1 Samuel 3 - Biblia ande chib Romani

O Del ikharel e Samuele

¹ Kana o Samuel saia terno radila e Devleke angla o Eli. Ande gua vreme ni asundola but o alav e Devleko, samo nesave droma e llene dikhena so saia te avelpe.

² Iek llive o Eli saia inzardo ande pi soba, soke suako llive sa mai but korraola,

³ ta mai anglal te avel mundardi e lampara e Devleki, o Samuel sovela ando cher e Devleko po than kai saia thodi e arka e Devleki.

⁴ Ondaka o Del ikharda e Samuele, ta o Samuel phenda: ¡Kate sem!

⁵ Ta o Samuel prastia kai o Eli, ta phenda leke: Kate sem, ¿soke ikhare man? A o Eli phenda leke: Me ni ikhardem tut. Lla ta per chuke pale. Ta o Samuel llelo pale te sovel.

⁶ A o Del pale ikharda le: ¡Samuel! Ta o Samuel ustilo ta llelo kai o Eli, ta phenda leke: Kate sem, ¿soke ikhare man? A o Eli phenda leke: Chaurrea, me ni ikhardem tut. Lla, per chuke pale.

⁷ O Samuel ni pinllarela e Devle soke o alav e Devleko ni sikadiloa leke.

⁸ Ta o Del pale o trito drom ikharda e Samuele, a o Samuel llelo kai o Eli ta phenda leke: Kate sem, ¿soke ikhare man? Ondaka o Eli acharda kai o Del saia gua kai ikharela e Samuele,

⁹ ta phenda leke: Lla per chuke. Te si gia kai o Del ikharel tut, phen leke: De orba Devla, cho sluga asunel tut. Ondaka o Samuel llelo te perel peke ande pi soba.

¹⁰ Ta o Del avilo lete, ta ikharda le sargo ogola droma: ¡Samuel! ¡Samuel! Ta o Samuel phenda e Devleke: De orba Devla, cho sluga asunel tut.

¹¹ Ta o Del phenda leke: Me ka cherav iek ezgoda ando Israel kai kana ka llanen le ka meren daratar,

¹² soke me ka cherav sa so phendem pe familia katar o Eli.

¹³ Ka sikavav e Elieke kai ka krisiv leke familia ostade pala o bilachipe kai vou llanel. Soke leke chave kusen man ta vou niso ni phenel lenge.

¹⁴ Goleke me jalem sovel kai nikada ni ka prostiv o bilachipe kai cherda e familia e Elieki, i te dena kurbanura o te dena ofrende.

¹⁵ O Samuel achilo ande pi soba llik kai e thiarin, ta putarda e udara katar o cher e Devleko. Ta o Samuel darala te phenel e Elieke so sikadaia leke o Del,

¹⁶ a o Eli ikharda le, ta phenda leke: ¡Samuel, chaurrea! Ta o Samuel phenda: Kate sem.

¹⁷ Ta o Eli puchla le: ¿So phenda chuke o Del? Phen mange sa. ¡Te ave proketo e Devletar te na phendan mange sa!

¹⁸ Ondaka o Samuel phenda leke sa, ta ni guruda niso katar so llanela, a o Eli phenda: ¡Gua si o Del! ¡Te cherdol leki volia!

¹⁹ O Samuel barilo ta o Del arakhela le ta pomozila le ande sa so cherela.

²⁰ Sa o Israel, katar o Dan llik kai o Berseba, llangla kai o Samuel saia profeta chachuno e Devleko.

²¹ Ta o Del pale sikadilo ando Silo, soke kote o Del dela e Samueleke pi orba.