1 Samuel 30 - Biblia ande chib Romani

O David dobil e amalekitonen

¹ Pala o trito llive kana o David ta leke llene avile ando Siklag e amalekitura die ando Negev ando Siklag, ta zatrisarde le ta phabarde le,

² ta inllarde phangle e diskinien ta sa e llenen kai sea ando foro, katar o mai terno llik o mai purano. A ni mundarde nika, samo inllarde len po drom.

³ Kana o David ta leke llene avile, malade o foro phabardo ta ni sea e diskinie ta ni e minone soke inllardea len phangle.

⁴ Ondaka o David ta e llene kai avena lea rovde lligo ni achila len ios blaga te roven.

⁵ E dui diskinie katar o David, e Ajinoam katar e phuv o Jezreel ta e Abigail kai saia e rromi e Nabaleki katar o Karmel, i len inllarde len phangle e amalekitura.

⁶ Ta o David brigisailo but soke o foro mangela te chudel barra ande lete pala e bari zalba kai saia len pala pe chaurre ta pala pe chorra. A o David lia zor katar po Gazda lo Del.

⁷ Ondaka o David phenda e popoke o Abiatar, chavo katar o Ajimelek: An mange o efod, me moliv man chuke. Ta o Abiatar anda o efod e Davideke.

⁸ Ta o David puchla e Devle, ta phenda: ¿Morabi te rodav gole choranen? ¿Ka resav len? Ta o Del phenda leke: Lla ta rode len, soke ka rese len ta ka mukliare e phanglen.

⁹ Ondaka o David ta e sov stotine llene kai sea lea avile po pai katar o Besor, ta nesave lendar achile kote.

¹⁰ Ta o David ta star stotine llene llele angle, a ogola dui stotine llene sea chinie drometar ta nasti nakhle o pai katar o Besor.

¹¹ Ta malade ando vos iekhe llene ejipsio, ande le angla o David, die le te jal marrno ta te piel pai.

¹² Ta i die le te jal iek kotor marrno cherdo katar e maslinke suke ta dui krangura katar e drak suki. Kana jala, avili leki zore, soke cherena trin llivesa ta trin racha kai ni jala ta ni piela niso.

¹³ Ta o David puchla le: ¿Ko san, katar ave? Ta o terno ejipsio phenda: Me sem sluga katar iek amalekita, ta cherel trin llive kai mo gazda mukla man chudino, soke sema nasualo,

¹⁴ soke llelam po maripe ando Negev katar e kereteura, katar o Juda ta o Negev katar o Kaleb, ta phabardam e Siklage.

¹⁵ O David puchla le: ¿Ka inllare man kai gola chorane? Ta o ejipsio phenda e Davideke: Samo te ja mange sovel ando anav e Devleko kai ni ka mundare man ta ni ka muke man kai mo gazda, ondaka me ka inllarav tut lende.

¹⁶ Ta o ejipsio inllarda e Davide kai sea e amalekitura, ta von sea rispime ande sa goia phuv. Jana ta piena ta cherena slava, soke sea vesele pala sa so liea katar e phuv katar e filisteura ta katar e phuv katar o Juda.

¹⁷ Ta o David marda len kana pharrona e zore llik thiarinako kana perela o kham. Ta mundarda saurren, samo star stotine terne nasle pe deve.

¹⁸ Ta o David mukliarda sa so lie e amalekitura, ta i mukliarda pe duie rromien.

¹⁹ Sa so chorde e amalekitura ta sa e chaurren ta e chorren, sa anda le o David.

²⁰ Ta i lia o David sa e bakren ta e guruven. Ta e llene kai anena len phenena kai sa gala ezgode si e Davideke.

²¹ Ta kana o David irisailo po pai katar o Besor, e dui stotine llene kai achilea kote chinie e drometar, avile angla o David ta leke llene. Ta kana avilo o David puchla len sar sea.

²² A e llene bilache kai llelea e Davidea jolaile ta phende kai e llenen kai ni llele po maripe, saia te na len niso katar e ezgode kai lie katar e amalekitura, samo te len pe diskinien ta pe chaurren ta mapalal te llantar.

²³ A o David phenda: Phlalalen, na cheren gia e ezgodenchar kai o Del dia amen, soke o Del arakhla amen ta cherda te dobi gale choranen kai mardepe amenchar.

²⁴ Niko ni ka asunel tumen, soke sa morabi te len isto gua kotor, gola kai llan po maripe ta i gola kai achen te arakhen e ezgode marimake.

²⁵ Katar gua llive angle, gua achilo zakono ando Israel llik allive.

²⁶ Ta kana o David avilo ando Siklag, katar e ezgode kai lie katar o maripe, bichalda e phurenge katar o Juda kai sea leke amale, ta phenda lenge: Gala ezgode liam katar e dusmanura e Devleke.

²⁷ Ta i bichalda ezgode kai lie katar e amalekitura e llenenge kai sea ando Betel, ando Ramot katar o Negev, ando Jatir,

²⁸ ando Aroer, ando Sifmot, ando Estemoa,

²⁹ ando Rakal, ta i golenge kai sea ande forura katar o Jerameel ande forura katar e kenitura,

³⁰ ande Jorma, ando Korasan, ando Atak,

³¹ ando Jebron, ta sa e forura kai saia o David pe llenenchar.