1 Relles 21 - Biblia ande chib Romani

O Ajab ta e umal e drakhengi katar o Nabot

¹ Kana nakhle gala ezgode, iek lleno katar o Jezreel kai ikhardola Nabot, saia le iek umal drakhengi pasa o cher katar o charo o Ajab ande Samaria.

² Ta o Ajab dia orba e Nabotea, ta phenda leke: De man chi umal drakhengi te sai cherav mange iek vostano, soke si pasa mo cher. Me ka dav tut aver umal drakhengi mai sukar. O te kame sai pochinav le chuke lovenchar.

³ O Nabot phenda e Ajabeke: Te na del o Del te dav tut so die man me dada.

⁴ Ta o Ajab irisailo kai po cher tristome ta joliariko, soke o Nabot phendaia leke kai ni ka del le so die le leke dada. Ta thodape te sovel, ta ni jala niso.

⁵ Ta avili leki rromi e Jezabel, ta puchla le: ¿Soke san gia tristome, ta ni kame te ja?

⁶ O Ajab phenda lake: Diem orba e Nabotea o lleno katar o Jezreel, ta manglem letar te bichinel mange pi umal drakhengi, o te kamela vou, te dav le aver umal drakhengi pala leki.

⁷ Ondaka e Jezabel phenda leke: ¡Tu san o lleno kai gazdaril ando Israel! Ja, ta achi esmiro. ¡Me ka cherav te avel chiri leki umal drakhengi!

⁸ Ta e Jezabel pisisarda lila ando anav e Ajabeko, thoda o sello e charoko ta bichalda len e gazdenge ta e phurenge katar o foro kai zivila o Nabot.

⁹ Ta e lila kai pisisarda phenena gia: Cheren alluno, ta anen e Nabote angla o foro,

¹⁰ ta dui llene te kojaven ta te phenen kai o Nabot kusla e Devle ta e charo. Mapalal chalaven le e barrenchar te merel.

¹¹ Ta e phure, ta e mai preche katar o foro, cherde sar phenda lenge e Jezabel ande lila klai bichaldaia lenge.

¹² Ikharde e llenen te cheren alluno, ta thode e Nabote angla o foro.

¹³ Avile dui llenen bilache, besle angla le, ta kojade e foroke. Phende kai o Nabot kusla e Devle ta e charo. Ta ikande le avri, chalade le e barrenchar ta mulo.

¹⁴ Mapalal bichalde te phenen e Jezabelake kai o Nabot mulo.

¹⁵ Kana e Jezabel asunda kai mundarde e Nabote e barrenchar, phenda e Ajabeke: Lla, ta le chuke e umal e drakhengi katar o Nabot, o lleno katar o Jezreel kai ni kamela te bichinel la. Akana o Nabot mulo, ni zivil ios.

¹⁶ Kana o Ajab asunda kai o Nabot mulo, llelo kai e umal e drakhengi te lel la peke.

¹⁷ Ondaka o Del dia orba e Eliaseke o tisbita, ta phenda leke:

¹⁸ Lla te dikhe e Ajabe, o charo e Israeleko ande Samaria. Vou si akana ande umal e drakhengi katar o Nabot, ta mangel te lel la peke.

¹⁹ Ta ka phene leke gia: Gia phenel o Del: Soke mundardan ta lian e ezgode kai inai chire, isto kote kai e llukela pile o rat e Nabateko, i cho rat ka pien le e llukela.

²⁰ Ta o Ajab phenda e Eliaseke: ¿So misli tu, kai me sem cho dusmano? Ta o Elias phenda leke: Ea, soke samo o bilachipe chere angla o Del.

²¹ Goleke o Del phenda gia: Me ka zatriv tut, ta ka zatriv sa e murusen katar chi familia ando Israel, sluge ta golen kai inai sluge.

²² Ta i ka cherav che familiake isto gua so cherdem e familiake katar o Jeroboam, chavo katar o Nabat. Ta ka cherav isto gua so cherdem e familiake katar o Baasa, chavo katar o Ajias, soke joliarde man kana cherde e Israele te cherel o bilachipe.

²³ O Del dia orba i katar e Jezabel, ta phenda gia: E llukela ka jan e Jezabele po zido katar o Jezreel,

²⁴ O lleno katar o Ajab kai ka merel ando foro, ka jan le e llukela. Ta o lleno kai ka merel ande umalia ka jan le e chiriklia kai jan mas.

²⁵ O chachipe si kai niko ni saia sargo o Ajab, kai cherela samo o bilachipe soke leki rromi phenela leke te cherel le.

²⁶ O Ajab saia iek lleno gado, soke llala pala aver dela sar cherena le e amorreura, kai o Del chudia len angla e chave katar o Israel.

²⁷ Kana o Ajab asunda gala ezgode, pharrada pe patave, thoda pe pete patave zalosne, cherda alluno, sovela po prajo ta llala but tristome.

²⁸ Ondaka o Del dia orba e Eliasea, o tisbita ta phenda:

²⁹ ¿Dikhlan sar o Ajab diape ando lallao angla ma? ta soke keisailo angla ma ni ka cherav so phendem leke ande leke llivesa. Ka cherav le ande llivesa katar leko chavo.