1 Samuel 14 - Biblia ande chib Romani

O maripe katar o Jonatan

¹ Iek llive o Jonatan chavo e Sauleko, phenda pe slugake kai anela e ezgode marimake: Aide pe ogoia rig katar o pai te mara amen e filisteonenchar. Ta ni phenda le pe dadeke.

² Ta o Saul saia po than mai dur katar o burdo Gabaa, telal katar o kas kai si ando Migron. E llene kai sea lea sea preko sov stotine murusa.

³ Ta o lleno kai inllarela o efod saia o Ajias chavo katar o Ajitub phlal katar o Ikabod chavo katar o Finees, unuko katar o Eli. Ta o foro ni llanela kai o Jonatan lleloiatar.

⁴ Ta maskar e burdura kai o Jonatan mangela te nakhel karing o pero katar e filisteura sea dui pechine bare. Iekha ikharena la Boses, ta ogoia ikharena la Sene.

⁵ Iek pechina saia karing o norte angla o Mikmas, a ogoia saia karing o sur angla o Gabaa.

⁶ Ta o Jonatan phenda pe slugake: Aide pe ogoia rig kote kai si o pero katar e llene kai blagosin avere delen. Sai avelpe kai o Del ka pomozil amen, soke leke inai trudno te braduil bute llenenchar o gachinone llenenchar.

⁷ Ta leko sluga phenda e Jonataneke: Cher sogo kamea kai me ka pomoziv tut.

⁸ Ondaka o Jonatan phenda: Aide te nakha pe ogoia rig te sai dikhen amen.

⁹ Te phenena amenge gia: Achen kote lligo ni ka ava amen. Ni ka lla lende ta ka acha isto kote.

¹⁰ A te phenena amenge gia: Aven karinga, ondaka ka lla lende soke gua si kai o Del ka cherel te dobi len.

¹¹ Ondaka o Jonatan ta leko sluga cherde te dikhon, ta e filisteura phende: Dikhen sar e ebreura liken katar e pechine kai guruduna.

¹² Ta urkisarde e Jonataneke ta e slugake: ¡Aven karinga soke ka phena tumenge iek ezgoda! Ondaka o Jonatan phenda pe slugake: Aide, soke o Del ka cherel te dobin len o Israel.

¹³ Ta o Jonatan likisto upral po burdo pe vastenchar ta pe porrnenchar, palal avela leko sluga. E filisteura kai perena angla o Jonatan, o sluga mundarela len.

¹⁴ Kote o Jonatan ta leko sluga mundarde bis murusenpe iek than minono.

¹⁵ Ando pero katar e filisteura ta avri letar peli iek bari dar. Ta sa e boñikura ta i gola kai prezona daraile. E phuv dermosaili, goleke ios mai but darana.

¹⁶ Ta e boñikura kai sea e Saulea dikhle katar o burdo o Benjamin sar e filisteura sea ande bari burkania ta prastena pe suako rig.

¹⁷ Ondaka o Saul phenda e llenenge kai sea lea: Llinen amare boñikonen te dikha ko amendar llelotar. Llinde e boñikonen ta dikhle kai o Jonatan ta leko sluga ni sea lenchar.

¹⁸ Ondaka o Saul phenda e Ajiaseke: An mange e arka e Devleki, soke ande gua vreme e arka e Devleki saia kai e israelitura.

¹⁹ Ta kana o Saul dela orba e popea, e burkania maskar e filisteura cherdili ios mai bari. Ta o Saul phenda e popoke: Achi, na an la.

²⁰ Ta o Saul chidia sa e foro ta llele te marenpe e filisteonenchar. Pala e burkania kai saia e filisteura mundarenape maskar pete e jarnienchar.

²¹ Ta e ebreura kai zivina but vreme maskar e filisteura, ta kai avilea ando pero katar e filisteura, thodepe e Saulea ta e Jonatanea te marenpe e filisteonenchar.

²² Ta e llene katar o Israel kai sea gurudine po burdo o Efrain, kana asunde kai e filisteura naslea, i von likiste te marenpe e filisteonenchar.

²³ Gia gua llive o Del braduisarda e Israele, ta o maripe reslo llik kai o Bet Aven.

O Saul jal sovel

²⁴ Gua llive e llene katar o Israel sea but chinie soke niko ni jalaia niso pala e sovel kai jalaia o Saul kana phenda: Vareko te jala fiso mai anglal te perel o kham, o mai anglal te dobiva me dusmanonen, proketo te avel. Goleke niko ando foro ni jala marrno.

²⁵ Ta sa o foro avilo ando iek vos. Kote saia aullin pe phuv.

²⁶ Kana dikhle o aullin kai llala sargo pai niko ni jala niso, soke darana katar e sovel kai jalaia o Saul.

²⁷ O Jonatan ni asundaia niso katar e sovel, goleke e kastea kai anela lia kotor aullin, jala ta bristosaile leke akha.

²⁸ Ondaka iek lleno phenda e Jonataneke: Cho dad cherda te jal sovel o foro ta phenda kai kogo jala vareso allive ka avel proketo. Goleke o foro ni saia len zor bokhatar.

²⁹ O Jonatan phenda: Mo dad cherel te diliaol o foro. Dik sar bristosaile me akha soke jalem cherricha aullin.

³⁰ ¿Ni avela zuralo o foro te jala allive so lia katar pe dusmanura? ¿Ni avela e zatrania maskar e filisteura ios mai bari?

³¹ Gua llive e israelitura dobisarde e filisteonen katar o Mikmas llik kai o Aialon. A o foro saia but chinio.

³² Ta o foro llelo te jal katar so lie katar e filisteura. Ta lie bakren, guruven ta guruvorren. Ta mundarde len pe phuv ta jale len e ratea.

³³ Ta nesave llene llele te phenen e Sauleke: O foro cherel o bilachipe angla o Del, soke jan mas e ratea. Ta o Saul phenda lenge: ¡Tumen sen dusmanura! Anen mange iek pechina bari.

³⁴ Ta i phenda o Saul: Llan kai suako lleno katar o foro te phenel lenge te anel suako lleno po guruv ta po bakro te mundarel len kate. Ta na jan o mas e ratea soke gua si iek bilachipe angla o Del. Ta isto goia riat suako lleno katar o foro anda po guruv ta mundarda le kote.

³⁵ Ta o Saul vazdia iek altar e Devleke. Gava saia o purvo altar kai o Saul vazdia e Devleke.

³⁶ Ta o Saul phenda: Aide orachaia te mara amen e filisteonenchar, ta ka la lenge ezgode llik kai e thiarin, ta ka mundara saurren. Ta saurre phende: Cher sogo kamea. A o popo phenda: Mai anglal si te pucha e Devle.

³⁷ Ondaka o Saul puchla e Devle: ¿Morabi te llav kai e filisteura? ¿Ka de len ande va katar e israelitura? A o Del ni phenda leke niso gua llive.

³⁸ Ta o Saul phenda: Aven karinga sa e gazda katar e boñikura te dikhen ko cherda gava bilachipe allive,

³⁹ soke jav sovel ando anav e Devleko katar o Israel, i te avela mo chaurro o Jonatan kai cherda o bilachipe, ka merel. Ta niko ando foro ni phenda leke niso.

⁴⁰ Mapalal phenda sa e llenenge katar o Israel: Thoven tumen pe goia rig. A me ta mo chaurro o Jonatan ka thova amen pe gaia rig. E boñikura phende leke: Cher sogo kamea.

⁴¹ Ta o Saul phenda e Devleke: Phen amenge Devla, ko ka achel. Ta achile o Jonatan ta o Saul, ta o foro likisto braduime.

⁴² Ta o Saul phenda: Dikhen akana ko ka achel maskar mo chaurro o Jonatan, ta me. Ta achilo o Jonatan.

⁴³ Ondaka o Saul phenda e Jonataneke: Phen mange so cherdan. Ta o Jonatan phenda e Sauleke: De istina si kai ikandem cherricha aullin e kastea kai anava, ta jalem, ¿ta pala gua ka merav?

⁴⁴ Ta o Saul phenda leke: ¡Te dukhavel man zurale o Del te na mundarava tut, Jonatan!

⁴⁵ Ta o foro phenda e Sauleke: ¡Sar ka merel o Jonatan kana cherda te dobil o Israel! Ni ka avelpe gia. Te na del o Del te perel pe phuv ni iek bal e Jonataneko, soke so cherda allive, cherda le e Devlea. Gua llive o foro ni mukla te merel o Jonatan.

⁴⁶ Ta o Saul mukla e filisteonen, ta e filisteura irisaile kai pi phuv.

⁴⁷ Kana o Saul cherdilo baro charo ando Israel, mardape pe dusmanonenchar kai sea truial: E forura katar o Moab, o Amon, ta o Edom. Ta i mardape e charonenchar katar e phuv kai ikhardol Soba, ta mardape e filisteonenchar. Ta kaigo llala o Saul te marelpe, dobila.

⁴⁸ Ta o Saul chidia boñikonen ta dobisarda e Amaleke, ta braduisarda e Israele katar e chorane.

⁴⁹ Ta e chave katar o Saul sea o Jonatan, o Isui ta o Malkisua. Ta e anava katar leke chorra sea Merab, kai saia e mai purani, ta e Mikal kai saia e mai terni.

⁵⁰ Ta e rromi e Sauleki saia e Ajinoam, kai saia e chorri katar o Ajimaaz. O gazda katar e boñikura ikhardola Abner kai saia chavo katar o Ner, a o Ner saia o kako katar o Saul.

⁵¹ O dad katar o Saul saia o Kis, ta o dad katar o Abner saia o Ner kai sea chave katar o Abiel.

⁵² Ta ande sa e llivesa katar o Saul saia baro maripe e filisteonenchar, goleke suako murus kai o Saul dikhela le zuralo, lela le te avel boñiko.