1 Samuel 5 - Biblia ande chib Romani

E arka e Devleki maskar e filisteura

¹ E filisteura lie e arka e Devleki ta inllarde la katar o Eben Ezer llik kai o Asdod.

² Mapalal ande e arka e Devleki kai o cher katar lengo del o Dagon, ta thode la pasa le.

³ Thiarinako e llene katar o Asdod dikhle kai o Dagon saia peradino angla e arka e Devleki, ta thode e Dagone pe porrne pe po than.

⁴ Ta pale thiarinako dikhle kai o Dagon saia peradino angla e arka e Devleki. Ta o soro e Dagoneko ta leke dui va sea chinde pasa o udar, samo achili leki esnaga.

⁵ Goleke llik akana e popura e Dagoneke ta sa e llene ni ustaven o udar katar o cher e Dagoneko kai si ando Asdod.

⁶ Ta o Del dukhada zurale e llenen katar o Asdod ta ande sa lengi phuv. Cherda te barion lenge gute bare ta te avel lenge bari dar.

⁷ Ta kana e llene katar o Asdod dikhle so nakhela, phende: E arka katar o Del e Israeleko nasti achel maskar amende soke pala gua o Del dukhavel amen ta zatril e Dagone.

⁸ Goleke ikharde te aven e mai preche katar e filisteura, ta phende lenge: ¿So ka chera amen e arkaia katar o Del e Israeleko? Von phende: Tumen sai inllaren la ando foro katar o Gat. Ta inllarde incha e arka katar o Del e Israeleko.

⁹ Ta kana thode e arka e Devleki ando foro katar o Gat, o Del cherda te avel pe llene iek bari dar. O Del dukhada e murusen, bare ta minone, ta pherdile gute.

¹⁰ Ondaka e filisteura inllarde e arka e Devleki ando Ekron. Ta kana e llene katar o Ekron dikhle kai anena e arka e Devleki, urkisarde ta phende: ¡Ande e arka katar o Del Israeleko samo te mundaren amen ta amare foro!

¹¹ Ta ikharde te aven e mai preche katar e filisteura, ta phende lenge: Inllaren e arka katar o Del e Israeleko. Irin la kai lako than te na mera sa. Soke ando foro e llene darana te meren pala e zor e Devleki kai sai but bari pe lende.

¹² Ta gola kai ni merena, bariona lenge gute bare. Sa e llene ando foro urkina zurale, pe gachin kai lengo urkipe avela llik kai o miloso.