1 Samuel 22 - Biblia ande chib Romani

¹ O David llelotar kotar ta naslo kai o anadipe ando burdo katar o Adulam. Kana leke phlal ta sa leki familia llangle kai saia vou, avile lete te dikhen le.

² Ta i avile lete sa e llene tristome, e llene kai sea unllile, ta sa e llene kai ni saia len zor te zivin. Ta o David cherdilo lengo gazda, ta sa gola kai llana lea sea preko star stotine murusa.

³ Ta o David kotar llelotar ande Mizpa katar o Moab, ta phenda e charoke katar o Moab: Mangav tutar te sai achen tumenchar mo dad ta mi dei lligo ni ka llanav so ka cherel o Del manchar.

⁴ Ta o David anda pe daden angla o charo katar o Moab, ta von achile kote sa o vreme kana o David saia ando cher e boñikonengo.

⁵ A o profeta o Gad phenda e Davideke: Na achi ando cher e boñikonengo. Lla ande phuv katar o Juda. Ta o David llelotar, ta avilo kai o vos katar o Jaret.

O mundaripe katar e popura

⁶ O Saul asunda kai llanglinaila kai saia o David ta e llene kai sea lea. Ta o Saul saia besindo telal tala iek kas ta ande leko va saia iek lansa, ta sa leke sluge sea truial letar.

⁷ Ta o Saul phenda pe slugenge: Asunen chave katar o Benjamin: ¿So mislin tumen, kai o chavo e Jeseeko ka del tumen phuvia ta umalia drakhenge, ta ka thovel tumen gazda katar milia boñikura, ta gazda katar stotina boñikura,

⁸ kai pala gua tumen achilen pe orba te den pe mande, ta niko tumendar ni phenel mange kai mo chavo ta o chavo e Jeseeko thodepe zanio te sai mundaren man?

⁹ Ondaka o Doeg katar o Edom, kai saia maskar e sluge mai preche katar o Saul, phenda e Sauleke: Me dikhlem e chave e Jeseeko kana saia ando Nob, kana avilo kai o Ajimelek, o chavo katar o Ajitub.

¹⁰ O Ajimelek puchla e Devle pala o David, ta dia e Davide jape ta dia le o jarni katar o filisteo o Goliat.

¹¹ Ta o charo bichalda llenen te sai anen e Ajimeleke ta sa e poponen katar o Nob, kai von sea katar leki familia. Ta sa avile kai o charo.

¹² Ta o Saul phenda e Ajimelekeke: Asun man, chavo e Ajitubeko. Kate sem, phenda o Ajimelek.

¹³ Ta o Saul phenda leke: ¿Soke tu ta o chavo e Jeseeko achilen pe orba te mundaren man? Tu dian le marrno ta iek jarni, ta i puchlan e Devle pala le, te sai rodel man te mundarel man, sar cherel le akana.

¹⁴ Ondaka o Ajimelek phenda e charoke: ¿Ko maskar e sluge si o mai orta angla o charo neko o David kai si leko llamutro ta gazda katar e boñikura kai arakhen e charo, ta o mai chachuno ando cher e charoko?

¹⁵ Gaia inai e purvo drom kai me puchav pala o David, te na dosarel man o charo ta te na dosarel mi familia, soke me kai sem cho sluga ni llanav niso katar gaia ezgoda.

¹⁶ A o charo phenda leke: ¡De istina phenav chuke Ajimelek, kai tu ta chi familia ka meren!

¹⁷ Ondaka o charo phenda pe slugenge kai arakhena le: ¡Mundaren e Devleke poponen! I von pomozin e Davide, soke kana llangle kai vou nasela mandar, ni phende le mange. A e sluge daraile te mundaren e Devleke poponen.

¹⁸ Ta o charo phenda e Doegeke: ¡Mundar len tu! Ondaka o Doeg o edomita dia silnomaia pe popura, ta mundarda kote ojtovardes ta panch poponen kai inllarena o efod cherdo katar o lino.

¹⁹ Mapalal dia ando Nob, kai saia o foro katar e popura, ta mundarda e jarnienchar e murusen, e diskinien, e minonen ta i e minonen kai piena kolin. Mundarda guruven, magarchen ta bakren.

²⁰ A iek chavo katar o Ajimelek kai ikhardola Abiatar, naslo katar o mundaripe ta llelo kai o David.

²¹ Ta o Abiatar phenda e Davideke kai o Saul mundarda e poponen katar o Del.

²² Ta o David phenda e Abiatareke: Me llanava kai o Doeg o edomita kai saia kote gua llive, saia te phenel le e Sauleke. Pe ma si e dos kai sa chi familia muli.

²³ Achi manchar, na dara. Gua kai rodel te mundarel man, i tut ka rodel te mundarel, goleke achi manchar, ta niso bilacho ni ka avel pe tu.