1 Samuel 8 - Biblia ande chib Romani

E llene katar o Israel mangen iek charo

¹ Kana o Samuel saia phuro thoda pe chaven te aven gazda po Israel.

² O anav katar leko chavo mai purano saia Joel, a o anav katar o duito saia Abias. Von gazdarina ando Berseba.

³ A e chave e Samueleke ni sea sargo lengo dad soke von cherdile jamiale ta bichindile pala e love, ta i phagle so si orta.

⁴ Ondaka chidinaile e phure mai preche ta llele ande Rama te dikhen e Samuele,

⁵ ta phende e Samueleke: Tu phurilan ta che chaurre ni llan sargo tu po lacho drom, goleke thov iek charo pe amende, gia sar cheren le ande sa e phuvia.

⁶ A e Samueleke ni pela drago kai mangena iek charo, goleke molisailo e Devleke

⁷ ta o Del phenda e Samueleke: Asun sa so ka phenen chuke, soke tut ni muken, man muken te na charoiv pe lende.

⁸ Sar kana ikandem len katar o Ejipto llik akana, cheren isto gua so cheren tuia, mukle man te sai blagosin avere delen.

⁹ Goleke, asun so phenen chuke ta phen lenge sar ka charoil pe lende o charo kai mangen.

¹⁰ Ondaka o Samuel phenda o alav e Devleko e foroke kai mangela iek charo.

¹¹ Ta phenda lenge: Gia ka cherel tumenge o charo kai ka charoil pe tumende. Ka lel tumendar tumare chave ta ka thovel len te arakhen leko bordon barimako. Ka thoven len te aven leke boñikura kai llan pe gra, ta i te arakhen le.

¹² Nesaven ka thovel kapitanura po milia ta po pinda boñikonen. Ka thovel len te radin e phuv, te chiden septelie, ta te cheren jarnie te sai marenpe. Ta ka thovel len te lacharen leko bordon barimako.

¹³ Ka thovel tumare chorren te cheren merisura, te chiraven ta te cheren marrno.

¹⁴ Ka lel tumare mai lache phuvia, tumare mai lache vostanura drakhake ta i maslinkake, ta ka del len pe slugenge.

¹⁵ Ka lel o diesmo katar tumare septelie ta i katar e vostanura drakhake, te de len pe kapitanonenge ta pe slugenge.

¹⁶ Ka lel tumare sluge, tumare mai lache chaurre, ta i tumare guruva te sai cherel po rado.

¹⁷ Ka lel o diesmo katar tumare stoke, ta tumen ka aven leke sluge.

¹⁸ Ondaka tumen ka urkin e Devleke pala o charo kai manglen, a o Del ni ka asunel tumen.

¹⁹ A e llene ni mangle te asunel so phenela lenge o Samuel, ta phende leke: Ni chitilpe amenge, amen manga iek charo,

²⁰ soke amen manga te ava sargo ogola phuvia kai si len charo. Amaro charo ka gazdaril pe amende, ta ka llal anglal amende po maripe.

²¹ Ta o Samuel asunda sa so phenda o foro, ta phenda le e Devleke.

²² Ta o Del phenda e Samueleke: Cher so von mangen ta thov pe lende iek charo. Ondaka o Samuel phenda saurrenge te irinpe kai pe forura.