1 Samuel 10 - Biblia ande chib Romani

O Saul charo katar o Israel

¹ Ondaka o Samuel lia iek taso zeitino ta thoda o zeitino po soro e Sauleko, chumidia le ta phenda leke: O Del thoda tut gazda po foro Israel.

² Allive kana ka llatar ka malave duie llenen pasa o limori katar e Rakel kai achel ando Selsa, ande phuv katar o Benjamin. Von ka phenen chuke kai malade e magarche kai jasaile ta kai cho dad akana ni brigilpe pala e magarche, soke akana brigilpe pala tumende ta puchel so sai cherel pala tu.

³ Ta kana ka lla angle ta ka ave kai o kas katar o Tabor, kote ka dikhe trin llene kai llan ando Betel te blagosin e Devle. Iek lendar inllarel trin busne, o gua inllarel trin marrne, a o gua inllarel iek morchi mol,

⁴ von ka puchen tut sar san, ta ka den tut dui marrne kai tu ka le lendar.

⁵ Mapalal ka ave ando foro kai ikharen le Burdo e Devleko, kote kai si o cher katar e boñikura katar e filisteura. Kana ka de ando foro ka dikhe nesave poraukura kai aven katar o cher e molimako, ta angla lende llan llene kai basalen o salterio, o pandero, e tuturuga ta e arpa, a e poraukura poraukin.

⁶ Ondaka o duo e Devleko ka avel pe tu but zurale ta ka porauki lenchar, ta ka cherdo aver lleno.

⁷ Ta kana ka nakhen sa gala ezgode, cher sogo misli tu, soke o Del si tuia.

⁸ Mapalal ka lla angla ma ando o Gilgal, ta me ka llav tute te dav kurbanura phabarde e Devleke, ta te dav ofrende pala e pas. Tu achi kote efta llive lligo ni ka avav tute, ta me ka phenav chuke so morabi te chere.

⁹ Ta samo llelotar o Samuel, o Del pharruda o lio e Sauleko, ta cherdila sa so phenda o Samuel.

¹⁰ Kana o Saul ta leko sluga avile po burdo, avile nesave poraukura ta o duo e Devleko avilo po Saul. Ondaka o Saul thodape te poraukil gia sar cherena le e poraukura.

¹¹ Ta e llene kai pinllarena e Saule dikhle kai vou profetisila e profetonenchar ta phenena iek avereke: ¿So si e chaurreke katar o Kis? ¿I o Saul si profeta?

¹² Ta aver lleno puchla: ¿Ko si lengo dad? Goleke sar kotar phenen: ¿I o Saul si profeta maskar lende?

¹³ Ta kana o Saul mukla te poraukil, avilo po than vazdino.

¹⁴ Ondaka iek kako e Sauleko puchla e Saule ta leke sluga: ¿Kai llelen? A o Saul phenda leke: Llelam te roda e magarche kai jasaile, ta sar ni maladam len llelam te dikha e Samuele.

¹⁵ Ta e Sauleko kako puchla le: ¿A so phenda tumenge o Samuel? Phen le mange, me moliv man chuke.

¹⁶ O Saul phenda pe kakoke: O Samuel phenda amenge kai malade e magarche kai jasaile. A e orba katar e charoina kai sikada le o Samuel, ni phenda leke niso.

¹⁷ Mapalal o Samuel ikharda e foro te blagosin e Devle ande Mizpa,

¹⁸ ta phenda lenge: Gia phenel o Del e Israeleko: Me ikandem tumen katar e phuv katar o Ejipto, ta braduisardem tumen katar ejipsiura ta i katar sa e forura kai patisarde tumen.

¹⁹ Ta akana tumen muken e Devle kai braduisarda tumen katar e brige bare. Tumen phenen kai mangen iek charo te sai gazdaril pe tumende. Goleke aven angla o Del sa tumare viche, ta sa tumare familie.

²⁰ Ta o Samuel chidia sa e viche katar o Israel, ta ikharde e vicha katar o Benjamin.

²¹ Ta o Samuel phenda te aven sa e llene katar e vicha katar o Benjamin, ta maskar sa e familie katar gaia vicha, ikharde e familia katar o Matri. Ta katar gaia familia ikharde e Saule chavo katar o Kis, a e Saule ni malade le.

²² Ondaka puchle e Devle kai saia o Saul. Ta o Del phenda kai o Saul saia gurudino maskar e ezgode kai anena.

²³ Ondaka prastie lete ta ikande le kotar. Kana o Saul saia maskar lende, dikhola mai baro neko sa e llene.

²⁴ Ta o Samuel phenda sa e foroke: ¿Dikhen tumen ka esvirisarda o Del te avel tumaro charo? ¡Niko ando foro inai sargo vou! Ta o foro urkisarda. ¡Blagosime te avel o charo!

²⁵ O Samuel sikada e foroke e zakonura katar e charoina, pisisarda len pe iek lil ta guruda len angla o Del.

²⁶ Mapalal o Samuel phenda saurrenge te llantar chere. I o Saul llelotar kai po cher ando Gabaa, ta llele lea llene tromane kai o Del pharrudaia lengo lio.

²⁷ A sea llene bilache kai phende gia: ¿Gava ka braduil amen? Ta die orba bilachi letar ta ni die le liubao.