1 Samuel 1 - Biblia ande chib Romani

O Del dia e Ana iek minono

¹ Saia iek lleno kai zivila ando foro Ramataim katar o Zofim kai achel po burdo katar o Efrain. Leko anav saia Elkana chavo katar o Jeroam, chavo katar o Eliu, chavo katar o Toju, chavo katar o Zuf, katar e phuv Efrata.

² Ta o Elkana saia le dui rromia, iek ikhardola Ana a ogoia ikhardola Penina. Ta e Penina sea la minone a e Ana ni sea la minone.

³ Ta o Elkana suako burs llala ando Silo te blagosil e Devle kai si le sa e zor, ta te del kurbano. Ta kote sea e dui chaurre katar o Eli, o Ofni ta o Finees kai sea popura e Devleke.

⁴ Ta kana o Elkana anela o kurbano e Devleke, dela e Penina ta lake chaven suakone iek kotor.

⁵ A o kotor mai baro dela e Ana soke volila la, makar o Del ni diaia la porodo.

⁶ Goleke e Penina, kai saia laki dusmanka, dela la joli ta cherela la te tristolpe soke o Del ni dela la chaurre.

⁷ Ta gia cherela le suako burs. Kana llala kai o cher e Devleko, dela la joli. Goleke e Ana rovela ta ni jala.

⁸ Ta o Elkana lako rrom phenda lake gia: Ana, ¿soke rove? ¿soke ni ja? ¿soke cho lio si gia tristome? ¿Ni sem me chuke mai lacho neko des chaurre?

⁹ Mapalal kana e Ana jala ta pila ando Silo, ustili. Ta o Eli o popo e Devleko, besela pe estolicha po udar katar o cher e Devleko.

¹⁰ Ta voi tristome ande po lio molilape rovindo e Devleke,

¹¹ ta jala sovel ta phenda e Devleke: Ioi Devla kai si tut sa e zor, te mangea te dikhe gia bari patnia nakhel chi sluga, ta te dea tut golli mandar, te na bristarea tut katar chi sluga, ta te dea la iek minono, me ka dav le e Devleke sogo zivila ta nikada ni ka chinel pe bal.

¹² Ta soke voi but molilape e Devleke, o Eli thoda sama pe lako mui.

¹³ A e Ana dela orba ande po lio ta samo lako mui miskolape, ta lako avazi ni asundola, goleke o Eli mislisailo kai voi saia mati,

¹⁴ ta phenda lake: ¿Pe gachin ios ka ave mati? ¡tradosao!

¹⁵ A e Ana phenda leke: Iok gazda, inai gia. Me sem iek chei but dukhadi, ni pilem mol ni rachia, samo putardem mo lio e Devleke.

¹⁶ Na mislisao kai chi sluga si iek bilachi diskinia, soke pala e bari patnia kai nakhav dav orba.

¹⁷ Ta o Eli phenda lake: Lla esmiro, ta o Del katar o Israel te del tut so manglan letar.

¹⁸ A voi phenda: Dik pe chi sluga lachimaia. Ta llelitar po drom. Ondaka thodape te jal ta liape latar o tristope.

¹⁹ Kana ustile thiarinako rano, thodepe changenchar ta blagosisarde e Devle ta irisaile ando Rama. Ta o Elkana souto pe rromiaia, ta o Del diape golli latar.

²⁰ Ta e Ana achili khamni ta kana avilo o vreme maladila lake iek minono, ta thoda leko anav Samuel, soke phenda: Manglem le e Devletar.

²¹ Mapalal o Elkana llelo pe familiaia te del e ofrenda e Devleke kai delpe suako burs ta te cheren so jale sovel,

²² a e Ana ni likisti soke phenda pe rromeke: Ni ka llav lligo ni ka mukel o kolin o minono. Ondaka ka inllarav le te dav le e Devleke ta te achel incha sa po zivoto.

²³ Ta o Elkana phenda lake: Cher sar tu mangea. Achi kate lligo ni ka mukel o kolin o minono, ta o Del te cherel chuke gia sar phenda. Gia voi achili e minonea llik kana o minono mukla o kolin.

²⁴ Ta kana voi lia letar o kolin, anda le kai o cher e Devleko ando Silo. Ta anda pea trin guruvorra, bis kile arina, ta iek piri mol.

²⁵ Mundarde iek guruvorro ta inllarde e minone kai o Eli.

²⁶ Ta e Ana phenda: ¡Te ave blagosime gazda! Me sem goia diskinia kai molilape e Devleke pasa tu.

²⁷ Me manglem e Devletar iek minono, ta vou dia le mange.

²⁸ Goleke akana me dav le e Devleke te radil leke sa po zivoto. Ta die changa ta blagosisarde e Devle.