1 Samuel 4 - Biblia ande chib Romani

E filisteura len e arka e Devleki

¹ Mapalal o Samuel phenela e orba e Devleki sa e llenenge katar o Israel. Ondaka avile e filisteura te marenpe e israelitonenchar. Goleke e israelitura likiste te marenpe e filisteonenchar ta inzarde pe chare ando Eben Ezer, a e filisteura ando Afek.

² Ta e filisteura mardepe e israelitonenchar. E filisteura dobisarde ta mundarde star milie llenen katar o Israel.

³ Ta kana e israelitura irisaile kai o pero, e phure katar o Israel phende: ¿Soke o Del mukla te dobin amen e filisteura? ¡Aide te ana katar o Silo e arka e Devleki te ana la amende, gia o Del ka braduil amen katar e filisteura!

⁴ Ondaka e israelitura bichalde boñikonen kai o Silo, ta ande e arka e Devleki, o Del kai si le sa e zor, kai leko trono si upral pe kerubinura. Ta e dui chave e Elieke o Ofni ta o Finees, i von llana pasa e arka katar o Del o Gazda.

⁵ Ta kana ande e arka e Devleki ando pero, e israelitura urkisarde veselimatar zurale, gia zurale kai dermosaili e phuv.

⁶ Ta kana e filisteura asunde sar urkina e israelitura, puchle: ¿Soke gachin urkin e israelitura? Ta kana llangle kai e arka e Devleki thodela ando pero,

⁷ daraile but ta phende: ¡O Del avilo ando pero katar e israelitura! ¡Tesko amenge soke nikada ni avilape gia maskar amende!

⁸ ¡Ioi! ¿Ko ka braduil amen katar gala dela zurale? ¡Gala si e dela kai zatrisarde e ejipsionen po pusto!

⁹ ¡Len tumenge zor filisteura, na daran. Te na cherdon sluge e israelitonenge sargo von kai sea tumare sluge. Llan te maren tumen lenchar!

¹⁰ Ta e filisteura mardepe e israelitonenchar ta dobisarde len. Ta e israelitura nasle kai pe chare. E filisteura mundarde tranda milie boñikonen katar o Israel.

¹¹ Ondaka e filisteura lie e arka e Devleki ta mundarde e Ofnie ta e Fineese kai sea e chave e Elieke.

¹² A iek lleno katar e vicha e Benjamineki naslo katar o maripe, ta isto ande gua llive avilo ando Silo. Leke patave sea sa pharrade ta chudela chik pe po soro.

¹³ Kana gua lleno avilo, o Eli saia besindo pe iek estolicha kai saia pasa o udar, ta arakhela o drom soke darala but pala e arka e Devleki. Ondaka o lleno avilo ando foro ta phenda saurrenge so avilape, ta saurre thodepe te urkin.

¹⁴ Ta o Eli asunda o urkipe, ta puchla: ¿Soke e llene gachin urkin? Ta o lleno kai avilo te phenel so avilape, prastia kai o Eli ta phenda leke so nakhla.

¹⁵ O Eli sea leke iniavardes ta ojto burs, ta nasuailo katar pe akha ta korrailo.

¹⁶ O lleno kai avilo te phenel so nakhla phenda: Naslem katar o maripe ta prastiem karinga. O Eli puchla le: ¿So nakhla chavea?

¹⁷ Ta o lleno phenda e Elieke: E israelitura nasle katar e filisteura. Ando maripe mule but israelitura, che chave o Ofni ta o Finees i von mule. Ta na samo gua, soke e filisteura lie e arka e Devleki.

¹⁸ Samo kana o lleno phenda kai e arka e Devleki lie la e filisterura, o Eli pelotar palpale pasa o udar ta phagla pi korr ta mulo, soke saia but pharo pala leko phuripe. O Eli saia krisari ando Israel saranda burs.

¹⁹ Ta e rromi katar o Finees kai saia khamni, kana llangla kai e filisteura lie e arka e Devleki, ta kai lako sastro ta lako rrom mule, avile lake e dukha te bianel ta maladila lake.

²⁰ Kana e diskinie kai pomozina la te bianel dikhle kai voi lela te merel, phende lake: Na dara, soke biandilo chuke iek minono. A voi ni thoda lenge sama.

²¹ Ta voi thoda e minoneko anav Ikabod, soke phenda: ¡Lie o baripe katar o Israel! Voi phenela gua pala e arka e Devleki kai liela e filisteura, ta soke mulo lako rrom ta lako sastro.

²² Mapalal phenda: ¡Lie o baripe katar o Israel, soke lie e arka e Devleki!