1 Relles 8 - Biblia ande chib Romani

E arka e Devleki si thodi ando cher e Devleko

¹ Ondaka o Salomon ikharda e phuren katar o Israel, e gazden katar sa e viche, ta e mai preche llenen katar sa e familie katar o Israel, te anen e arka e Devleki katar o foro e Davideko, kai gua si o Sion.

² Ta ando chon Etanim kai si o eftato chon, chidinaile sa e murusa katar o Israel e charoia e Salomonoia.

³ Ta avile sa e phure katar o Israel, ta e popura lie e arka,

⁴ ta e popura ta e levitura ande e arka ta e chara e Devleki, ta sa e ezgode chinade e Devleke kai sea ande chara.

⁵ O Salomon ta sa o foro katar o Israel chidinaile angla e arka, ta die bakren ta guruven kurbano e Devleke, gachin kai nasti llindona.

⁶ Ta e popura thode e arka katar o Del o Gazda pe po than, ando cher e Devleko, ando than santisimo, telal tala e pakha katar e kerubinura.

⁷ E kerubinura sea inzarde lenge pakha upral po than kai saia e arka, gia ucharena e arka ta lake pulsura.

⁸ A e pulsura sea gia bare kai dikhona katar o Than santo kai si angla o than santisimo, a nasti dikhena len avriatar. Ta gia achile llik allive.

⁹ Andre ande arka samo sea e dui kotora barrustune kai o Moises thoda len ande arka po burdo o Joreb. Gala sea e kotora barrustune kana o Del dia po alav e llenenge katar o Israel, kana likiste katar o Ejipto.

¹⁰ Ta kana e popura likiste katar o Than santo, o oblako pherda o cher e Devleko.

¹¹ Ta e popura nasti achile te sai cheren o rado e Devleke pala o oblako, soke e zor e Devleki pherda o cher e Devleko.

O Salomon chinavel o cher e Devleko

¹² Ondaka o Salomon phenda: Tu Devla phendan kai zivi ande tufina katar o oblako.

¹³ A me vazdiem chuke iek cher te sai zivi, iek than te sai zivi kote ostade.

¹⁴ Mapalal o charo boldinailo karing o foro ta blagosisarda e llenen katar o Israel, ta sa o foro saia pe porrne.

¹⁵ Ta phenda: Blagosime te avel o Del e Israeleko, kai cherda prema po alav kai dia me dade e Davide, kana phenda leke:

¹⁶ Sar kana ikandem me foro o Israel katar o Ejipto, ni esvirisardem ni iekhe foro katar sa e viche e Israeleke te sai vazden mange iek cher, te avel mo anav ande le. A esvirisardem e Davide te sai gazdaril pe mo foro.

¹⁷ Ta o David, mo dad mangla te vazdel cher te blagosin e Devleko anav, o Del e Israeleko.

¹⁸ A o Del phenda me dadeke: Sukar si kai mange te vazde iek cher te blagosin mo anav,

¹⁹ a tu ni ka vazde mange iek cher te blagosin mo anav, cho chavo ka cherel le.

²⁰ Ta o Del cherda so achilo po alav, soke thoda man po than me dadeko o David, ta beslem po trono katar o Israel, isto gia sar phenda le o Del, ta vazdiem cher e Devleke, o Del e Israeleko.

²¹ Ta thodem ande lete e arka kai andre si o alav kai o Del dia amare puranen, kana ikanda len katar o Ejipto.

²² Ondaka o Salomon thodape angla o altar e Devleko, ta inzarda po va karing o miloso, ta sa o foro dikhena le,

²³ ta phenda: Devla, o Del e Israeleko, inai ando miloso ta ande phuv ni iek Del sargo tu kai chere so ache po alav, ta kai si chuke zalba e llenendar kai llan orta angla tu sa pe liea,

²⁴ kai cherdan so achilan po alav me dadea e Davidea. Che muiea phendan le ta che vastea cherdan le, sargo allive.

²⁵ Goleke Devla, cher so jalan sovel che slugake o David mo dad, kai suako drom ka avel iek murus te besel po trono katar o Israel, samo te llan orta angla tu sar cherda le mo dad.

²⁶ Akana Devla katar o Israel cher o alav kai dian me dade e Davide.

²⁷ A ¿si istina kai o Del ka zivil pe phuv? Soke o miloso katar o miloso ni resen chuke. ¿Sar ka resel chuke o cher kai me vazdiem chuke?

²⁸ Asun man Devla so mangel tutar cho sluga allive.

²⁹ Na muk te dikhe pe gava cher ni ollivesea ta ni orachaia, soke gava cher si o than kai tu phendan: Mo anav ka avel kote. Asun o molipe katar cho sluga kai cherel pe gava than.

³⁰ Asun o molipe katar cho sluga ta katar cho foro o Israel. Kana ka molinpe pe gava than tu ka asune len ando miloso, kote kai zivi. Asun ta prostisar amen.

³¹ Fiko te cherela o bilachipe pe phlaleke, ta pe zor anela le te jal sovel angla cho altar ande gava cher,

³² tu ka asune e milosotar ta ka krisi che slugen. Ka dukhave e bilache, ta ka chere te perel pe leko soro leko bilachipe. Ta e lache ka lline le chacho, prema leko lachipe.

³³ Te dobina e dusmanura e foro katar o Israel pala fisavo bilachipe kai cherde angla tu. Te irinape tute, te blagosina cho anav, ta te molinape chuke ande gava cher,

³⁴ asun len e milosotar ta prostisar len, ta cher te aven pale kai pi phuv kai tu dian lenge puranen.

³⁵ Te na delapeke soke cho foro cherda o bilachipe angla tu, ta te irilape tute, ta te molilape chuke ande gava cher kana ka dukhave le,

³⁶ tu ka asune len katar o miloso, ka prosti o bilachipe katar che sluge ta katar cho foro o Israel, ka sikave len o drom o lacho kai morabi te llan. Ondaka ka chere te delpeke pe gaia phuv kai dian che foro.

³⁷ Kana ka avel bok ande phuv, o kana ka aven muke, o ka sukon e patra pala but tatipe, o kana ka aven e langoste ta e pisoma. Kana ka aven e dusmanura pe amare forura ta te den pe lende, o kana ka avel fisavi aver ezgoda bilachi,

³⁸ asun suako molipe katar suako lleno, ta katar cho foro o Israel kai kana ka nakhen bari patnia ka inzaren pe va ando gava cher,

³⁹ tu ka asune katar o miloso kote kai zivi, ta ka prosti ta ka de suakone llene prema e ezgode kai cherda, ta prema so si ande leko lio, soke samo tu pinllare o lio e manusengo.

⁴⁰ Gia ka blagosin tut suako llive kai ka zivin pe phuv kai dian amare puranen.

⁴¹ Ta i o lleno kai inai katar cho foro o Israel, te avela duratar pala cho anav,

⁴² soke ka llanen katar cho baro anav, ta katar chi bari zor ta te molilpe gua lleno ande gava cher,

⁴³ tu ka asune katar o miloso kote kai zivi, ta ka chere sa so ka mangel tutar o lleno kai inai katar cho foro, te sai pinllaren cho anav sa e phuvia ta te blagosin tut, ta te acharen kai cho anav si blagosime ande gava cher kai me vazdiem.

⁴⁴ Te likela cho foro po maripe kaigo tu bichalela len, te molinape karing o foro kai tu esvirisardan ta o cher kai me vazdiem te blagosin cho anav,

⁴⁵ tu ka asune katar o miloso lengo molipe ta ka pomozi len te dobin.

⁴⁶ Ta te cherena o bilachipe angla tu, soke niko inai kai nikada ni cherel o bilachipe, ta ande joli cherea te dobin lenge dusmanura ta inllarena len phangle dur o pase katar lengi phuv,

⁴⁷ ta ande phuv kai von avena phangle, te irinape tute ta phenena angla tu kai cherde o bilachipe,

⁴⁸ ta te keinape sa pe liea ta sa e duoia ande phuv katar lenge dusmanura, ta te molinape chuke karing e phuv kai dian lenge puranen, karing o foro kai tu esvirisardan, ta karing o cher kai me vazdiem,

⁴⁹ tu ka asune lengo molipe ando miloso kote kai tu zivi, ta ka avel chuke zao lendar ta ka pomozi len.

⁵⁰ Ta ka prosti che foro katar sa o bilachipe kai cherde chuke, ta ka chere lenge dusmanura kai inllarde len phangle te avel lenge zao lendar,

⁵¹ soke von si cho foro kai tu ikandan katar o Ejipto, kai saia iek phuv sargo furnava kai bilaven o sastri.

⁵² Asun Devla o molipe katar cho sluga ta katar cho foro o Israel. ¡Asun amen Devla kana ka ikhara tut!

⁵³ Soke tu Devla esvirisardan len maskar sa e phuvia te aven cho foro, sar phendan le e Moiseseke kana ikandan amare puranen katar o Ejipto.

⁵⁴ Kana o Salomon getosarda pi orba ta te molilpe changenchar e Devleke angla o altar e Devleko, ta leke sea va inzarde karing o miloso,

⁵⁵ thodape pe porrne, blagosisarda e foro katar o Israel, ta bare avazea phenda:

⁵⁶ ¡Blagosime te avel o Del kai dia e pas pe foroke o Israel, sar achilo po alav! Sa so achilo po alav e Moisesea, cherda le.

⁵⁷ Te avel amenchar amaro Del isto gia sar saia amare puranenchar. Te na mukel amen, te na chudel amen,

⁵⁸ vou te cherel amare lie te aven lete, te sai chera leki volia, te guruva leko zakono kai dia amare puranen.

⁵⁹ Ta sa so manglem e Devletar ande gala alava, te aven pase letar, ollivesea ta orachaia, te arakhel pe sluga ta pe foro o Israel suako drom gia sar trubulpe,

⁶⁰ te sai llanen sa e phuvia kai tu Devla san o Del o chachuno ta kai inai aver.

⁶¹ Te aven tumare lie chache angla amaro Del, te cheren leki volia ta te guruven leko zakono, sargo allive.

⁶² Mapalal o charo ta sa o foro e Israeleko, die kurbanura e Devle.

⁶³ Ta o Salomon dia kurbanura e Devle bis ta dui milie guruva, ta stotina ta bis milie bakre, te sai prostil o Del. Ta gia si sar o charo ta sa o foro chinade o cher e Devleke.

⁶⁴ Isto gua llive o charo chinada o maskaral katar e bar kai saia angla o cher e Devleko, soke kote dia e kurbanura, e septelie dine ta e khoi katar e kurbanura te sai prostil o Del, soke o altar tuchno kai saia angla o Del saia gia minono kai ni resena ande lete e kurbanura phabarde, e septelie dine, ta o thulipe katar e kurbanura katar e pas.

⁶⁵ Ta o Salomon cherda slava ta lea sa o foro Israeleko, but baro sueto, katar o Jamat llik o pai katar o Ejipto, angla o Del cherda le efta llive, ta i cherda slave efta llive ios. Ta sa e llivesa katar e slava sea desustar.

⁶⁶ Ta pala e ojto llive o charo phenda e foroke te llantar, ta o foro blagosisarda e charo ta ande veselia pala e bare ezgode kai o Del cherda e Davideke, ta leke foroke o Israel, irisailo suako lleno kai po cher.