posteno, te na avel silno ta leki briga te na avel samo e love.

⁴ Morabi te llanel te gazdaril ande po cher ta te sikavel pe chaurren te kanden ta te avel len liubao.

⁵ Soke o lleno kai ni llanel te gazdaril ande po cher ¿Sar ka arakhel e Devleki khanlliri?

⁶ Goleke, o lleno kai gazdaril ande khanlliri nasti avel iek lleno nevo ando pachape, soke sai pherdol baripe ta sai perel isto ande dos kai pelotar o llavolo.

⁷ Ta morabi te den le liubao i maskar e llene kai ni pachan, te na perel ando lallao ta te na kojavel le o llavolo.

Sar morabi te aven e diakonura

⁸ Ta isto gia e diakonura morabi te aven chache, te cheren so phenen kana den po alav, te na aven matarne te na aven zelne pe love kai lenpe bilachimaia.

⁹ Morabi te na muken o chachipe kai si sikado amenge ande lachi viasta ta te mislin chistomaia.

¹⁰ Mai anglal morabi te nakhel o vreme te dikha sar radin ta mapalal te na avile dosale katar niso, ondaka sai ka aven diakonura.

¹¹ Ta i e diskinie morabi te avel len liubao, te na inllaren e bune, te aven traze ta te aven chache pe suako ezgoda.

¹² O diakono morabi te avel le samo iek rromi, ta te llanel te gazdaril pe chaurren ta ande po cher.

¹³ Soke e diakonura kai ka cheren po rado sukar, but lachi orba ka den lengi ta ka zivin esmiro, soke pachaie ando Kristo Jesus.

O baro chachipe

¹⁴ Mangav te llau te dikhav tut; a pisiv chuke gava lil

¹⁵ te na avilem oma, gia ka llane sar morabi te zivil o manus ande Devleki familia, kai si e khanlliri katar o Del o llundo, e khanlliri kai istarel ta arakhel o chachipe.

¹⁶ Chachimaia so si amenge sikado ande amaro pachape, si iek ezgoda but bari. O Kristo sikadilo sargo manus llindo chacho ando duo e suechura dikhle le. Leki orba phendili maskar e phuvia, o sueto pachaia ande lete ta inllardo saia ando miloso bare blagosimaia.