1 Samuel 28 - Biblia ande chib Romani

¹ Ande gola llivesa e filisteura chidinaile te marenpe e Israelea, ta o Akis phenda e Davideke: Sar llane le tu ta che llene morabi te liken manchar po maripe.

² Ta o David phenda leke: Phen mange so morabi te cherel cho sluga. Ta o Akis phenda e Davideke: Tu ka ave o boñiko kai ka arakhel man sa so ziviva.

O Saul ta e diskinia kai apogodila

³ O Samuel mulo ta sa ando Israel rovde pala leko meripe, ta prajosarde le ande Rama, kai saia o foro kai vou biandilo. Ta o Saul tradia katar e phuv sa e chirimatarken ta e llenen kai apogodina.

⁴ E filisteura chidinaile ta inzarde pe chare ando Sunem, ta o Saul chidia sa e llenen katar o Israel ta inzarde pe chare ande Gilboa.

⁵ Ta kana dikhla o pero katar e filisteura darailo but, ta leko lio izdrala daratar.

⁶ Ondaka puchla e Devle, a o Del ni phenda leke niso, ni ande sune, ni ando Urim, ni e profetonenchar.

⁷ Goleke o Saul phenda pe slugenge: Llan ta roden mange iekhe diskinia kai apogodil te sai llav late te puchav la so ka avelpe. Ta leke sluge phende leke: Si iek diskinia ando Endor kai llanel te apogodil.

⁸ Ta o Saul thoda pe pe aver patave te na pinllaren le, ta orachaia llelo duie llenenchar kai goia diskinia. Ta o Saul phenda lake: Me moliv man chuke te apogodi mange ta cher te avel kate o lleno kai me ka phenav chuke.

⁹ Ta e diskinia phenda e Sauleke: Tu llane so cherda o Saul kai tradia katar e phuv e chirimatarken ta e llenen kai llanen te apogodin. ¿Soke mange mandar iek ezgoda kai sai mundare man?

¹⁰ A o Saul jala sovel ando anav e Devleko, ta phenda: Ando Del phenav le, kai niso ni ka avel pe tu.

¹¹ Ta e diskinia puchla e Saule: ¿Ka mange te cherav te avel kate? Ta o Saul phenda: Cher te avel o Samuel.

¹² Ta kana e diskinia dikhla e Samuele, ando baro avazi phenda:

¹³ ¿Soke kojadan man? ¡Tu san o Saul! Ta o charo phenda lake: Na dara. ¿So dikhlan? Ta e diskinia phenda e Sauleke: Dikhav dela kai liken katar e phuv.

¹⁴ O Saul puchla la: ¿Sar dikhol? Ta e diskinia phenda: Vou si iek lleno phuro, pe lete si iek gertachi. Ondaka o Saul llangla kai saia o Samuel, ta bangilo lligo ni leko chikat dodisarda e phuv.

¹⁵ Ondaka o Samuel phenda e Sauleke: ¿Soke chere man te avav? Ta o Saul phenda leke: Soke sem but darano katar e filisteura kai marenpe manchar. O Del mukla man ta ni phenel mange niso, ni ande sune ni e profetonenchar. Goleke ikhardem tut, te sai phene mange so morabi te cherav.

¹⁶ Ta o Samuel phenda leke: ¿Soke puche man kana o Del mukla tut ta akana vou si cho dusmano?

¹⁷ O Del cherda chuke so phenda mange. Lia tutar o gazdaripe katar e charoina ta dia le che pharnaveke o David,

¹⁸ tu ni cherdan e volia e Devleki te zatri e llenen katar o Amalek. Goleke akana o Del inai tuia.

¹⁹ Ta o Del thovel tut ta e Israele ande va katar e filisteura, ta thiara tumen ka aven manchar, tu ta che chave, ta ka cherel te dobin e filisteura e Israele.

²⁰ Ondaka o Saul kai saia baro, pelotar pe phuv, soke darailo but pala so phenda leke o Samuel. Ta ni saia le ios zor, soke sorro llive ta sorro riat ni jala niso.

²¹ Ta e diskinia kana dikhla kai o Saul baldizailo, avili lete ta phenda leke: Me cherdem pe chiro ta thodem mo zivoto ande bari dar, ta asundem sa so phendan mange.

²² Akana me moliv man chuke te asune man gia sar me asundem tut. Me ka dav tut marrno te ja te sai del tut zor ta te lla pe cho drom.

²³ Ta o Saul ni kamela te jal, a leke boñikura ta e diskinia molisaile leke, ta vou jala. Mapalal ustilo katar e phuv ta beslo pe postelia.

²⁴ E diskinia saia la iek telcho ande lako cher ta mundarda le, ta lia arina ta cherda marrne kai inai len levadura.

²⁵ Ta anda e Sauleke ta leke slugenge. Ta kana jale ustile, ta isto goia riat lleletar.