1 Samuel 23 - Biblia ande chib Romani

O David braduil e foro Keila

¹ Iek drom e filisteura die ando foro Keila te zatrin le ta chorde o lliu. Kana phende gava e Davideke,

² o David puchla e Devle, ta phenda leke: ¿Sai muke te marav man e filisteonenchar? Ta o Del phenda leke: Ea, lla ta mar tut lenchar, ta braduisar e foro Keila.

³ A e llene kai sea e Davidea phende leke: Amen kate ando Juda dara, ¡ios mai but ka dara te lla ande Keila te mara amen e filisteonenchar!

⁴ Ondaka o David pale puchla e Devle, ta o Del phenda leke: Lla ando Keila, soke me ka cherav te dobi e filisteonen.

⁵ Ta o David ta leke llene llele ande Keila ta mardepe e filisteonenchar, dobisarde len ta lie lenge guruva. Ta gia o David esvirisarda e llenen katar e Keila.

⁶ Kana o Abiatar, chavo e Ajimeleko, naslo kai o David ande Keila, anda o efod ande po va.

⁷ Ta phende e Sauleke kai o David avilo ande Keila, ta mislisailo: O Del dia le ande mo va, soke achilo phanglo ande iek foro kai si le udara ta alkave.

⁸ Ondaka o Saul ikharda sa pe boñikonen te llan ande Keila te phanden e Davide ta leke llenen.

⁹ Ta kana o David llangla kai o Saul mangela zatril le, ikharda e Abiatare ta phenda leke te anel o efod.

¹⁰ Ta o David phenda: Gazda amaro, o Del katar o Israel, cho sluga asunda kai o Saul mangel te avel ande Keila ta te zatril la soke me sem kate.

¹¹ ¿Ka aven te phanden man? ¿E llene katar e Keila ka den man ande lenge va? ¡Gazda amaro ta Del katar o Israel, me moliv man chuke te phene mange so ka avelpe! Ta o Del phenda leke: Ea, o Saul ka avel.

¹² Ondaka o David puchla: ¿E llene katar e Keila, ka den man ta me llenen ande va e Sauleke? Ta o Del phenda: Ka den tumen.

¹³ Ta o David ta leke llene kai sea preko sov stotine, likiste katar e Keila ta lleletar pe suako rig. Ta kana o Saul llangla kai o David naslo katar e Keila, ni kamla te rodel le.

O David po pusto

¹⁴ Ta gia o David achilo ande riga gurudine po pusto katar o Zif, ta o Saul rodela le suako llive, a o Del ni dia le ande leke va.

¹⁵ Ta o David llanela kai o Saul rodela te mundarel le, goleke achilo gurudino ando Jores po pusto katar o Zif.

¹⁶ Iek llive, o Jonatan chavo e Sauleko, llelo te dikhel e Davide ando Jores, ta pomozisarda e Davide te zuriaol ando Del.

¹⁷ Ta phenda leke: Na dara, soke mo dad o Saul ni ka malavel tut. Tu ka ave o charo katar o Israel, a me ka avav o duito mapalal tutar, ta mo dad o Saul llanel le.

¹⁸ Ta e dui jale sovel angla o Del. Mapalal o Jonatan irisailo kai po cher, ta o David achilo ando Jores.

¹⁹ A e llene katar o Zif llele ande Gabaa te den orba e Saulea, ta phende leke: O David gurudol ande amari phuv maskar e pechine katar o Jores po burdo katar o Jakila, kai si ando sur katar o pusto.

²⁰ Goleke te mangea, aide, ta amen ka da le tute.

²¹ Ta o Saul phenda lenge: ¡O Del te blagosil tumen, soke avila tumenge zalba mandar!

²² Llan tumen te dikhen kai gurudol akana ta ko dikhla le, soke phende mange kai vou si but bizai.

²³ Roden ande sa e riga te llanen kai gurudol, ta kana ka llanen le, aven mande te phenel le mange. Te si de istina kai vou si ande goia phuv, me ka llav ta ka rodav le ande sa e familie katar o Juda.

²⁴ Ta von llele ando Zif ta o Saul ta leke boñikura llele mapalal. Ta o David ta leke llene sea ando Maon ando sur katar o pusto Araba.

²⁵ Ta o Saul llelo pe boñikonenchar te rodel e Davide. Ta kana phende e Davideke kai avela o Saul, o David fulisto kai e pechina ta achilo po pusto katar o Maon.

²⁶ Ta o Saul llala pe iek rig katar o burdo, ta pe aver rig llala o David ta leke llene kai sigarena te durion katar o Saul. Ta kana o Saul ta leke boñikura sea but pase te phanden e Davide ta leke llenen,

²⁷ avilo iek lleno te phenel e Sauleke: ¡Irisao isto akana, soke e filisteura die ande phuv!

²⁸ Ta o Saul mukla te rodel e Davide ta irisailo te marelpe e filisteonenchar. Goleke gua than ikhardol Sela Amajlekot.

O David prostil o zivoto katar o Saul

²⁹ Ta o David llelotar kotar ta achilo te zivil pasa e thana gurudine katar o Engadi.