1 Samuel 12 - Biblia ande chib Romani

O Samuel del orba e foroke

¹ Mapalal o Samuel phenda sa e llenenge katar o Israel: Me asundem sa so tumen phenden mange ta thodem tumenge iek charo, sar tumen mangena.

² Etalo kate tumaro charo. Me phurilem, me bal parrnile, a me chave si tumenchar. Me sar kana sema terno gazdarisardem pe tumende llik akana.

³ Kate sem me. Fiko te phenel angla o Del ta angla tumaro charo dal liem tumendar iek guruv, o liem iek magarcho, o diem orba kojamni fikatar, o cherdem bilachipe fikake, o pochinda mange vareko te chinav iek kris bangi. Te si gia, me ka iriv e love.

⁴ Ondaka saurre phende leke: Nikada ni cherdan amenge bilachipe, ta nikada ni lian love kojaimaia.

⁵ A o Samuel phenda lenge: O Del ta leko charo dikhen akana kai tumen ni malaven niso bilacho mandar. A von phende leke: Gua si o chachipe.

⁶ Ondaka o Samuel phenda e foroke: O Del kai ikharda e Moisese ta i e Aarone te aven leke sluge. Kai ikanda tumare daden katar o Ejipto, vou dikhel akana.

⁷ Goleke asunen man, soke akana ka phenav tumenge pe gachin droma o Del braduisarda tumare daden ta i tumen.

⁸ Kana o Jakob dia ando Ejipto, tumare dada urkindo ikharde e Devle soke e ejipsiura patina len, ta o Del bichalda e Moisese ta e Aarone, kai ikande tumare daden katar e phuv katar o Ejipto, ta cherde len te zivin pe gaia phuv.

⁹ A von bristardepe e Devletar, ta o Del dukhada len e Sisaraea, kai saia gazda e boñikonengo katar o charo Jabin, kai saia katar e phuv katar o Jazor. Ta dukhada len e filisteonenchar, ta dukhada len e charoia katar e phuv katar o Moab. Sa gala avile te marenpe lenchar.

¹⁰ A von mangle urkindo e Devletar, ta phende: Amen cherdam o bilachipe soke muklam e Devle ta blagosisardam avere delen kai ikhardon Baal ta Astarot. Ta von molisaile e Devleke te braduil len katar lenge dusmanura, ta achile pe orba kai ka blagosin samo e Devle.

¹¹ Ondaka o Del bichalda e Jerubaale, e Barake, e Jeftee ta e Samuele te braduil tumen katar tumare dusmanura kai sea truial. Mapalal tumen zivisarden esmiro.

¹² Kana tumen dikhlen kai o Najas, kai saia charo katar e amonitura, avilo te marelpe tumenchar, tumen phenden mange: Iok, amen manga te gazdaril pe amende iek charo. Ta o Del si tumaro chachuno charo.

¹³ Ta etalo kate o charo kai mangena tumen. Dikhen sar o Del thoda iek charo pe tumende.

¹⁴ Te si kai tumen blagosin e Devle, asunen leke alava. Cheren leki volia, ta tumen ta o charo kai charoil pe tumende, samo blagosin e Devle. Te si gia, ka cheren o lachipe.

¹⁵ A te si kai ni ka asunen e Devleke alava ta ni ka kanden le, ondaka o va e Devleko ka perel pe tumende gia sar saia pe tumare dada.

¹⁶ Achen akana te dikhen e bari ezgoda kai ka cherel o Del angla tumare akha.

¹⁷ ¿Inai akana o vreme kana chiden o lliu? Me ka ikharav e Devle, ta vou ka cherel te germil ta te delpeke, te dikhen ta te llanen kai tumaro bilachipe kai cherden angla o Del si but baro, soke tumen manglen iek charo.

¹⁸ Ta o Samuel molisailo e Devleke, ta o Del cherda te germil ta te delpeke gua llive. Ta sa o foro darailo but katar o Del ta katar o Samuel.

¹⁹ Ondaka sa o foro phenda e Samueleke: Molisao e Devleke pala amende, te na mera. Soke pe sa o bilachipe kai cherdam, aver bilachipe cherdam, kai amen manglam iek charo.

²⁰ Ta o Samuel phenda e foroke: Na daran. De istina si kai tumen cherden gava bilachipe. Na muken e Devle, blagosisaren le sa tumare liea.

²¹ Na blagosisaren e delen kojamne kai nasti braduin, soke von inai niso.

²² Soke o Del ni mukel pe foro pala po baro anav. O Del mangla te aven tumen leko foro.

²³ Goleke te na del o Del te mukau te moliv man pala tumende, ta te sikavav tumen o drom orta ta chacho.

²⁴ Goleke daran e Devletar ta blagosin le sa tumaro liea pala e bare ezgode kai vou cherda tumenge.

²⁵ A te cheren o bilachipe, tumen ta tumaro charo ka meren.