1 Relles 7 - Biblia ande chib Romani

Aver chera kai vazdia o Salomon

¹ Mapalal o Salomon vazdia po cher kai getosarda le ande desutrin burs.

² Ta i vazdia o cher kai ikharena le vos katar o Libano kai sea le saranda ta panch pole lungimatar, bis ta dui pole bulimatar ta desutrin pole vazdino. Ta saia thodo pe star fisie direkura kastune katar o sedro kai pe lende sea kasta thule katar o sedro.

³ Gala kasta sea saranda ta panch. Suako fisia saia la desupanch direkura cherde katar o sedro.

⁴ Sea trin sivke ande penllerave, suako penllerava angla aver.

⁵ Sa e udara ta e penllerave sea len star riga. Ta sa sea iek angla aver ande trin sivke.

⁶ Ta i cherda e soba kai ikharena la e soba katar e direkura, kai sea la bis ta dui pole ando lungipe, ta desutrin ta dopas pole ando bulipe. Ta angla gaia soba saia aver kai sea la direkura ta e kotora kastune upral.

⁷ Ta i cherda e soba te chinen e kris, ta marda la upral llik tele ande kotora kastune katar o sedro.

⁸ O cher kai zivila o Salomon saia le iek bar palal ta iek soba vazdini sargo o cher. Ta o cher kai vazdia e cheake katar o Faraon, kai saia leki rromi, saia le iek soba sargo e soba kaia saia palal katar o cher e Salomonko.

⁹ Sa e chera kai vazdia o Salomon sea cherde ande sukar barra, chinde prema e soba, angla, palal.

¹⁰ E barra kai saia telal sea bare ta but sukar. Sea len star ta dopas pole, ta averen trin pole ta sovardes sentimetrura.

¹¹ Upral sea barra sukar chinde prema o cher, ta kotora kastune katar o sedro.

¹² Truial katar e bar sea trin sivke ande sukar barra, ta iek sivka ande kotora kastune katar o sedro, ta i e bar kai saia andre, ta e barkatar o cher e Devleko.

O Salomon thovel e Jirame te radil

¹³ Ta o Salomon ikharda e Jirame te avel katar o Tiro.

¹⁴ O Jiram saia o chavo katar iek phivli ande vicha e Benjamineki ta iek lleno katar o Tiro kai radila ando tuch. O Jiram saia but bizai ta llanela sa o rado ande ezgode tuchne. Goleke avilo angla o charo o Salomon ta cherda sa po rado.

¹⁵ Bilada dui direkura tuchne kai sea len ojto pole vazdine, ta truial lendar saia iek thav kai sea len panch ta dopas pole.

¹⁶ Ta cherda dui ezgode tuchne kai dikhon sukar. Gala ezgode sea len dui pole ta bis ta panch sentimetrura llik upre, ta thoda len upral pe direkura.

¹⁷ Ta i cherda dui mreze kai dikhon sargo lanchura te sai thoven len upral pe direkura, efta ando suako direko.

¹⁸ Ta cherda dui sivke ta pe lende phabaia truial katar e mreza te sai ucharel e ezgode tuchne kai sea upral pe suako direko.

¹⁹ E ezgode sukar kai sea upral pe direkura ando udar, ta kai dikhona sargo lulunlla sea len dui pole.

²⁰ Upral katar suako direko sea dui stotine phabaia pe lende ande dui sivke, ta truial pe lende saia e mreza.

²¹ Gala direkura vazdia len po udar katar o cher e Devleko. Ta kana vazdia o direko pe rig e chachi, todha leko anav Jakin, a o direko kai vazdia pe rig stingo, thoda leko anav Boaz.

²² Ta upral pe direkura cherda liriura. Ta gia getosarda o rado katar e direkura.

E ezgode katar o cher

²³ Mapalal o Jiram cherda iek baro lelleno paieko tuchno. O lelleno saia sargo iek kolo, ta sea le star ta dopas pole llik upre. Truial letar saia iek thav kai sea le desutrin ta dopas pole.

²⁴ Truial telal katar o kurlo, cherda dui ezgode sukar kai dikhona sargo duduma, ande suako iek sea des ande suako saranda ta panch sentimetrura kai e lellenoia sea biladine isto ande iek than.

²⁵ Ta o lelleno saia thodo upral pe desudui guruva. Trin lendar dikhena karing o norte, trin karing perel o kham, trin karing o sur, ta trin karing likel o kham. Lenge porrne palune sea thode telal, ta o lelleno saia thodo pe lende.

²⁶ E pasuare katar o lelleno sea len trin naia sentimetro ando bulipe. Avrial dikhola sargo lulunllin, ta andre resena pe lete saranda ta star milie litrura pai.

²⁷ Ta i cherda des thana tuchne kai sea telal tala o lelleno, suako iek sea le iek pola ta ojtovardes sentimetrura ando lungipe ta ando bulipe, ta iek pola ta tranda sentimetrura llik upre.

²⁸ E porrne sea cherde gia. Sea len kotora kastune kai sea istarde maskar o kurlo.

²⁹ Ta gola kai sea istarde po kurlo, sea slike kai dikhona sargo lionura, guruva, ta kerubinura. Upral po kurlo e lionura ta e guruva, sea ezgode sukar kai dikhona sargo lulunlla.

³⁰ Suako porrno saia le star tochkura tuchne kai i o chilo saia tuchno. Ta saia le suako star riga telal repise tuchne lacharde ande ezgode sukar sargo lulunlla.

³¹ O mui e lellenoko saia andre ande iek bar kai le sea dui cheperkura llik upre. O mui e lellenoko saia sargo kolo, ta i pe lete sae slike ande star riga, na sargo kolo. O porrno kai saia thodo o mui e lellenoko sea le trin cheperkura ta dopas.

³² E star tochkura sea telal tala e kotora kastune, ta e tochkura sea thode pe direkura. E tochkura sea len trin cheperkura ta dopas.

³³ Ta e tochkura sea sargo e tochkura katar e bordona. O chilo katar o tochko, e ziche ta e kubura, sa sea tuchne.

³⁴ E star repise katar e star riga katar suako porrno cherena samo iek ezgoda.

³⁵ Upral katar e porrne saia iek ezgoda sargo kolo kai sea le bis ta dui sentimetrura ta dopas, ta upral katar e porrne sea lake alkave, ta e kasta kai likena isto latar.

³⁶ Ta o Jiram cherda kerubinura, lionura, ta palmere pe kasta ta pe alkave prema o baripe katar suako iek, ta truial cherda aver ezgode lacharde sukar.

³⁷ Gia cherda e des porrne, bilade iek sargo aver. Lengo baripe ta sar dikhona, iek sargo aver.

³⁸ Ta i cherda des lellenura tuchne. Suako lelleno sea le ojto stotine ta ojtovardes litrura, ta suako iek sea le iek pola ta ojtovardes sentimetrura. Ta thoda e lellenura upral pe porrne.

³⁹ Ta thoda panch porrne pe rig e chachi katar o cher, ta ogola panch pe rig e stingo. O lelleno baro thoda le pe rig e chachi katar o cher, pe rig sur katar perel o kham.

⁴⁰ O Jiram cherda e kavie, e pale ta e tasura. Gia getosarda po rado kai cherda e Salomonoke pala o cher e Devleko.

⁴¹ Dui pulsura ta e ganchura sargo kolura kai sea pe lende. E dui mreziche kai ucharena e ganchura sargo kolura, kai sea upral pe pulsura.

⁴² Star stotine granade pala e dui mreze, dui sivke katar e granade ande suako mreza te sai ucharen e kapitelura sargo kolura kai sea upral pe direkura,

⁴³ e des porrne, ta e des lellenura kai sea pe lende,

⁴⁴ o lelleno baro e paieke, ta e desudui guruva kai sea telal,

⁴⁵ e kavie, e palete, e tasura, ta sa e ezgode kai o Jiram cherda e Salomonoke, pala o cher e Devleko sea tuchne.

⁴⁶ Ta o charo bilada len ande bari umal katar o Jordan, pe chisai, maskar o Sukot ta o Saretan.

⁴⁷ Gachin sea e ezgode tuchne kai o Salomon ni cherda te phariaven len.

⁴⁸ Ta o Salomon phenda te cheren e ezgode kai sea ando cher e Devleko: O altar sunakuno, o stali sunakuno kai pe late thovena o marrno chinado e Devleke,

⁴⁹ e panch kandelabrura sunakune pe chachi, ta e panch kandelabrura po stingo angla o than santisimo. E lulunlla, e lampare ta e kliastura kai sea pe lende, sa sea sunakune.

⁵⁰ E vasura, e kanlle, e tasura, e bare rroia ta e brasesura minone te phabaren o taimano sa sea sunakune but sukar. E bisagre katar e udara kai sea ando than santisimo, katar e udara andral katar o cher, ta katar e udara e chereke, sa sea sunakune.

⁵¹ Ta kana getosarde te cheren sa o rado kai o Salomon bichaldaia te cheren ando cher e Devleko, o Salomon anda sa e ezgode sunakune ta rupune kai leko dad o David diaia e Devleke, ta thoda len ando cher e Devleko.