1 Relles 5 - Biblia ande chib Romani

O Salomon ta o charo o Jiram

¹ Kana o Jiram, o charo katar o Tiro, llangla kai thodea e Salomone po than e Davideko leko dad, bichalda lete leke llenen, soke o Jiram cherela but pala o David.

² Ondaka o Salomon bichalda llenen te phenen e Jirameke gia:

³ Tu llane kai mo dad o David nasti vazdia cher e Devleke pala but maripe kai saia le llik kana o Del cherda le te dobil pe dusmanonen.

⁴ A akana o Del dia amen e pas pe suako rig, soke inai amen dusmanura ni muke.

⁵ Goleke me mangav te vazdav cher e Devleke. Soke o Del achilo pe orba me dadea kana phenda leke: Che chave ka thovav te charoil pe cho than, ta vou ka vazdel cher te blagosin mo anav.

⁶ Phen akana, te ikanen kotora kastune katar o sedro katar o Libano, ta me sluge ka aven che slugenchar, ta me ka pochinav che slugenge e love kai tu ka phene, soke tu llane kai samo e sidoniura llanen te radin gia sukar ande kotora kastune.

⁷ Kana o Jiram asunda e alava katar o Salomon, veselisailo but ta phenda: ¡Blagosime te avel o Del, soke dia e Davide iek chavo but bizai te sai gazdaril pe gava baro foro!

⁸ Mapalal o Jiram bichalda llenen te phenen e Salomonoke gia: Asundem sa so bichaldan te phenen mange, ta ka cherav so manglan katar e kotora kastune katar o sedro ta o sipres.

⁹ Me sluge ka inllaren len katar o Libano llik kai e mora, ta kotar ka phenav te inllaren len ande llimie llik kai tu ka phene le. Kote tu ka le e kasta. Me samo mangav tutar te pravare me familia.

¹⁰ O Jiram dia e Salomone sa e kotora kastune katar o sedro ta o sipres kai mangla,

¹¹ ta o Salomon pravarda e familia katar o Jiram ande star millonura ta star stotine milie kile lliu, ta star milie ta star stotine litrura katar o mai lacho zeitino maslinkengo, suako burs.

¹² Gia o Del dia e Salomone bizaipe gia sar diaia le po alav. Ta saia pas maskar o Jiram ta o Salomon, ta e dui achile pe orba.

¹³ Ta o Salomon phenda te radin pe zor tranda milie murusa te sai vazden o cher e Devleko,

¹⁴ ta suako chon des milie murusa llana ando Libano. Gala murusa achena chon llive ando Libano, ta dui chona ande pe chera. Ta o Adoniram gazdarila pe sa gala llenen.

¹⁵ Ta e Salomone sea eftavardes milie murusa kai inllarena o pharipe, ta ojtovardes milie murusa kai ikanena e barra katar e burdura,

¹⁶ ta i trin milie ta trin stotine gazda kai arakhena e murusen kai radina.

¹⁷ Ta o charo phenda te ikanen e mai bare ta lache barra te vazden pe lende o cher e Devleko.

¹⁸ Ta e llene katar o Salomon ta o Jiram kai vazdena o cher, ta e llene katar o Gebal, lacharde e kotora kastune ta e barra te vazden o cher e Devleko.