1 Samuel 16 - Biblia ande chib Romani

O David si thodo charo

¹ O Del phenda e Samueleke: ¿Gachin ios ka rove pala o Saul kana me chudiem le te na avel o charo ando Israel? Pher chi sing zeitino ta aide. Ka bichalav tut kai o Isai katar o Belen, soke maskar leke chave esvirisardem iekhe llene te avel o charo.

² A o Samuel puchla: ¿A sar ka llav? Te llanel le o Saul, ka mundarel man. Ta o Del phenda leke: Le chuke iek telcha ta phen kai lla te chere mange iek kurbano.

³ Ka ikhare e Isaie po kurbano ta me ka phenav chuke so morabi te chere. Ka thove o zeitino po lleno kai me ka phenav chuke.

⁴ O Samuel cherda so phenda leke o Del. Kana avilo ando Belen e phure katar o foro likiste daraia te maladon lea, ta puchle le: ¿Avilan ande pas?

⁵ Ta o Samuel phenda lenge: Ea, me avav te cherav iek kurbano e Devleke. Suako tumendar te chistolpe te sai llal manchar po kurbano. Mapalal chistosarda e Isaie, leke chaven, ta ikharda len po kurbano.

⁶ Ta kana von avile, o Samuel dikhla e Eliabe ta mislisailo: Chachipe si kai gava si o lleno kai o Del esvirisarda te avel o charo.

⁷ Ta o Del phenda e Samueleke: Na dik le sar dikhol ta kai si baro, soke gole llene ni esvirisardem. O manus dikhel samo so si angla leke akha, a o Del dikhel so si ande leko lio.

⁸ Ondaka o Isai ikharda e Abinadabe ta anda le kai o Samuel. A o Samuel phenda: Ni gole llene ni esvirisarda o Del.

⁹ Mapalal o Isai anda e Samae. Ta o Samuel phenda: Ni gole ni esvirisarda o Del.

¹⁰ Ta o Isai anda pe efta chaven angla o Samuel. A o Samuel phenda e Jeseke kai o Del ni esvirisarda ni iekhe lendar.

¹¹ Ta o Samuel puchla e Jesee: ¿Inai tut ios chave? Ta o Isai phenda leke: Achel man iek ios, o mai terno kai inai kate soke arakhel e bakren. Ta o Samuel phenda: Lla ta ikhar le, soke ni ka chera o kurbano lligo ni ka avel vou.

¹² O Isai bichalda te ikharen le ta ande le. Ta o chaurro saia but sukar, leke bal sea sargo lole ta but sukar leke akha. Ta o Del phenda e Samueleke: Uste, ta thov pe lete o zeitino soke vou si.

¹³ Ta o Samuel lia e sing e zeitinoki ta thoda o zeitino po David maskar leke phlal. Sar kotar angle o duo e Devleko avilo po David. Ta o Samuel irisailo kai po cher ande Rama.

O David radil e Sauleke

¹⁴ Ta o duo e Devleko mukla e Saule. Ta iek duo bilacho kai avela e Devletar patila le.

¹⁵ Ondaka e sluge katar o Saul phende leke: Dik, iek duo bilacho kai avel e Devletar patil tut.

¹⁶ Goleke bichal che slugen te roden iekhe llene kai llanel te basalel e arpa, gia kana ka avel pale pe tute o duo bilacho katar o Del, gua lleno ka basalel chuke e arpa ta ka ache esmiro.

¹⁷ Ta o Saul phenda pe slugenge: Roden iekhe llene kai llanel te basalel sukar ta anen le karinga.

¹⁸ Ondaka iek katar e sluge phenda: Me dikhlem kai iek katar e chave e Jeseke kai zivil ando Belen llanel te basalel but sukar e arpa. Gua chavo si boñiko but tromano, del orba bizaimaia. Vou si sukar ta o Del si lea.

¹⁹ Ta o Saul bichalda llenen kai o Isai te phenen leke gia: Bichal mange che chave e Davide, gua kai arakhel e bakren.

²⁰ Ta o Isai thoda pe iek magarcho, marrno, iek morchi moliaki, iek busnorro ta bichalda len e Davidea kai o Saul.

²¹ Gia o David avilo kai o Saul ta achilo te radil leke. Ta o Saul volisarda le but, ta thoda le te arakhel leke ezgode marimake.

²² Ta o Saul bichalda llenen te phenen e Jeseke gia: Me moliv man chuke te muke e Davide mande, soke sem veselo kai vou si manchar.

²³ Ta kana o duo bilacho avela katar o Del po Saul, o David lela e arpa ta basalela, ta o Saul achela sasto, ta mukela le o duo bilacho.