1 Relles 3 - Biblia ande chib Romani

O Salomon zinilpe pala e chei e Faraonoki

¹ Ondaka o Salomon cherdilo o llamutro katar o Faraon, o charo katar o Ejipto, soke zinisailo pala leki chorri, ta inllarda la ando foro e Davideko kana vazdena leko cher, o cher e Devleko ta o zido kai si truial katar o Jerusalem.

² Ande gua vreme o foro dela kurbanura pe thana vazdine, soke ni saia cherdo o cher e Devleko.

O Salomon mangel e Devletar bizaipe

³ O Salomon volila e Devle ta cherela e volia e Davideki leko dad, samo kai dela kurbanura ta phabarela taimano pe thana vazdine,

⁴ ta i llala ando Gabaon te del kurbanura, soke kote saia o than vazdino mai baro te den kurbano phabardo. Milia kurbanura dela o Salomon pe gua altar.

⁵ Iek riat ando Gabaon, o Del sikadilo e Salomonoke ande sune, ta o Del phenda leke: Mang mandar sogo kamea, ta me ka dav le chuke.

⁶ Ta o Salomon phenda e Devleke: Tu sana but lacho me dadea e Davidea, soke vou saia orta angla tu ta saia chacho tuia. Goleke volisardan le ta dian le iek chavo te besel pe leko trono, sar si akana.

⁷ Tu Gazda ta Del murno, thodan man po than me dadeko, a me sem iek lleno terno kai ni llanel niso.

⁸ Ta cho sluga si maskar cho foro kai tu esvirisardan. Iek foro baro kai nasti llindol soke si but baro.

⁹ De che sluga iek lio bizai te sai krisil che foro, te sai llanel o lachipe ta so si o bilachipe, soke ¿Ko sai gazdaril pe gava foro chiro kai si gia baro?

¹⁰ Ta pela drago e Devleke so mangla letar o Salomon,

¹¹ ta o Del phenda e Salomonoke: Soke manglan mandar gava, ta ni manglan te zivi but bursa, ta ni manglan barvalipe ta te meren che dusmanura, a manglan bizaipe te llane sar te gazdari,

¹² me ka dav tut so manglan. Me ka dav tut bizaipe kai nika ni saia, ta ni ka avel aver lleno sargo tu.

¹³ Ta i ka dav tut barvalipe ta baripe, te na avel aver charo sargo tu.

¹⁴ Ta te llelan orta angla ma, ta te cherdan mi volia, te cherdan so phenen me zakonura gia sar cherda le cho dad o David, me ka cherav te zivi but bursa.

¹⁵ Kana o Salomon llungadilo, dikhla kai saia iek suno. Ta kana avilo ando Jerusalem, avilo angla e arka katar o Del o Gazda ta dia kurbanura ta ezgode dine te sai avel pas. Mapalal cherda iek jape sa pe slugenge.

O Salomon, o krisari bizai

¹⁶ Ande gua vreme avile dui kurvichke te dikhen e charo. Ta kana von avile angla le,

¹⁷ iek lendar phenda: ¡Ioi, glamno charo! Gaia diskinia ta me zivia ande iek cher. Ta maladila mange iek minono kana voi saia manchar chere.

¹⁸ Kana nakhle trin llive sar kana maladila mange, i gaia diskinia maladila lake, ta amen sama korkorre. Niko ni saia chere, samo amen.

¹⁹ Iek riat o minono katar gaia diskinia mulo, soke voi inzili pe lete kana sovela.

²⁰ Ondaka voi ustili po dopas katar e riat kana me sovava, lia mo minono ta thoda le pasa pete, ta thoda e minone kai mulo pasa ma.

²¹ Kana ustilem thiarinako rano te dav me minone te piel kolin, dikhlem kai saia mulo. A kana llivosaila thodem sama kai vou ni saia mo minono.

²² Ta ogoia diskinia phenda: Iok, o minono llundo si murno, ta o mulo si chiro. Ta ogoia diskinia phenda: Iok, o mulo si chiro, ta o llundo si murno. Gia denape orba angla o charo.

²³ Ondaka o charo phenda: Gaia phenel kai lako minono si o llundo, ta kai o mulo si katar ogoia, a ogoia phenel: ¡Iok, o llundo si murno ta o mulo si chiro!

²⁴ Ta o charo phenda: ¡Anen mange iek jarni! Ta ande leke o jarni.

²⁵ Ta o charo phenda: Chinen e minone e llunde pe dui kotora, ta den suakone diskinia iek kotor.

²⁶ Ondaka e diskinia kai saia e dei katar o minono o llundo, phenda e charoke: ¡Mo glamno charo! ¡Na mundar, e minone! ¡Dele mai sukar late! A ogoia phenda: ¡Ni mange ni chuke! ¡Te chinen le po dopas!

²⁷ Ondaka o charo phenda: Na mundaren e minone ta den le late, soke voi si leki dei.

²⁸ Ta sa o foro katar o Israel asunda sar krisisarda o charo, ta daraile letar soke acharde kai ande le saia bizaipe e Devleko te sai krisil.