1 Samuel 9 - Biblia ande chib Romani

O Saul malavel e Samuele

¹ Saia iek lleno but tromano ande vicha katar o Benjamin kai ikhardola Kis. Vou saia chavo katar o Abiel ta leko papo saia o Seror, leko para papo saia o Bekorat, chavo katar o Afiaj.

² E Kise saia le iek chaurro kai ikhardola Saul. O Saul saia terno ta but sukar, niko ando Israel ni saia gia sukar sargo vou, ta niko ni saia mai baro neko vou.

³ O Kis jasarda pe magarche ta phenda e Sauleke: Inllar tuia iek sluga ta lla te rode e magarchen.

⁴ Ta o Saul llelo po burdo katar o Efrain, ta kotar kai e phuv katar e Salisa ta ni malade e magarchen. Mapalal llele ande phuv katar o Saalim ta o Benjamin, ta ni malade len.

⁵ Kana avile ande phuv katar o Zuf, o Saul phenda pe slugake: Mai sukar iri amen, sai te avelpe kai mo dad akana ni brigilpe pala e magarche ta samo brigilpe pala amende.

⁶ O sluga phenda leke: Ande gava foro si iek lleno e Devleko ta sogo phenel kai ka nakhel, nakhel isto gia sar phenda le. Aide lete, soke sai te avelpe kai vou ka phenel amenge kaitalen e magarche.

⁷ O Saul phenda: Aide, ¿a so ka inllara gole lleneke? Soke o marrno kai andam getosailo, ta inai amen niso so te da gole llene e Devleko. ¿So si amen?

⁸ Ondaka o sluga phenda: Mande si iek tolarichi rupuno. Ka dav le kai gua lleno e Devleko te sai pomozi amen.

⁹ Omanglal suako lleno katar o Israel kai llala te puchel e Devle, phenela gia: Aide kai o lleno kai dikhel so ka avelpe. Soke gia ikharena e llenen kai akana ikharen len profeta.

¹⁰ Ta o Saul phenda pe slugake: Ea, aide incha. Ta von llele ando foro kai zivila o lleno e Devleko.

¹¹ Ta kana von likena po burdo katar o foro, dikhle nesave chorren kai llana te anen pai, ta von puchle len: ¿Kai si o lleno kai dikhel so ka avelpe?

¹² Von phende lenge: Etalo kate. Sigaren te dikhen le. Vou avilo allive te dikhel o kurbano kai o foro del e Devle po burdo.

¹³ Kana tumen ka den ando foro, ka malaven le kana vou ka avel te jal kote kai ka cheren o kurbano, soke o foro ni ka jal lligo ni ka avel vou. Vou si kai blagosil o kurbano e Devleko, mapalal ka jan sa e llene ikharde po kurbano. Llan tumen akana, kote ka dikhen le.

¹⁴ Ondaka von die ando foro. Kana sea andre, o Samuel avela lende te llal po kurbano kai o foro dela e Devle po burdo.

¹⁵ Iek llive mai anglal te avel o Saul, o Del phenda e Samueleke:

¹⁶ Thiara isto ande gava saiato, me ka bichalav tute iek lleno katar e phuv katar o Benjamin. Tu ka thove le gazda ande mo foro Israel, vou ka braduil me foro katar e filisteura. Zao mange katar mo foro soke asundem lengo urkipe.

¹⁷ Ta kana o Samuel dikhla e Saule, o Del phenda e Samueleke: Gava si o lleno kai phendem chuke. Vou ka gazdaril me foro.

¹⁸ Ondaka o Saul avilo kai o Samuel po dopas katar o udar e foroko, ta puchla le: ¿Sai phene mange kaitalo o cher katar o lleno kai dikhel so ka avelpe?

¹⁹ Ta o Samuel phenda e Sauleke: Me sem o lleno kai dikhel so ka avelpe. Aide te jan manchar kai mo cher. Thiara sai llatar, ta me ka phenav chuke sa so si ande cho lio.

²⁰ Na brigisao pala e magarche kai jasardan, soke malade len. E ezgode mai sukar ande sa o Israel ka aven chuke ta sa e porodoke katar cho dad.

²¹ O Saul phenda e Samueleke: ¡Me sem katar e vicha katar o Benjamin kai si e vicha mai minoni ando Israel! Ta murni familia si e mai minoni ande sa e vicha katar o Benjamin, ¿soke phene mange gala ezgode?

²² Ondaka o Samuel anda e Saule ta leke sluga ande po cher, ta besalda len po than mai angluno maskar e ikharde kai sea preko tranda llene.

²³ Ta o Samuel phenda gole lleneke kai chiravela: Thou o kotor mai baro kai phendem chuke te guruve pe iek rig.

²⁴ Ondaka o lleno kai chiravela anda o buto ta thoda le angla o Saul. Ta o Samuel phenda leke: Kote si tut so saia dino chuke. Ja, soke me gurudem le chuke kana ikhardem e foro.

²⁵ Ta kana fuliste ando foro, o Samuel dia orba e Saulea upral po cher.

²⁶ Thiarinako kana pharrona e zore, o Samuel ikharda e Saule kai saia pe iek than upral po cher, ta phenda leke: Uste, me ka llav te mukav tut. O Saul ustilo ta e dui likiste avri.

²⁷ Kana von sea pe ogoia rig katar o foro, o Samuel phenda e Sauleke: Phen che slugake te llal angle, a tu achi kate te phenav chuke o alav e Devleko.