1 Samuel 13 - Biblia ande chib Romani

O maripe e filisteonenchar

¹ O Saul saia baro kana thode le te charoil ando Israel. Ta kana nakhle dui burs katar leko gazdaripe,

² esvirisarda trin milie murusen katar o Israel. Dui milie lendar sea ando Mikmas ta pe burdura katar o Betel. Milia lendar sea e Jonatanea ando Gabaa katar o Benjamin. A ogole llenenge katar o foro phenda te llaltar suako lleno kai pi chara.

³ Ta o Jonatan mardape e filisteonenchar kai sea logle pe burdura. Ta sa e filisteura llangle so cherda o Jonatan. Ondaka o Saul phenda te basalen e tuturuge pe sa e phuv te sai llanen le e ebreura,

⁴ ta sa o foro katar o Israel asunda so avilape, ta phenena: O Saul dia pe filisteura, goleke e filisteura murzin po Israel. Ta o foro chidinailo e Saulea ando Gilgal.

⁵ Ondaka e filisteura chidinaile te marenpe e israelitonenchar. E filisteura inllarena tranda milie bordona, sov milie murusa kai llana pe gra ta but sueto, gachin sargo e chisai e moraki. Mapalal logle ando Mikmas pe rig kai likel o kham katar o Bet Aven.

⁶ Ta kana e llene katar o Israel dikhle kai e filisteura sea mai but neko von ta kai nasti dobina len, gurudile pe burdura maskar e pechine ta ande bunaria.

⁷ Ta but lendar nakhle o pai katar o Jordan te nasen ande phuv katar o Gad ta katar o Galaad. O Saul achilo ando Gilgal, ta sa o foro kai llala pala le izdrala daratar.

⁸ O Saul aduricharda efta llive, sar phendaia leke o Samuel. A o Samuel ni avela ando Gilgal, ta e llene kai sea e Saulea thodepe te nasen.

⁹ Ondaka o Saul phenda: Anen mange zivirinie te chera kurbano phabardo e Devleke, ta ofrende pala e pas. Ondaka o Saul cherda o kurbano phabardo e Devleke.

¹⁰ Ta kana o Saul cherela o kurbano phabardo, avilo o Samuel. Ta o Saul llelo te del orba lea.

¹¹ O Samuel puchla le: ¿Soke cherdan gia? Ta o Saul phenda e Samueleke: Soke dikhlem kai e llene kai sea manchar naslea a tu ni avea ando vreme kai phendan mange, ta e filisteura sea chidine ando Mikmas.

¹² Goleke mislisailem: Akana ka aven e filisteura te marenpe manchar ando Gilgal, ta me ni manglem e Devletar te pomozil man. Goleke cherdem o kurbano phabardo.

¹³ Ondaka o Samuel phenda e Sauleke: Iek baro dilipe cherdan, soke ni cherdan e volia e Devleki. Te cherdana so phenda chuke o Del, vou cherdaia te achel ostade cho gazdaripe ando Israel.

¹⁴ A akana cho gazdaripe ni ka achel but vreme. O Del rodia iekhe llene kai si orta angla le. Le ka thovel gazda po foro, soke tu ni cherdan leki volia.

¹⁵ Ondaka o Samuel llelotar ando Gilgal kai e phuv katar o Benjamin. Ta o Saul llinda e llenen kai sea lea, ta sea preko sov stotine murusa.

¹⁶ O Saul ta leko chavo o Jonatan ta e llene kai sea lenchar, achile ando Gabaa kai e phuv katar o Benjamin. A e filisteura sea logle ando Mikmas.

¹⁷ Ta e filisteura kai sea logle ando Mikmas fuladile pe trin, iek katar e trin llele ando Ofra ande phuv katar o Sual,

¹⁸ ogola llele ando Bet Joron, ta e aver llele po burdo kai si ande bari umal katar o Zeboim, po drom kai llal karing o pusto.

¹⁹ Ta ande sa e phuv katar o Israel niko ni radila ande ezgode sastrune soke e filisteura darana te cheren e ebreura jarnie o churia.

²⁰ Goleke sa e llene katar o Israel saia te llan kai e filisteura te lacharen lenge churia ta lenge ezgode te sai radin e phuv.

²¹ Ta e filisteura mangena but love te ostron ta te lacharen sa lenge ezgode sastrune kai radina lenchar e phuv.

²² Gia e llene kai sea e Saulea ta e Jonatanea, ni sea len ni iek jarni ta ni iek churi te marenpe e filisteonenchar. Samo e Saule ta e Jonatane sai len.

²³ A nesave boñikura katar e filisteura avile po drom katar o Mikmas.