1 Samuel 29 - Biblia ande chib Romani

E filisteura ni pachan ando David

¹ E boñikura katar e filisteura chidinaile ando Afek, ta e israelitura logle pasa o bunari kai si ando Jezreel.

² Ta kana e filisteura nakhena po stotina ta po milia boñikura, o David ta leke llene avena palal pala e boñikura katar o Akis.

³ Ta e mai preche katar e filisteura phende e Akiseke: ¿So cheren kate gala ebreura? Ta o Akis phenda lenge: Vou si o David kai saia sluga katar o Saul, o charo e Israeleko. Vou si manchar mai katar o burs llive ta niso bilacho ni dikhlem pe lete sar kana vou nakhlo mande llik allive.

⁴ Ondaka e mai preche boñikura jolaile po Akis, ta phende leke: Phen leke te irilpe kai po than, te na llal amenchar po maripe. Vou sai cherdol amaro dusmano, soke ¿So avela mai sukar leke neko te lacharelpe pe gazdaia ta te anel leke e sore katar gala llene?

⁵ ¿Inai gava o David kai kana chelena ta llilabena phenena: O Saul mundarda milia murusen, a o David des milie murusen?

⁶ Ta o Akis ikharda e Davide, ta phenda leke: ¡Angla o Del phenav le kai tu san iek lleno orta! Drago mange sar sana manchar ando pero, ta niso bilacho ni maladem ande tute sar kana avilan mande. A tu ni san drago e boñikonenge mai preche.

⁷ Irisao akana ta llatar esmiro te na joliaon pe tu e gazda katar e filisteura.

⁸ Ta o David phenda e Akiseke: ¿So cherdem? ¿So dikhlan pe ma sar kana avilem tute kai ni muke man te marav man che dusmanonenchar?

⁹ O Akis phenda leke: Llanav kai san iek lleno posteno sargo iek suecho e Devleko, a e gazda katar e filisteura phende mange te na lla tu po maripe.

¹⁰ Goleke, uste thiara rano tu ta che llene kai avile tuia, ta llatar.

¹¹ Ta o David ustilo thiarinako rano vou ta leke llene ta irisaile katar e phuv katar e filisteura. Ta e filisteura llele kai o Jezreel.