1 Samuel 25 - Biblia ande chib Romani

O meripe katar o Samuel

¹ Ta o Samuel mulo, ta sa e israelitura chidinaile te roven pala le. Prajosarde le ande leko cher ande Rama. Mapalal o David llelotar po pusto katar o Paran.

O David ta e Abigail

² Saia ando foro katar o Maon iek lleno but barvalo kai sea le trin milie bakre ta milia busnien. Leki buchi saia ando foro katar o Karmel, ta kote vou chinela e bal katar e bakre.

³ Gava lleno ikhardola Nabal ta saia katar e vicha katar o Kaleb. Vou saia iek lleno bilacho kai ni dela liubao nika, a leki rromi saia but sukar ta i bizai. Voi ikhardola Abigail.

⁴ Ta o David po pusto asunda kai o Nabal chinela e bal katar e bakre.

⁵ Ondaka o David bichalda dese chaurren ta phenda lenge: Llan ando foro o Karmel kai o Nabal, ta phenen leke kai me bichalav leke salami,

⁶ ta phenen leke gia: Te avel e pas pe tute ta i pe chi familia, ta pe sa so si tut.

⁷ Asundem kai akana si tut llene kai chinen e bal katar e bakre. Tu llane kai che chobanura sea amenchar ta amen avilam pachivale lenchar, ta sa o vreme kana von sea ando Karmel ni trubula len niso.

⁸ Puch che slugen, ta von ka phenen chuke kai gua si o chachipe. Akana me mangav tutar te ave i tu pachivalo gale chaurrenchar, te de len so avela tut, soke me sem sargo cho chavo.

⁹ Kana e chaurre kai bichalda o David avile kai o Nabal, phende leke sa so phenda o David ta ni phende niso ios.

¹⁰ A o Nabal phenda lenge: ¿Ko si o David? ¿Ko si gua chavo e Jeseeko? Si but sluge kai nasen katar pe gazda.

¹¹ ¿Mo marrno, mo pai o mo mas kai chiradem me slugenge kai chinen e bal katar me bakre, ka dav len e llenenge kai ni llanav katar si von?

¹² Ta e chaurre irisaile po drom, ta kana avile kai o David, phende leke sa so phendaia lenge o Nabal.

¹³ Ondaka o David phenda pe llenenge: ¡Suako lleno tumendar te lel po jarni! Ta sa e llene katar o David lie o jarni, ta i o David lia po jarni. Ta e llene kai llele e Davidea sea preko star stotine murusa, ta dui stotine llene achile te arakhen e ezgode.

¹⁴ A iek sluga katar o Nabal llelo kai e Abigail e rromi katar o Nabal, ta phenda lake: O David bichalda nesave llenen te den salami e Nabale, a vou ni avilo pachivalo lenchar.

¹⁵ Gala llene sea but lache amenchar, ta sa o vreme kana amen sama lenchar ando vos, ni trubula amen niso.

¹⁶ Von arakhena amen ollivesea ta orachaia, ta i arakhena amare bakren.

¹⁷ Akana mislisao so ka chere, soke cho rrom si but joliariko, ta niko nasti del orba lea. Amen llana kai o David ka avel te zatril le ta leke familia.

¹⁸ Ondaka e Abigail lia dui stotine marrne, dui morcha pherde mol, panch bakre peke, saranda kile simiche peke, stotina drakha suke, dui stotine simochine suke, ta sa thoda len pe magarche,

¹⁹ ta phenda pe slugenge: Llan tumen anglal, me ka llav mapalal. Ta voi niso ni phenda e Nabaleke.

²⁰ E Abigail lleli pe iek magarcho po than gurudino katar o burdo. Ta o David ta leke murusa avena angla la, a voi likisti te maladol lenchar.

²¹ Ta o David mislisailo kai samo gia arakhla e ezgode katar o Nabal po pusto, ta ni lia letar niso, soke o Nabal pochinda leke bilachipe po lachipe.

²² Ta o David jala sovel gia: ¡Te dukhavel man o Del te na zatriva thiara sa so si le ta te na mundarava sa e murusen katar leki familia!

²³ Ta kana e Abigail dikhla e Davide, fulisti sigardi katar o magarcho ta dia changenchar angla o David.

²⁴ Ta e Abigail chudiape pe leke porrne, ta phenda leke: ¡Gazda murno, te perel pe ma e dos! Me moliv man chuke, muk man te dav orba tuia ta asun e alava katar chi sluga.

²⁵ Na thov sama katar e ezgode kai cherel o Nabal, soke vou si dilo gia sar si leko anav. A me, chi sluga ni dikhlem e chaurren kai tu bichaldan.

²⁶ Gazda murno, angla o Del o llundo phenav chuke kai o Del ni mukla tut te mundare che dusmanonen. Daboida te aven sa che dusmanura sargo o Nabal, ta sa gola kai mangen te cheren chuke o bilachipe.

²⁷ Akana, le chuke o japorre kai anda chi sluga, te de len e llenenge kai phiren tuia,

²⁸ ta prostisar che sluga. Chachimaia si kai o Del ka thovel tut ta che familia ande charoina, soke tu mareto pala o Del, goleke na cher nikada ni iek ezgoda bilachi.

²⁹ Te si kai fiko mangel te mundarel tu, o Del ka arakhel tu ta ka chudel dur tutar che dusmanonen, sargo kana chuden barra e ondaia.

³⁰ Ta kana o Del ka cherel sa o lachipe kai phenda kai ka cherel me gazdake, ta kana ka thovel tut te gazdari ando Israel,

³¹ ondaka ni ka ave keime pala nisavo mundaripe kai cherdan, o kai chindan e kris isto tu te ikane chi duk. Goleke kana o Del ka del tut o lachipe kai phenda, de tut golli katar chi sluga.

³² Ta o David phenda lake: Blagosime te avel o Gazda, o Del e Israeleko, kai allive bichalda tut te malave man,

³³ ta i tu te ave blagosime pala o bizaipe kai si tut, soke cherdan te na mundarav ta te na chinav e kris isto me te ikanav mi duk.

³⁴ Jav chuke sovel ando anav e Devleko katar o Israel, kai te na sigardana te ave allive, thiara ni achilaia e Nabale ni iek lleno.

³⁵ Mapalal o David lia e ezgode kai anda leke e Abigail, ta phenda lake: Lla chuke chere esmiro. Dikhe kai asundem so phendan mange ta avilem pachivalo tuia.

³⁶ Ta kana e Abigail irisaili chere, o Nabal cherela iek baro jape gia sar cherena le e charura, ta saia korro mato. Goleke voi ni phenda leke niso llik thiarinako.

³⁷ Thiarinako kana o Nabal saia traso, e Abigail phenda leke sa gala ezgode ta leko lio phagilo, ta achilo sargo iek barr.

³⁸ Ta kana nakhle des llive, o Del dia po Nabal ta o Nabal mulo.

³⁹ Kana o David asunda kai o Nabal mulo, phenda: ¡Blagosime te avel o Del kai pochinda e Nabaleke o bilachipe kai cherda mange, ta ni mukla man te cherav o bilachipe, ta cherda leke isto so vou mangela te cherel mange!

⁴⁰ Ta kana e sluge katar o David avile ando Karmel te den orba laia, phende lake: O David bichalel amen tute, soke vou mangel te ave leki rromi.

⁴¹ Ondaka e Abigail bangili lligo ni lako chikat dodisarda e phuv, ta phenda: Me sem iek sluga e Davideki, ta me ka jalavav e porrne katar leke sluge.

⁴² Ta kana phenda gala alava, sigarda te llal panlle cheenchar kai radina lake, ta llelitar palal pala e sluge pe iek magarcho, ta voi zinisaili pala o David.

⁴³ Ta i o David lia e Ajinoama katar o Jezreel te avel leki rromi. Ta e Abigail ta e Ajinoam sea leke rromia,

⁴⁴ soke o Saul pe chea e Mikala kai saia rromi e Davideki, dia la pala e Palti chavo e Laiseko katar o Galim.