1 Samuel 2 - Biblia ande chib Romani

E llili katar e Ana

¹ Ta e Ana molisaili gia: Gazda, mo lio si veselo ande tute, soke tu de man zor. Me sai phandav o mui me dusmanonengo. Sem but veseli soke tu braduisarda man.

² ¡Niko inai santo sargo tu Devla! ¡Niko ni arakhel amen sargo tu! ¡Niko inai sargo tu!

³ Te na falilpe niko, soke o Del sa llanel, vou dikhel sa so cherel o manus, vou krisil e manuse.

⁴ Vou phagel o arko katar e zurale, ta del zor golen kai inai zurale.

⁵ Gola kai sea chalie, akana radin pala kotor marrno. Ta gola kai sea bokhale, akana si chalie. Ta e diskinie kai nasti avela len minone, akana efta droma maladol lenge, a goia kai sea la but chaurre, akana nasti aven la minone.

⁶ O Del del amen o meripe ta o zivoto. Cherel amen te fulia ando limori ta braduil amen letar.

⁷ O Del cherel amen barvale ta chorre. Mukel amen ando lallao ta bariarel amen.

⁸ O Del cherel te ustel o chorro, ta ikanel katar o llubri golen kai mangen esmola, ta thovel len maskar e bare te besen pe mai lache estoliche. Soke e Devleke si e direkura e phuviake, pe lende thoda e sueto.

⁹ Vou arakhel o phiripe katar e lache. A e bilache meren ando truniariko, soke lengi zor niso ni blazil lenge.

¹⁰ O Del ka zatril pe dusmanonen. Katar o miloso ka bichalel pe lende germipe. O Del ka krisil sa e sueto. Ka del zor pe charo, ta ka bariarel e zor goleki kai vou esvirisarda.

¹¹ Mapalal o Elkana irisailo kai po cher ando Rama, ta o Samuel achilo te radil e Devleke angla o popo o Eli.

O bilachipe katar e chaurre e Elieke

¹² E chaurre e Elieke sea bilache ta ni pinllarena e Devle,

¹³ ta ni chitilape lenge o rado e poponengo kai saia te cheren e foroke. Soke kana fiko cherela iek kurbano e Devleke, avela iek sluga katar o popo iekhe bare veliuskaia kana o mas chirola,

¹⁴ thovela e veliuska andre ande kavi ta ande chiai, ta sa sogo ikanela saia e popoke. Gia cherena suakone llenea katar e israelitura kai avena ando Silo.

¹⁵ Ta i kana saia te phabaren e khoi po altar, avela o sluga e popoko ta phenela e lleneke kai anela o kurbano: De man katar o mas te chiravav le e popoke, soke vou ni ka lel o mas peko.

¹⁶ Ta te phenela o lleno kai oma saia te phabaren e khoi ta mapalal te lel sogo kamela, o sluga phenela leke: ¡Iok, tu morabi te dele mande isto akana! O me pe zor ka lav le tutar.

¹⁷ Gia o bilachipe katar gala chave saia but baro, soke ni thovena sama katar e kurbanura kai sea e Devleke.

¹⁸ Ta o Samuel kai saia terno, saia furiado ande iek efod cherdo katar o lino, ta radila e Devleke.

¹⁹ Suako burs kana leki dei llala pe rromea te del kurbano e Devleke, anela leke iek gertachi kai isto voi cherdaia le.

²⁰ Ta o Eli molisailo pala o Elkana ta pala leki rromi, ta phenda leke: O Del te del tut chaurre katar gaia diskinia pala o gua minono kai voi dia e Devle. Mapalal irisaile kai po cher.

²¹ Ta o Del blagosisarda e Ana ta dia la trin chaurre ta dui chorra, ta o Samuel bariola angla o Del.

²² O Eli saia but phuro ta llanela sa so cherena ando Israel leke chaurre, ta i llanela kai von sovena e diskinienchar kai arakhena o than kai delpe ande chara e Devleki.

²³ Ta vou phenda lenge: ¿Soke tumen cheren gia? Sa o foro phenda mange so cheren tumen.

²⁴ Chavalen, inai sukar so phenel tumendar o foro e Devleko, soke cheren e foro te cherel o bilachipe.

²⁵ Te si iek lleno kai cherel o bilachipe avereke, e krisaria sai lacharen leki dos. A te si fiko kai joliavel e Devle, ¿ko ka lacharel leki dos? A von ni thode sama so phenda lengo dad, soke o Del mangla te mundarel len.

²⁶ A o chavo o Samuel bariola ta saia orta e Devlea ta i e llenenchar.

²⁷ Iek profeta avilo te dikhel e Elie ta phenda leke: O Del phenda gia: ¿Ni sikadilem che dadenge kana von sea ando Ejipto ta radina e Faraonoke?

²⁸ Ta maskar sa e viche katar o Israel esvirisardem tumare vicha te aven me popura, te sai den kurbanura pe mo altar, te phabaren o taimano, te inllaren o efod angla ma. Ta i diem tumare vicha sa e ezgode kai e israelitura dena man.

²⁹ ¿Soke tumen ustaven me kurbanura ta me ezgode dine kai me phendem te den len ande e chara e Devleki? ¿Soke de liubao mai but che chaurren neko man? Tu chere te aven che chaurre thule katar e mai sukar ezgode dine kai del mo foro o Israel.

³⁰ Goleke o Del katar o Israel kai phenda kai tu ta chi familia ka llan angla ma ostade, akana phenel gia: Nikada ni ka cherav so phendem chuke, soke me ka dav liubao golen kai ka den man liubao, a gola llene kai ni ka den man liubao, me ka cherav te achen ando lallao. Me o Del, phenav le.

³¹ Akana avel o vreme kana ka lav tutar chi zor ta e zor katar chi familia, ta niko lendar ni ka resel te avel phuro.

³² Ka dikhe sar chi familia ka achel ando lallao, a me ka pherav barvalipe e Israele. Nikada ni ka aven phure ande chi familia.

³³ A ka mukav nesaven lendar pasa mo altar, samo te patin tut ta te dukhaven tut. Sa gola kai ka biandon ande chi familia ka meren terne.

³⁴ Ta galea ka llane kai sa so phendem chuke ka avel pe tu: Che dui chave, o Ofni ta o Finees, isto ande gua llive e dui ka meren.

³⁵ Mapalal ka thovav iek popo chachuno ta orta kai ka radil mange chachimaia. Me ka dav le iek familia zurali, ta ka llal angla o charo kai me ka esviriv.

³⁶ Ta o lleno katar chi familia kai ka achel llundo, ka mangel letar gachinoni tolaria ta kotor marrno, ta ka molilpe leke te del le rado maskar e popura te avel le so te jal.