1 Samuel 7 - Biblia ande chib Romani

¹ Ta e llene katar o Kiriat Jearim inllarde e arka e Devleki ta thode la ande iek cher kai achela pe iek burdo. Gua cher saia katar o Abinadab, ta santifikisarde e Eleazare chavo katar o Abinadab te arakhel e arka e Devleki.

O Samuel gazdaril ando Israel

² Sar kana thode e arka e Devleki ando Kiriat Jearim nakhle bis burs. Sa o Israel irisaile kai o Del.

³ O Samuel dia gaia orba e israelitonenge: Te si kai de istina irin tumen kai o Del sa tumare liea, chuden tumendar avere delen ta e Astarote. Ta lacharen tumare lie te sai radin samo e Devleke ta o Del ka braduil tumen katar e filisteura.

⁴ Ondaka e israelitura chudie gole delen kai ikhardona Baal ta Astarot, ta blagosisarde samo e Devle.

⁵ Ta o Samuel phenda: Chiden sa e foro katar o Israel ande Mizpa, ta me ka moliv man e Devleke pala tumende.

⁶ A e israelitura chidinaile ande Mizpa, ikande pai ta chudie le angla o Del. Gua llive cherde alluno, ta phende: Amen cherdam o bilachipe e Devleke. Ta o Samuel cherdilo gazda katar o Israel ande Mizpa.

⁷ Kana e filisteura asunde kai e israelitura sea chidine ande Mizpa, e gazda katar e filisteura likiste te marenpe e israelitonenchar. Ta kana e israelitura asunde kai e filisteura avena te marenpe lenchar, but daraile.

⁸ Ondaka e llene katar o Israel phende e Samueleke: Na muk te mange e Devletar pala amende, te sai arakhel amen.

⁹ O Samuel lia iek telcho ta dia le kurbano e Devleke. Mapalal molisailo e Devleke pala o Israel, ta o Del asunda le.

¹⁰ Ta kana o Samuel dela o kurbano e Devleke, avile e filisteura. Ondaka o Del cherda te asundol iek baro germipe ta e filisteura daraile but, ta gia e israelitura dobisarde len.

¹¹ E israelitura likiste te marenpe e filisteonenchar, ta marde len llik kai o foro kai ikhardol Betkar, ta ios mai dur.

¹² Ondaka o Samuel lia iek barr ta thoda le maskar e Mizpa ta o Sen, ta thoda leko anav Eben Ezer, soke phenda: Llik kate o Del pomozisarda amen.

¹³ Ta gia e israelitura dobisarde e filisteonen, ta ni die ios ande phuv katar o Israel. Ondaka o Del patisarda e filisteonen sa e llivesa e Samueleke.

¹⁴ Ta e filisteura irisarde e israelitonenge e forura kai lie lendar. Katar o foro Ekron llik o foro Gat. Ta e llene katar o Israel chudie e filisteonen katar e phuv. Ta saia pas maskar e israelitura ta e amorreura.

¹⁵ O Samuel saia gazda ando Israel sa po zivoto.

¹⁶ Suako burs llala ando Betel, ando Gilgal ta ande Mizpa. Kote vou chinela krisa e foroke.

¹⁷ Mapalal irilape ande Rama soke kote saia leko cher ta gazdarila e Israele. Kote vou cherda iek altar e Devleke.