1 Relles 6 - Biblia ande chib Romani

O Salomon vazdel o cher e Devleko

¹ Kana nakhle star stotine ta ojtovardes burs sar kana e chave e Israeleke likiste katar o Ejipto, ando starto burs katar e charoina e Salomonoki, ando chon Ziv kai si o duito katar o burs, o Salomon thodape te vazdel o cher e Devleko.

² O cher kai o Salomon vazdia e Devleke sea le bis ta efta pole ando lungipe ta bulipe, ta trin pole ta dopas llik upre.

³ O udar e chereko kai saia anglal sea le inia pole ando lungipe ta star ta dopas pole ando bulipe.

⁴ Ta o Salomon cherda e penllerave bare andral ta minone avrial.

⁵ Ta i vazdia sobe pasa o zido e chereko ta po zido katar o than santisimo kai saia truial, ta i pasa o cher.

⁶ E soba kai saia tele sea la panch pole ando bulipe, ta e soba kai saia po maskaral sea la sov pole ando bulipe, ta e trito soba sea la efta pole ando bulipe, soke avrial cherde mai minone e zidura, te na thoven po cher e kasta kai llan upral.

⁷ Ta kana getosarena te lacharen e barra, ondaka anena len te sai vazden o cher, goleke kana radina ni asundilo o chokano ni o tover, ta ni iek aver ezgoda sastruni.

⁸ O udar katar e soba kai saia po maskaral katar o cher, saia pe rig e chachi katar o cher. Ta te likel pe sobe kai sea mai upre likena pe iek eskalera sargo boldini.

⁹ Kana o Salomon getosarda te vazdel o cher, marda upral sukar kotora kastune katar o sedro.

¹⁰ Ta i o Salomon vazdia e soba kai saia truial katar o cher, sea la dui pole ta iek cheperko. Gaia soba sea istarde po zido katar o cher e Devleko pe kotora kastune katar o sedro.

¹¹ Ondaka o Del phenda e Salomoneke ta phenda leke:

¹² Akana kai vazde mange gava cher. De tut golli so phendem chuke kai te guruve me zakonura ta te lla orta angla ma, me ka cherav so jalem sovel che dadeke e Davideke.

¹³ Me ka avav maskar e chave e Israeleke ta nikada ni ka mukav me foro o Israel.

¹⁴ Ta o Salomon getosarda te vazdel o cher e Devleko.

¹⁵ Marda andral pe zidura e chereke kotora kastune katar o sedro, telal chak upre. Ta pe phuv barrustuni marda kotora kastune katar o sipres.

¹⁶ Palal katar o cher vazdia iek soba kai sea la inia pole llik upre cherdi ande kotora kastune katar o sedro, ta gua saia o than santisimo.

¹⁷ O cher kai saia anglal katar o than santisimo sea le desojto pole.

¹⁸ E kotora kastune kai sea andral katar o cher sea sukar, cherde sargo lulunlla ta septelie. Sa saia katar o sedro ta ni dikhola ni iek bar.

¹⁹ Ta o Salomon lacharda o than santisimo te sai thoven andre e arka katar o Del o Gazda.

²⁰ Andral katar cher saia o than santisimo kai saia le inia pole ando lungipe inia pole ando bulipe ta inia pole llik upre. Angla katar o than santisimo, o Salomon cherda iek altar katar e kasta katar o sedro, ta marda le ando sunakai.

²¹ Ta i marda andral katar o cher ta o than santisimo ando sunakai, ta phangla o udar e chereko e lanchonenchar sunakune.

²² Marda ando sunakai sa o cher ta i o altar kai saia ando than santisimo.

²³ Ta cherda dui kerubinura katar o kas maslinkengo. Suako iek sea le star ta dopas pole llik upre,

²⁴ suako phak sea la dui pole ta iek cheperko. Goleke maskar e dui riga katar e pakha sea star pole ta dopas.

²⁵ E dui kerubinura sea len isto gola pole, ta e dui sea iek prema aver.

²⁶ Suako kerubin sea le star pole ta dopas llik upre,

²⁷ ta o Salomon thoda len ando than santisimo. Suako kerubin iekhe phakhaia dodila o zido kai saia pasa le, ta avere phakhaia dodila e phak katar o gua kerubin po maskaral katar o cher.

²⁸ Ta o Salomon marda e kerubinonen ando sunakai.

²⁹ Ta pe sa e zidura kai sea truial andral ta avrial cherda slike sargo kerubinura, slike sargo palmere ta lulunlla.

³⁰ Ta marda ando sunakai e phuv katar o cher, andral ta avrial.

³¹ E udara katar o santuario cherda len katar o kas e maslinkengo. E kasta kai istarena o udar ta upral saia iek slika kai saia la panch riga.

³² E dui udara o Salomon cherda len katar o kas e maslinkengo, ta pe lende cherda slike sargo kerubinura, palmere ta lulunlla. Mapalal marda len ando sunakai.

³³ Ta cherda katar o kas e maslinkengo angla o udar e chereko direkura kai sea len star riga.

³⁴ Ta thoda dui udara kai boldena, cherde katar o sipres.

³⁵ Pe lende cherda slike sargo kerubinura, palmere ta lulunlla. Mapalal marda len ando sunakai.

³⁶ Ta ande chereki barr cherda trin fisie katar e sukar barra, ta pe lende thoda kotora kastune katar o sedro.

³⁷ Ando starto burs katar e charoina e Salomonoki, ando chon o Ziv, thodepe te vazden o cher e Devleko,

³⁸ ta ando desuiekto burs katar leki charoina, ando chon o Jesvan kai si o ojtoto chon katar o burs, getosarde te vazden o cher. O Salomon vazdia le ande efta burs.