1 Samuel 24 - Biblia ande chib Romani

¹ Kana o Saul irisailo katar o maripe e filisteonenchar, phende leke kai o David saia po pusto ando En Gedi.

² Ondaka o Saul ikharda trin milie murusen katar sa o foro Israel, ta llelo te rodel e Davide ta leke llenen pe pechine En Gedi.

³ Ta kana o Saul avilo kai iek rindo bakrengo kai pase saia iek anadipe, o Saul dia andre te sai ucharel pe porrne. Ta o David ta leke llene sea gurudine pasa o anadipe.

⁴ Ta e llene katar o David phende e Davideke: Allive o Del cherel so jala sovel kana phenda kai ka del che dusmanonen ande che va. Cher lea sogo mangea. Ta o David ustilo ta po chorial chinda iek kotor katar o gertachi e Sauleko.

⁵ Ta dukhadilo ande po lio soke chinda iek kotor katar o gertachi e Sauleko,

⁶ ta phenda pe llenenge: ¡Te na del o Del te vazdau mo va pe mo gazda o charo! ¡Vou si o charo soke o Del esvirisarda le!

⁷ Gale alavenchar o David ni mukla pe llenen te den po Saul. Ta o Saul likisto katar o anadipe, ta llelotar.

⁸ Mapalal o David likisto katar o anadipe urkindo, ta phenela: ¡Mo gazda o charo! Ta kana o Saul dikhla pala pe, o David dia changenchar,

⁹ ta phenda leke: ¿Soke asune golen kai phenen chuke kai me mangav cherav chuke bilachipe?

¹⁰ Dik sar allive o Del thoda tut ande me va ando anadipe. Ta me llene phenena mange te mundarav tut, a me prostisardem tut soke phendem: Vou si o charo, o Del esvirisarda le.

¹¹ Dik dade, mande si o kotor katar cho gertachi. Isto me chindem le ta ni mundardem tut, te sai llane kai me ni kamam te mundarav tut. ¿A soke tu rode man te mundare man?

¹² O Del te chinel e kris maskar amende, ta te thovel kasti mange, a mo va nikada ni ka vazdiniaol pe tu.

¹³ Sar phenena e purane: O bilachipe avel katar e llene bilache, goleke mo va nikada ni ka vazdiniaol pe tu.

¹⁴ ¿Ka rodel te marel o charo katar Israel? ¡Man, kai sem sargo iek llukel mulo o sargo iek pisom!

¹⁵ O Del te krisil amen. Vou te dikhel dal sem dosalo o iok, ta te arakhel man tutar.

¹⁶ Ta kana o David getosarda te del orba, o Saul urkindo phenda: ¡Chaurrea, David! ¿Tu san kai de orba? Ta o Saul thodape te rovel.

¹⁷ Ta o Saul phenda leke: Chachimaia phene, soke tu cherdan mange o lachipe a me pochinav chuke e bilachimaia.

¹⁸ Allive sikadan mange kai cherdan mange o lachipe, soke o Del thoda man ande che va ta ni mundardan man.

¹⁹ Soke ¿Ko ka malavel pe dusmano ta ka mukel le te llaltar? O Del te blagosil tut pala so cherdan mange.

²⁰ Akana llanav ka tu ka charoi, ta kai e charoina katar Israel ka avel zurali ta i bari ande che va.

²¹ Ja mange sovel ando anav e Devleko kai ni ka zatri me vicha, ta kai ni ka ikane mo anav katar mi familia.

²² Ondaka o David jala sovel e Sauleke. Mapalal o Saulo irisailo kai po cher, ta o David ta leke llene lleletar ando than gurudino.