1 Relles 4 - Biblia ande chib Romani

O gazdaripe katar o Salomon

¹ O Salomon saia o charo ande sa e phuv katar o Israel.

² Ta gala sea leke sudura kai pomozisarde le: O Azarias, chavo katar o popo o Sadok,

³ o Elijoref ta o Ajias, chave katar o Sisa, kai pisina e ezgode kai nakhena, o Josafat chavo katar o Ajilud, arakhela e lila katar o charo,

⁴ o Benaias, chavo katar o Joiada, gazda e boñikonengo. O Sadok ta o Abiatar e popura.

⁵ O mai baro sudo o Azarias chavo katar o Natan, o gazda katar e gazda. O Zabud chavo katar o Natan, amal e charoko.

⁶ O Ajisar, sluga ando cher e charoko, ta o Adoniram chavo katar o Abda, kai chidela e love dine e charoke.

⁷ E Salomone sea le desudui gazda pe sa e phuv katar o Israel. Suako iek lendar saia te anel o jape e charoke te leke familiake iek chon ando burs.

⁸ E anava katar e desudui gazda sea: O Ben Jur, pe burdura katar o Efraim,

⁹ o Ben Deker ando Makas, ando Saalbim, ando Bet Semes, ando Elon ta Bet Janan,

¹⁰ o Ben Jesed ando Arubot, ta i ando Soko ta ande sa e phuv katar o Efer,

¹¹ o Ben Abinadab, ande sa e phuv katar o Dor. Leki rromi saia e Tafat, chorri e Salomoneki,

¹² o Baana, chavo katar o Ajilud, ando Taanak, ando Megido ta ando sa o Bet Sean, kai si pasa o Saretan, ando Jezreel, katar o Bet Sean llik o Abel Mejola, mai incha katar o Jokmeam,

¹³ o Ben Geber, ando Ramot katar o Galaad, gazdarila pe forichura ando Galaad, kai sea katar o Iair chavo katar o Manases, ta i ande phuv katar o Argob kai saia ando o Basan, ta sea kote sovardes forura kai truial lendar sea zidura ta alkave cherde katar o tuch,

¹⁴ o Ajinadab, chavo katar o Ido, ando Majanaim,

¹⁵ o Ajimaas, saia katar e Basemat, chorri e Salomonoki, ando Neftali,

¹⁶ o Baana, chavo katar o Jusai, ando Aser ta ando Alot,

¹⁷ o Josafat, chavo katar o Paruaj, ando Isakar,

¹⁸ o Simei, chavo katar o Ela, ando Benjamin,

¹⁹ o Geber, chavo katar o Uri, ande phuv katar o Gad, ande phuv katar o Sijon, o charo katar e amorreura, ta o Og, o charo katar o Basan kai saia o edino kai gazdarila pe goia phuv.

O bizaipe ta o baripe katar o Salomon

²⁰ Ande phuv katar o Juda ta o Israel sea but llene, sea sargo e chisai kai si pasa e mora. Saia but jape ta pipe, ta saia but veselia.

²¹ O Salomon gazdarila pe sa e charoine kai sea katar o pai o Eufrates llik kai e phuv katar e filisteura ta i pasa e phuv katar o Ejipto. Sa gala phuvia pochinde love dine e charoke sa e llivesa e Salomonoke.

²² Ta suako llive anena jape kai o Salomon, anena: Milia ta sov stotine kile arina mai sani, ta desutrin milie ta dui stotine kile arina,

²³ des guruva thule, bis guruva kai bariaren len ande stoke, ta stotina bakre. Siervura, bakre katar e burdura, ta chiriklia thule,

²⁴ soke o Salomon gazdarila ande sa e phuv kai achela pe rig kai perel o kham katar o pai o Eufrates, katar o Tifsa llik e Gaza. Gazdarila pe sa e charura katar gala phuvia, ta saia pas truial.

²⁵ Ande llivesa katar o Salomon, sa o foro katar o Juda ta o Israel, katar o Dan llik o Berseba, zivina ande pas. Suako lleno telal katar pe kasta drakhenge, ta telal katar pe kasta simochinenge.

²⁶ E Salomone sea le saranda milie gra kai inllarena bordona, ta desudui milie murusa kai llana pe gra.

²⁷ Ta e gazda kai anena o jape e Salomoneke, suako iek avela pe sinia e Salomoneki ta achela chon llive te dikhel so trubula.

²⁸ Ta kana avela lengo vreme, e gazda anena sebada ta char e grastenge ta e zivirinienge kai inllarena ezgode.

²⁹ O Del cherda e Salomone bizai, ta o Salomon saia gia bizai kai acharela sa e ezgode.

³⁰ O bizaipe katar o Salomon saia mai but neko o bizaipe katar e llene kai sea ando oriente, ta mai but neko o bizaipe katar e ejipsiura.

³¹ O Salomon saia o lleno mai bizai, mai bizai neko o Etan o esraita, mai bizai neko o Eman, mai bizai neko o Kalkol ta o Darda chave katar o Majol. Ta saia but pinllardo ande sa e phuvia kai sea truial.

³² Ta o Salomon ikanda trin milie orbe bizai, ta i cherda milia ta panch llilia.

³³ Ta i dia orba katar e kasta, katar o sedro kai bariol ando Libano llik e patrorra kai barion pe zidura. Dia orba katar e zivirinie, dia orba katar e chiriklia, katar e sapa ta katar e mache.

³⁴ Ta avena katar sa e phuvia ta e charoine te asunen leko bizaipe.