1 Relles 22 - Biblia ande chib Romani

O Mikaias poraukil kai o Ajab ka avel peradino

¹ Trin burs nakhle ta ni saia maripe maskar e siriura ta o Israel.

² A pala o trito burs, o Josafat, charo katar o Juda, avilo kai o charo katar o Israel.

³ Ta o charo katar o Israel phenda pe slugenge: ¿Ni llanen tumen kai o Ramot katar o Galaad si amaro ta amen ni cherdam niso te la le katar o charo katar e Siria?

⁴ Ta puchla e Josafate: ¿Mange te ave manchar te da po Ramot katar o Galaad? Ta o Josafat phenda leke: Me ta me boñikura sam sargo tu, mo foro sargo cho foro, ta me gra sargo che gra.

⁵ Ta o Josafat phenda e charoke katar o Israel: Puch allive e Devle.

⁶ Ondaka o charo katar o Israel chidia e profetanen kai sea preko star stotine llene, ta puchla len: ¿Morabi te dav po Ramot katar o Galaad, o iok? Ta von phende leke: De pe lete, soke o Del ka cherel te dobi.

⁷ A o Josafat phenda: ¿Inai kate aver profeta e Devleko te sai pucha i le?

⁸ Ta o charo katar o Israel phenda e Josafateke: Si aver profeta kai amen sai manga letar te puchel e Devle. Vou si o Mikaias, chavo katar o Imla. A me nasti dikhav le, soke nikada ni poraukil mange ezgode lache, samo ezgode bilache. A o Josafat phenda leke: Na phen gia.

⁹ Ondaka o charo katar o Israel ikharda iekhe sudo, ta phenda leke gia: ¡An oma e Mikaiase, chavo katar o Imla!

¹⁰ Ta o charo katar o Israel ta o Josafat o charo katar o Juda, besena pe pe estoliche ta sea furiade pe patavenchar charoinake kote kai chistona o lliu pasa o udar katar e Samaria. Ta e poraukura porokina angla lende.

¹¹ Ta o Sedekias, chavo katar o Kenaana, cherda singa sastrune, ta phenda: Gia phenda o Del, gale singenchar ka chalave e sirionen lligo ni ka mundare len.

¹² Ta sa e poraukura poraukina gia: De po Ramot katar o Galaad ta ka dobi, soke o Del ka del ande che va e foro.

¹³ Ta o bichaldo kai lleloia te ikharel e Mikaiase, phenda leke: Sa e poraukura phenen ezgode lache e charoke. Isto gia phen i tu sargo von kai ka dobil.

¹⁴ Ta o Mikaias phenda leke: ¡Ando anav e Devleko jav sovel kai samo ka phenav e ezgode kai o Del ka phenel mange!

¹⁵ Ondaka avilo kai o charo, ta o charo puchla le: Mikaias, ¿morabi te da po Ramot katar o Galaad, o iok? Ta o Mikaias phenda leke: Lla, soke o Del ka cherel te dobi, ta ka del le ande che va.

¹⁶ A o charo phenda: ¿Gachin droma morabi te mangav tutar te ja sovel ando anav e Devleko, kai so ka phene si o chachipe?

¹⁷ Ondaka o Mikaias phenda: Dikhlem sa e llenen katar o Israel rispime pe burdura, sargo bakre kai inai len chobano. Ta o Del phenda: Gala inai len gazda, te irilpe esmiro suako lleno kai po cher.

¹⁸ Ta o charo katar o Israel phenda e Josafateke: ¿Ni phendem chuke me, kai gava lleno nikada ni poraukil mange ezgode lache, samo ezgode bilache?

¹⁹ Ta o Mikaias phenda: Asun so phenel o Del. Me dikhlem e Devle besindo pe po trono, ta lea sa e suechura katar o miloso pe porrne pe leki chachi ta pe leko stingo.

²⁰ Ta o Del puchla: ¿Ko ka cherel te llal ta te perel o Ajab ando Ramot katar o Galaad? Nesave phenena iek ezgoda, ta aver phenena aver ezgoda.

²¹ Ondaka likisto iek duo ta thodape angla o Del, ta phenda leke: Me ka cherav le te llal. Ta o Del puchla le: ¿Sar ka chere le?

²² Ta o duo phenda leke: Me ka avav duo kojamno ando mui e profetonengo. Ta o Del phenda leke: Lla, ta cher le

²³ Ta akana llane kai o Del thoda iek duo kojamno ando mui katar sa che poraukura, ta kai o Del chinada o bilachipe chuke.

²⁴ Ondaka o Sedekias chavo katar o Kenaana avilo pasa o Mikaias ta chalada le pe leki cham, ta phenda leke: ¿Soke llelotar mandar o duo e Devleko te del orba tuia?

²⁵ Ta o Mikaias phenda: Ka llanele kana ka gurudo katar iek soba ande aver.

²⁶ Ondaka o charo katar o Israel phenda: ¡Phanden e Mikaiase ta inllaren le angla o Amon o gazda e foroko, ta angla mo chavo o Joas!

²⁷ Phenen kai me phendem te thoven le ando phandipe, ta samo te den le te jal marrno ta te piel pai ande patnia lligo ni ka iriv man esmiro.

²⁸ Ta o Mikaias phenda: Te irisailan esmiro, gua si soke o Del ni dia mange orba. Ta i phenda: ¡Asunen sa e phuvia!

²⁹ Ta o charo katar o Israel llelo e Josafatea o charo katar o Juda, ando Ramot katar o Galaad.

³⁰ Ta o charo katar o Israel phenda e Josafateke: Me ka dav kote kai marenpe furiado ande aver patave te na pinllaren man, a tu furiado che patavenchar. Ta o charo katar o Israel thoda pe pete aver patave te na pinllaren le, ta dia kote kai marenpe.

³¹ A o charo katar e Siria bichalda pe tranda ta dui gazda katar e bordona, ta phenda lenge te na marenpe ni barea ni minonea, samo e charoia katar o Israel.

³² Kana e gazda katar e bordona avile kai o Josafat, phende: Vou si o charo katar o Israel. Ta truisarde le te marenpe lea. Ondaka o Josafat urkisarda.

³³ Kana dikhle e gazda katar e bordona kai vou ni saia o charo katar o Israel, durile letar.

³⁴ A iek lleno chudia iek llida ta e llida dia ando charo katar o Israel maskar e patave sastrune. Ta phenda pe boñikoke kai inllarela o bordon: Irisao ta ikan man katar o maripe soke ranisarde man.

³⁵ A o maripe saia but baro gua llive, ta o charo achilo ande po bordon angla e siriura, ta kana perela o kham mulo, ta leko rat perela po bordon.

³⁶ Kana perela o kham, ando pero asundilo iek urkipe kai phenela: ¡Suako lleno te irilpe kai po foro, ta kai pi phuv!

³⁷ O charo mulo ta ande le ande Samaria, ta kote prajosarde le.

³⁸ Ta jalade o bordon po bunari katar e Samaria kote kai avena e kurvichke te jalavenpe. Ta e llukela piena o rat e charoko, gia sar phendaia le o Del.

³⁹ Sa so cherda o Ajab, o cher cherdo katar o marfil kai vazdia, ta sa e forura kai vazdia, si pisime ando lil katar e ezgode kai cherde e charura katar o Israel.

⁴⁰ Mulo o Ajab, mapalal charoisarda pe leko than leko chavo o Okosias.

O Josafat charoil ando Juda

⁴¹ O Josafat, chavo katar o Asa, thoda te charoil ando Juda kana saia o starto burs katar o Ajab, o charo katar o Israel.

⁴² Kana o Josafat thodape te charoil sea leke tranda ta panch burs, ta charoisarda bis ta panch burs ando Jerusalem. Leki dei saia e Azuba, chei katar e Silji.

⁴³ O Josafat saia orta angla o Del sargo leko dad o Asa, soke cherda o lachipe angla e akha e Devleke, a ni lia e thana vazdine soke o foro dela kurbanura pe delenge ta phabarena o taimano kote.

⁴⁴ O Josafat achilo ande pas e charoia katar o Israel.

⁴⁵ Sa so cherda o Josafat si pisime ando lil katar e charura e Israeleke.

⁴⁶ O Josafat chudia katar e phuv e murusen kai kurvinape pala pe dela kai achilea ando vreme leke dadeko o Asa.

⁴⁷ Ni saia charo ando Edom, saia samo iek gazda po than e charoko.

⁴⁸ O Josafat cherda llimie sargo gola kai sea ando Tarsis, te sai anel sunakai katar o Ofir. Ta nasti llele soke phagile ando Ezion Geber.

⁴⁹ Ondaka o Okosias phenda e Josafateke: Muk te llan ande llimie murne sluge che slugenchar, a vou ni kamla.

⁵⁰ O Josafat mulo ta prajosarde le ando foro e Davideko, ta pe leko than charoisarda leko chavo o Joram.

O Okosias charoil ando Israel

⁵¹ O Okosias chavo katar o Ajab, thodape te charoil ando Israel ande Samaria kana cherela desefta burs kai o Josafat charoila ando Juda.

⁵² Ta ni saia lacho angla o Del, soke cherda sa e ezgode bilache kai cherda leko dad ta leki dei, ta i so cherda o Jeroboam chavo katar o Nabat kai cherda te cherel o bilachipe o Israel,

⁵³ radisarda ta blagosisarda e Baale gia sar cherda le leko dad, goleke joliarda e Gazda, o Del katar o Israel.